Futsal: B-67 Super Cupimi ajugaavoq

Futsalimi unammersuarnermi Super Cupimi ukiup aappassaa tulleriisillugu B-67 Nuummeersoq ajugaavoq unammersuarneq naggaserneqarmat Nuummi timersortarfissuarmi Inussivimi inunnik ulikkaarluinnarsimasumi.

Finale qanoq ingerlassanersoq pissanngatigineqarpoq B-67 aamma finalemi unammisaat Nagdlúnguak Ilulissaneersoq unamminerni aallarniutaasuni tamarmik pingasoraarlutik naligiiginnareersut.

- Taanna angusaq uatsinnut iluaappoq. Suut tamarmik iluatsilluartut uatsinnut nuannernerusarami iluaattuulluni unammisavut arsarluartut, B-67-mi anføreriullunilu sungiusaasoq Patrick Frederiksen KNR-mut oqarpoq.

Taannali iligisaalu finalemi nuannaarutissaqarnerupput. Siuajaarput Nagdlúnguau 2-1-mut qanillingaluareersoq siuaqqanertik annertusitikkaluttuinnarlugu.

B-67 9-1-mik ajugaavoq unammineq naammassisoq nalunaarlugu dommerit siggarmata. Nuannaarnerallu minnerulinngilaq pilersaarutaareersut iluatsimmata.

T-41 akiniaavoq

- Nukittuffigut finalemi piareersarnitsinni samminikuuagut, Patrick Frederiksen oqarpoq.

Super Cupimi B-67 arsartoqarpoq utoqqasaani arsaqataasinnaasuniit inuusuttuaqqani arsaqataasinnaasunik. Taakkulu saniatigut nunanut allanut unammisartuniittut peqataapput.

Kinguaariit nikikkiartornissaannut inuusuttuaqqat peqataanerat piareersaataavoq.

- Assorujussuaq nuannerpoq takullugu piumassuseqartut tunuarsimaanngitsullu. Assut pingaartipparput inuusuttuaqqat angajulliunerusunut pitsaasumik ikaarsaartinninnissaat. Taamaattumik inuusuttuaqqat peqataanissamut periarfissaqarnerat assut nuannerpoq, Patrick Frederiksen oqarpoq.

Nunatsinni pissartanngorniunnermi upernaaq bronzennanniunnermi ajorsarnerminnut T-41 Aasianneersoq akiniaavoq. Taakkumi bronzennanniunnermi unammivaat upernaaq bronzennattut IT-79 Nuummemersoq. 

Tamatumuuna T-41 ajugaasuuvoq unamminermi 6-1-mik ajugaangamik.

Unammersuarnermi arsartutut naleqarnerpaatut Lars Erik Reimer Nagdlúnguameersoq toqqarneqarpoq.

Super Cup siullerpaamik ukioq manna pivoq tassanilu B-67 aamma ajugaavoq.