Nunatta Eqqartuussisuuneqarfia: Inatsisartut Namminersorlutik Oqartussallu Kuannersuit pillugit suliami pinngitsuutinneqartut

Kuannersuarni suliniuteqartup eqqartuussivimmi suliamut aningaasartuutit 150.000 koruunit akilissavai. Nunattali eqqartuussivimmut suliassanngortinneqarnera suli naammasseqqajanngilaq.

Allattoq Markus Valentin

septembarip 01-at 2026 15:51

Nutserisoq Ivalu Thorleifsen

Nunatta Eqqartuussisuuneqarfiata Inatsisartut Namminersorlutik Oqartussallu Kuannersuit pillugit suliami pinngitsuutinneqarnissaat aalajangerpaa.

Oqartussat taakku marluk ‘eqqartuussivilersuunneqarnissaat eqqortuunngimmat’ pinngitsuutinneqarput, Nunatta Eqqartuussisuuneqarfia tusagassiuutinut nalunaarummi paasissutissiivoq.

Taamaattumik aatsitassarsioqatigiiffik Greenland Minerals Inatsisartunut Namminersorlutik Oqartussanullu suliamut atatillugu 150.000 koruuninik aningaasartuutinik akiliisussanngorpoq.

Aamma atuarukEqqartuussiviup suliaq Danmarkimi aalajangiiffigineqarsinnaannginnerararaa: Kuannersuit pillugit aaqqiagiinnginneq ingerlaannassasoq

Greenland Mineralsilli nunattalu akornanni eqqartuussivilersuussineq suli naammassinngilaq.

Inatsisartut Namminersorlutik Oqartussallu saniatigut, oqartussat tallimat aamma eqqartuussivilersuunneqarput:

Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik; Aatsitassanut Aqutsisoqarfik; Naalakkersuisut siulittaasuata Naalakkersuisoqarfia; Nunalerinermut, Imminut Pilersornermut, Nukissiuutinut Avatangiisinullu Naalakkersuisoqarfik; Aatsitassanik Suliassaqarfinnut Avatangiisinut Aqutsisoqarfik.

- Nunatta Eqqartuussisuuneqarfiata pineqartut 2026-mi ukiakkut isumasioqatiginerisigut qaqugu isumaqatigiinniartoqarnissaata aalajangerneqarnissaa naatsorsuutigigaa, tusagassiuutinut nalunaarummi allassimavoq.

Kuannersuit

Kujataani Narsap eqqaaniittoq.

Aatsitassat qaqutigoortut (elektronikkinut atorneqartartut), zinki kiisalu urani saniatigut qallorneqartarput.

Australiamiut aatsitassarsiorfiata Energy Transition Mineralsip (ETM) suliassaq ingerlanniaraa, 2021-mi qinersinermi pilersaarutit unitsinneqarput, Inuit Ataqatigiit (IA) uranisiornermut akerliullutik ajugaammata, 2021-mi Inatsisartut uranimik piiaqqusiunnginneq (urani 100 ppm sinnerlugu akulik) inatsisinngortippaat.

Unitsitsineq pissutigalugu ETM-ip Namminersorlutik Oqartussat suliassanngortippai.

Uranimut inatsit aamma inatsisit tunngaviusut

Greenland Mineralsip Inatsisartut uranimut inatsisaat 2021-meersoq namminerminnut suliniutiminnullu atuuttariaqanngissorisimavaat.

Taamaattumik piiaanissamut akuersissutip itigartitsissutigineqarsimasup unioqqutitsineruneranik eqqartuussivimmit uppernarsarneqarnissaa piumasaraat.

Greenland Mineralsillu uranimut inatsit inatsisinut tunngaviusunut assortuisutut aamma unnerluutigaa.

Aatsitassarsioqatigiiffiup uranimut inatsit Inatsisartut inatsisinik suliaqariaasaasa Namminersorlutik Oqartussallu ingerlatsinerisa akuleriinnerisigut atuutilersissimanerarpaa.

Inatsisit tunngaviusut assortorneqartut inatsisitigut nalilersorneqassappata, ministeriuneq ministereqarfilluunniit akisussaasoq eqqartuussivilersuunneqassasoq, Nunatta Eqqartuussivia allappoq.

Aamma atuaruk Naaja Nathanielsen isumaqatigiissitsiniarnermut suliassanngortitsinissamut itigartitsineq pillugu: - Ajugaaneq ersarippoq

Inatsisartut inatsisinik atortussanngortitsisut eqqartuussivilersuunneqarsinnaanngimmata pinngitsuutinneqarput.

Namminersorlutik Oqartussani naalakkersuisut Inatsisartullu ilaapput.

Inatsisartut pinngitsuutinneqarmata Namminersorlutik Oqartussat aamma pinngitsuutinneqarput.

Naalakkersuisunut inatsisinut tunngavisunut tunnganngitsumik allanulli tunngasunut eqqartuussivilersuussineq ingerlaannarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.