Futsal: Nunarsuarmi kakkannerpaanut kalaallit unammissapput
Inuiattut erinarsuupput martsip tallimaat Brasiliami appinneqassaaq aammalu ulloq taanna Brasiliamiut inuiattut erinarsuutaat appinneqassalluni.
Tassaana kalaallit futsalimi nunanut allanut unammisartut unamminissaasa maannamut sakkortunersaat qanilliartortoq. Tamanna pissaaq unammersuarnermi International Futsal Cupimi tassanilu kalaallit siulliullugit unammissavaat nunarsuarmi kakkanerpaat allassimaffianni siullertut inissisimasut Brasilia.
- Unammineq sakkortoorujussuusussaavoq aatsaammi taama sakkortutigisunut unammilerpugut, kalaallit anføreriat Patrick Frederiksen KNR-mut oqarpoq.
- Timikkut sakkortoorujussuusussaavoq aammali eqqarsartaatsikkut sakkortussalluni unammisassatta taktikkimi iliuutsit assigiinngitsorpassuit atussagunarmatigit, Patrick Frederiksen oqarpoq.
Kalaallit aamma unammissavaat Iran nunarsuarni kakkannerpaat allassimaffianni normu 6-tut inissisimasoq kiisalu Afghanistan normu 30-usoq. Kakkannerpaat allassimaffianni kalaallit allassimanngillat.
Qanorluunniit pissarsiaqassapput
Allatut oqaatigalugu nunarsuarmi kakkannerpaat ilaannut kalaallit unammisussanngorput aammalu futsalip pileqqaarfia Brasilia ornilerlugu.
- Qanorluunniit inerneqaraluarpat angalanerput assut pissarsiaqarfigisussaavarput. Arssaannerup iluani sorpasuupput arsamik tigummilluni arsaqaraniluunniit iliuusaasinnaasut tamakkulu ilikkagaqarfigissavagut, Patrick Frederiksen oqarpoq.
- Futsalip nunaanukalerpugut arsartuttalu meeraallutillu Brasilia arsaattoq isiginnaartarnikuuaat. Qularnanngilaq angalanissarput pissarsiaqarfiulluassasoq, Patrick Frederiksen oqarpoq.
Unamminerit aallarniutaasut pereerpata inissinniuunnerit pisussaapput.
Patrick Frederiksenip ilimagillunnarpaa nunanut allanut unammisartut angalanerat Nunatsinni peqatigiiffiit pissarsissutigiumaaraat.
- Nunanut allanut unammisartuniittut peqatigiiffinnit assigiinngitsuneersuupput. Arsartut pissarsiatik peqatigiiffimminnut nassarlugit ingerlateqqissavaat Nunatsinnilu arsaanneq ineriartorteqqillugu, Patrick Frederiksen oqarpoq.
