Nunatsinni futsalimi kakkannerit sisamat Super Cupimi unammilerput
B-67, Nagdlúnguak, IT-79 aamma T-41 imminnut akiniaaffigalutik unamminissamut septembarip naanerani periarfissaqalissapput.
Tassanimi pissaaq illup iluani arsaannermi futsalimi Super Cup, 2024-milu siullerpaamik pereersoq unamminerit pikkunartuunissaat ilimagineqarpoq.
- Pikkunarnissaat ilimagaarput. Qanoq pikkunartigiumaarnissaat siorna pissanngatiginikuuarput. Taamani takuarput peqataasut pimoorissillutik sukataartupilussuit, arsaattartut kattuffianni KAK-mi siulittaasoq Kenneth Kleist KNR-imut oqarpoq.
Maanna unamminerit septembarip naanerani pisussanngorput immaqa inuit ilaasa siusigisinnaasaanni illup iluani sungiusarneq aatsaat aallarteqqammissammat. Pisussalli allat KAK-mi qissimigaarneqarsimapput unamminissat ullui inissinneqalermata.
Nunanut allanut unammisartut akornusernaversaarpaat
- Iligiit siorna peqataasut piareersarsimanissaat siorna pissanngatiginikuuarput assullu takulluarluta. Maanna aamma eqqarsaatigeqqaaraluarparput iligiit suli piareersarluarnerunissamut piffissalerusullugit novembarimi unammisoqarsinnaanera isumaliutaagaluarpoq, Kenneth Kleist oqarpoq.
- Kisianni silami nunanut allanut unammisartut oktobarip aallartilaarnerani Østrigiliartussaapput aammalu futsalimi nunanut allanut unammisartut novembarimi Kroatialiartussaallutik. Taamaattumik Super Cupimi unamminissat septembarip aallartilaarneranut inissippagut, Kenneth Kleist oqarpoq.
Super Cupimi peqataasutssat tassaapput Nagdlúnguak Ilulissaniit, T-41 Aasianniit, B-67 aamma IT-79 Nuummiit. Taakku Super Cupimut peqataaqquneqarneq ilassilluarpaat.
- Peqataanissaq assut soqutigineqarpoq aamma ilimagilluinnarpara timersortarfissuaq Inussivik isiginnaariarpassuaqarumaartoq, Kenneth Kleist oqarpoq.
Super Cup septembarip 25-aniit 28-anut pisussaq KNR-TV-mi toqqaannartumik aallakaatinneqassaaq.
