Naalakkersuisut meeqqanut kinguaassiuutitigut atornerluineq akiorniarlugu suliniutit patajaallisaraat

Kinguaassiuutitigut atornerlunneqarsinnaanermut illersuiniarlutik, kinguaassiuutitigut ukiutigut akuerisap ammut killingat pillugu aalajangersakkat naammannersut nalilersuiffigineqarnissaat, Naalakkersuisut aallartippaat.

Allattoq Ivalu Nivi Johansen

novembarip 27-at 2025 11:23

Nutserisoq Karla Heilmann

Arnanut nakuusertarneq atorunnaarsinniarlugu Naalagaaffiit Peqatigiit nunat tamat akornanni ullorititaata kingorna, ukiukitsut kinguaassiuutitigut atornerlunneqarnissaannut illersorniarlugit, kinguaassiuutitigut ukiutigut akuerisap ammut killingat pillugu aalajangersakkat naammannersut nalilersuiffigineqarnissaat Naalakkersuisut aallartippaat.

Inuutissarsiornermut, Nukissiutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq Naaja Nathanielsen tusagassiuutinut nalunaarummi taama allappoq.

Inuiaqatigiinnitsinni arnarpassuit aamma arnat inuusuttut suli misigisartagaat, erseqqissumik akerleralugit aamma nakuusertarnernik tapersersunngilluinnarnertik, Naalakkersuisut malunnartitsipput. Utoqqaanerusut suli meeqqat atuarfianni atuartunik aappaqartarnerat pillugit suliat arlaqartut Naalakkersuisup malugai.

- Inuusuttut suli meeqqat atuarfianni atuartut pineqartillugit, ukiunik tallimanik ukioqatigiinngissuseq angivallaartoq amerlasuut isumaqartut isumaqarpunga, Naaja Nathanielsen tusagassiuutinut nalunaarummi oqaaseqarpoq.

Niviarsiaqqap 16-inik ukiullip aamma angutip 21-nik ukiullip imaluunniit 30-nik ukiullip akornanni, niviarsiaqqap inerisimassusaa imaluunniit angutip inerisimanngissusaa apeqqutaatinnagu, kinguaassiuutitigut ataqatigiinneq tassa naligiiffiusinnaanngitsoq isumaqarluni allaqqippoq.

- Assersuutigalugu inuusuttup 17-iliinissaa tikillugu, akuusut akornanni ukioqatigiinngissutsip qanoq nikingatiginerunissaa pillugu killiliinertut ittumik, immikkut ittumik illersuinissaq piffissanngortoq isumaqarpunga.

Nakuuserneq akuerineqarsinnaanngilaq

Nakuuserneq qanorluunniit ilusilik akuerineqarsinnaanngilaq timikkuuppat, tarnikkut imaluunniit digitaliusumik pigaluarpat apeqqutaanngilaq, Naaja Nathanielsen allappoq.

Sukannernerusumik inatsisiliornermi, grooming aamma sextortion siorna juulimi pinerluutinngortinneqartut, KNR-imittaaq allaaserineqarpoq.

Aamma atuarukIsumapiloqarluni tatiginnilersitsiniaaneq inerteqqutinngussasoq: Politiit atornerluisoqartinnagu iliuuseqarsinnaalissapput

NAALAKKERSUISUT GROOMINGIMIK SEXTORTIONIMILLU NASSUIAATAAT:

Grooming tassaavoq pisut inuup, pineqartumut kinguaassiuutitigut innarliinissaq siunertaralugu meeqqamik imaluunniit inuusuttumik tatigineqarnissaminik ineriartortitsinera, imaluunniit meeqqap inuusuttulluunniit tamataqarani assiminik imaluunniit assinik kinguaassiuutitigut iliuutsinik innarliinerusutut pissusilinnik nassitseqqullugu ussiinera.
Sextortion tassaavoq assersuutigalugu tamataqarani assit imaluunniit atortussat kinguaassiuutinut tunngassuteqartut allat siammarterneqarnissaanik qunusaarinikkut, kinguaassiuutitigut iliuutsit, pinerluttuliortup eqqunngitsuliorfigineqartumut pinngitsaaliilluni imminut iliuuserititai.

Kilde: https://naalakkersuisut.gl/Nyheder/2024/04/1604_seksuelle_overgreb?sc_lang=kl-GL

- Inuusuttut atoqateqartarnermik misissuisarnerisa killilerneqarnissaat anguniarneqanngilaq, kisianni inuusuttut mianerisariallit, inersimasunit silappaarinnerusumik iliuuseqartussaagaluanit atornerlunneqannginnissaasa qulakkeerneqarnissaat anguniarneqarpoq, Naaja Nathanielsen tusagassiuutinut nalunaarummi oqarpoq.

- Uanga isumaga isumaqatigineqarnersoq apeqqutaatinnagu, sammisaq oqallisigineqarumaartoq neriuppunga, tassami taassuma ilarujussua akisussaaffimmik misigisimanermik, ileqqorissaarnermik aamma isumassuinermik – aamma inatsisiliornerinnaanngitsumik, imaqarpoq.

Pinerlunnerit ikiliartorusaartut

Inatsisit nutaat atuutilerneriniit qanoq ineriartortoqarsimanersoq takuniarlugu, KNR-ip Kalaallit Nunaata Politiivisa 2024-mut ukiumoortumik nalunaarusiaa misissorpaat.

Nalunaarusiaq naapertorlugu, kinguaassiuutitigut pinerlunnerit nunatsinni politiinut nalunaarutigineqartut 2020-mi 748-upput.

Nuna tamakkerlugu kinguaassiuutitigut pinerlunnerit pillugit suliat 609-t 2024-mi nalunaarutigineqarsimasut kisitsisit kingulliit takutippaat.

Kinguaassiuutitigut pinerlunnerit nalunaarutigineqartut suliat, ukiut tallimat ingerlanerini 18,6 procentimik ikileriaateqarput.

Kalaallit Nunaata Politiivisa nalunaarusiaanni kinguaassiuutitigut pinerluutit assigiinngitsut tallimat katiterpaat.

Kannguttaatsuliorneq pinerluutaavoq, meeqqanut 15-it inorlugit ukiulinnut kinguaassiuutitigut iliuutsinik kanngunartuliornernik assigiinngitsorpassuarnik imaqartoq. Kinguaassiuutitigut pinerlunneq 2024-mi kisitsisini qaffasinnerpaalluni pinerluutini annerpaavoq. Kinguaassiuutitigummi pinerlunnerit siorna 44 procentiupput.

Pinngitsaaliilluni kujanninneq tassunga tulliuvoq, taamatullu amerlaqatingajaanik pinerlisoqarpoq, tassa taamatut pinerlunneq kinguaassiuutitigut pinerlunnermi 2024-mi 39 procentiuvoq.

Ineriartorneq ataatsimut isigalugu, kinguaassiuutitigut pinerliinermi nalunaarutigineqartartut amerlassusaat ikiliartorput.

Naak kinguaassiuutitigut pinerliinermi nalunaarutiginninnerit ikiliartortutut kisitsisit takutikkaluaraat, inatsisit inuusuttumut naammattumik qanoq illersorneqarsinnaatiginera aamma inatsisitigut suliniutit nutaat qanoq assingusumik kisitsisaat ineriartornersoq apeqquserneqaqqippoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.