Naalakkersuisut inatsiseqartitsineq akisussaaffigilerniaraat – immikkut paasisimasallit aqqutissiuissasut

Naalakkersuisut inatsiseqartitsinerup tiguneqarnissaa pillugu ingerlatsinermik aallartitsiniarlugit aalajangerput.

Aalajangiineq 'politikkikkut taperserneqangaatsiartoq' Meeqqanut, Inuusuttunut Inatsisinut Atuutsinneqarnerannut Naligiissitaanermullu Naalakkersuisoqarfik tusagassiuutinut nalunaarummi paasissutissiivoq, nunattalu pinerluttuliornermut inatsisiliortarneq siunissami nammineq akisussaaffigilissallugu.

- Inatsisiliornerput aamma periaaseq taanna, uagut inuiaqatigiittut inunnik pinerluttuliortunik isumaginninnitsinni atugarput, naleqartitatsinnik aamma ileqqutsinnik, nunatsinni sunniisunik aamma pigineqartunik, aamma pisariaqartitanik, uagut inuiaqatigiinnitsinni ilutsip pilersitaanik, tamatigut aallaaveqassaaq, inatsisit atuutsinneqarnerannut naalakkersuisoq, Mariane Paviasen Jensen oqarpoq.

Immikkut ilisimasallit akisussaaffiginnilernissamut tunngaviliisussat alloriarnermi siullermi pilersinneqarput.

Eqimattap pinerluttuliornermi inatsit atuuttoq qanoq nutarterneqarsinnaanersoq nunatsinnilu pissutsinut qanoq naleqqussarneqarsinnaanersoq ilaatigut nalilissavaa.

Naalakkersuisut tamatuma peqatigisaanik naalagaaffimmi oqartussaasunut pisortatigoortumik isumaqatiginninniarnerit aallartinniarpaat.

Folketingip pineqaatissiinermut kinguneqartitsinermullu inatsisit ullumikkut akuersissutigisarpaat. Politiit, eqqartuussiveqarfiit, pinerluttunik isumaginnittoqarfik matumanilu parnaarussiviit danskit akisussaaffiisa ataanniipput.

Pineqaatissiinerit sukannernerutikkusukkaat

Naalakkersuisut eqqartuussiveqarfiit kinguneqartitsinermik naliliisarnerannik aamma allannguerusupput.

Eqqartuussiveqarfiit pinerluuteqarnerup peqqarniissusaanut pinerluuteqartumullu naleqquttoq malillugit pineqaatissiissut piumasaminik toqqarsinnaavaa.

Naalakkersuisut pillaatissiinermi killiliussat malillugit  pinerluttuliornerit aalajangersimasut eqqartuussutigineqarsinnaanissaat maanna misissuiffiginiarpaat.

Tamanna inunnut navianaatilimmik pinerluttuliornernut pingaartumik kinguaassiuutitigut pinerluttuliornernut aamma meeqqanut pinerluttuliornernut tunnganeruvoq.

Naalakkersuisut oqarnerat naapertorlugu pillaatissiinermi killiliussat aamma pillaatissiineq pillugu aaqqissuusseqqinnerit pillugit ukiuni kingullerni oqallinneq suliaqarnermi tunngavigineqassapput.

Nunatsinni pissutsit inatsiseqartitsinermi aallaavigineqassasut

Inatsisit atuutsinneqarnerannut naalakkersuisup, Mariane Paviasen Jensenip pinerluttulerineq pillugu inatsisiliorneq paasiuminartoq aamma ullutsinnut naleqqunnerusoq akisussaaffiginnilernermi qulakkeerneqassasoq tusagassiuutinut nalunaarummi oqaatigaa.

Taannalu inuiaqatigiit inatsisitigut naapertuilluartoqarneranik misigisimanerata aamma kinguneqartitsissutit eqqartuussutigineqartut akornanni ataqatigiilluartoqassasoq isumaqarpoq.

Naalakkersuisup oqarnera naapertorlugu akisussaaffeqalerneq nunatta ingerlaavartumik ineriartornissaanut inatsiseqarnermillu naleqqussaanissamut periarfissaqarnerulersitsissaaq, taamaalilluni inatsisitigut isumannaatsuuneq aamma innuttaasut eqqartuussiveqarnermut tatiginninnerat nukittorsarneqassallutik.

Immikkut ilisimasallit eqimattat suliaqarnerat qaqugu naammassineqassangatinneqarnersoq tusagassiuutinut nalunaarummi allassimanngilaq.