Nunatta Eqqartuussiviata nalunaarutigaa, Kuannersuit pillugit eqqartuussivimmi suliami Naalakkersuisut akissuteqarnissaannut piffissaliussap sivitsorneqarnissaa ilimagineqassanngitsoq.

Australiamiut aatsitassarsioqatigiiffiat Energy Transition Minerals (ETM) tusagassiuutinut nalunaarummi taama ilisimatitsivoq.

Suliap arriippallaamik ingerlanera ingerlatseqatigiiffiup piffissami sivitsortumi isornartorsiorpaa.

Ingerlatseqatigiiffiup Naalakkersuisut qaammatip kingulliup naalernerani ’piaaralutik akornusersuinerarpai’, ingerlatseqatigiiffik isumaqarami kinguaattoornerit tassaasut ’suliap sapinngisamik sivisunerpaamik kinguarsarneratigut’ aatsitassarsiorfimmik Kalaallit Nunaanniit anisitsiniaaneq.’

Piffissaliussaq qaangerneqartoq

Naalakkersuisut kingusinnerpaamik akissuteqaamminnik decembarip 15-ianni 2026 tunniussissapput. Piffissaliussaq aallaqqaammut oktobarip 27-anni aalajangersarneqarsimagaluarpoq, maannamullu aappassaannik sivitsorneqarluni.

ETM naapertorlugu Nunatta Eqqartuussiviata maanna nalunaarutigaa, piffissaliussap sivitsorneqaqqinnissaa naatsorsuutigineqarsinnaanngitsoq. Aammattaaq eqqartuussiviup

Aammattaaq eqqartuussiviup erseqqissarpaa, illuatungeriit  suliap pappiarartaasa nutserneqarnissaannut piffissaq pisariaqartinneqartoq siunissami naatsorsuutigissagaat.

ETM-ip pisortaata Daniel Mamadouip nalunaarutigineqartoq kingulleq qujaruppaa.

- Naalakkersuisut illersornissamik piareersarnissaanut ukiut tallimaat avillugu periarfissarinikuuaat, marloriarlutillu piffissamik sivitsuiffigineqarlutik. Eqqartuussiviup maanna aalajangerpaa, Naalakkersuisut sivitsueqqinnissaq ilimagissanngikkaat, tusagassiuutinut nalunaarummi taama allappoq.

Suliap arriippallaamik ingerlaneranik ingerlatseqatigiiffiup isornartorsiuinera, Naalakkersuisut siusinnerusukkut akueriumanagu nalunaaruteqarnikuupput.

Tassunga atatillugu Inuussutissarsiornermut Aatsitassanullu Naalakkersuisoqarfik nassuiaavoq, kinguartitsinermut pissutaasoq akissuteqaatip kalaallisut nutserneqarnissaa pisariaqartinneqarmat, Naalakkersuisut imarisaasut isummerfigisinnaaniassammatigit.

Naalakkersuisoqarfiup aammattaaq innersuussutigaa marsimi 2026-mi isumaqatigiissitsiniarluni eqqartuussiviup aalajangiinera, Naalakkersuisut isumaat naapertorlugu tassuuna ersimmat Naalakkersuisut suliaq siuarsarniarsimagaat, suliallu pisariinnerusumik akikinnerusumillu ingerlanneqarnissaanik siunnersuuteqarlutik.

Milliardilikkaanik nalilimmik suliniut pillugu aaqqiagiinnginneq

Eqqartuussivimmi suliami pineqarpoq, ETM Kujataani Kuannersuarni aatsitassanik qaqutigoortunik aatsitassanillu allanik piiaasinnaatitaanersoq.

Kalaallit Nunaanni uranimik 2021-mi piiaasoqarnissaa inerteqqutaalerpoq, tamannalu pissutigalugu Kuannersuarni aatsitassarsiorfissamik pilersaarut piviusunngortinneqarsinnaajunnaarpoq, aatsitassat piiarneqartussat uranimik akoqarmata.

ETM isumaqarpoq, tamanna pissutigalugu ingerlatseqatigiiffiup suliniut piviusunngortissinnaajunnaaraa, milliardikkaanillu taarsiivigineqarnissani piumasaralugu.

Ingerlatseqatigiiffik nammineq ilisimatitsivoq 2007-imiit 1 milliard kroner sinnerlugit suliniummut aningaasaliisimalluni.

ETM ilimagaa 2027-mi ukiup affaanit kingullermiit 2028-mi ukiup affaanut siullermut tunngasut sapaatip-akunnerini arlalinni pingaarnertut maanna isumaqatigiinniutigineqassasut.

Ilutigisaanik ingerlatseqatigiiffiup suliaq Kalaallit Nunaanni aatsitassarsiornermut pingaaruteqartutut taavaa.

ETM naapertorlugu aningaasaliisinnaasut Kalaallit Nunaanni aningaasaliissutit annertuut inatsisitigullu aaqqiagiinngissutit qanoq suliarineqartarnerat malinnaavigaat.

Ingerlatseqatigiiffiup tikkuarpaa, suliap qanoq inerneqarnera Kalaallit Nunaata aningaasaliiffiusinnaasutut – annermillu aatsitassarsiornermut tunngatillugu – isigineqarneranut pingaaruteqarsinnaasoq.