55-inik ukiulik meeqqanik kinguaassiutitigut atornerluinermit assinik 835-nik tigummiaqartutut unnerluutigineqartoq
Angut 55-inik ukiulik Sisimiuni eqqartuussivimmi novembarip 24-anni sassartinneqassaaq, angut meeqqanik kinguaassiutitigut atornerluinermik assinik 835-nik tigummiaqartutut unnerluutigineqarpoq.
Tamanna unnerluussissummi KNR-ip takunnissinnaalerfigisaani allassimavoq.
Unnerluussissut naapertorlugu angut Sisimiuni najukkami oqarasuaammik angallattakkamik 2026-mi februaarip aappaanni nalunaaqutaq 11.28 tigummiaqarpoq. Oqarasuaat, unnerluussisussaatitaasut meeqqat assiinik pornoliatut isigisaannik katillugit 835-nik imaqarpoq.
Unnerluussissut naapertorlugu assit immikkoortunut pingasut immikkoorterneqarput:
- Kategori 1-imi assit 485-it.
- Kategori 2-mi assit 344-t.
- Kategori 3-mi assit 6-it.
Kategori 3 immikkoortuni sakkortunerpaavoq, taannalu meeqqanik kinguaassiutitigut atornerluinernik assinik sakkortuunik takutitsisunik ilaqarluni.
Unnerluussisussaatitaasut sivikinnerpaamik qaammatini pingasuni parnaarussanngortinneqarnissaa piumasaraat
Unnerluussisussaatitaasut unnerluussissut naapertorlugu 55-inik ukiullip sivikinnerpaamik qaammatinik pingasunik pineqaatissinneqarnissaa piumasaraat.
Eqqartuussivimmi suliaq Qeqqata Eqqartuussisoqarfiani novembarip 24-anni suliarineqassaaq.