Naalakkersuisup Qeqertarsuarmi qamuteralannik ajutoorneq qisuariarfigigaa
Qeqertarsuarmiut nukappissat marluk qamuteralannik ajutoorsimasut illoqarfimmut utertinneqarneranni napparsimmaviup ammannginnera isornartorsioraat KNR-ip sapaatip akunnerani matumani siusinnerusukkut ilanngutassiaraa.
Nukappissat ajoqusersimasut qerussorsimasullu silami utaqqisariaqarsimapput; tamanna naak politiit ilisimatinneqareeraluartut pivoq.
Peqqissutsimut Inunnullu Innarluutilinnut Naalakkersuisup, Anna Wangenheimip (D) naalakkersuisoqarfimmi susoqarneranik nalunaajaanissaa utaqqeqqaarlugu oqaaseqarniarluni pisup nalaani oqarpoq.
Nalunaajaanerlu maanna piareermat ajutoortoqarneranik qanoq isiginninni qanorlu maannangaaq iliuuseqarniarnini oqaatigaa.
Ullormi tassani pisut
Peqqissutsimut Inunnullu Innarluutilinnut Naalakkersuisoqarfik suliamik misissuereerluni KNR-imut ima allappoq:
- Peqqinnissaqarfik ujaasisoqarnera, qamuteralannik ajutoortoqarsimanera imaluunniit ajutoorsimasunik Qeqertarsuarmi napparsimmavimmukaassiartortoqarnera pillugit attavigineqarsimananilu ilisimatinneqarsimanngilaq, taakku allapput.
Unnukkoortoq 23.45 soraarami ajutoortoqarsimaneranik nalunaarutiginnittoqarsimanngilaq.
Naalakkersuisoqarfilli arnaq tupaqqasoq februaarip aallaqqaataata aappaatalu akornanni unnuami pigaartumut nalunaaqutaq 00.05 sianersimanerarpaa.
- Taassuma peqqinnissaqarfiup saani inunnik qerussorsimasunik uninngasoqartoq paasissutissiissutigaa. Qamuteralannik ajutoortoqarsimanera eqqaaneqanngilaq, naalakkersuisoqarfik allappoq.
Tamatuma kingorna 'sulisut erngertumik qisuariaateqarput, peqqissutsimillu suliaqartoq siulleq saaffiginnittoqaqqaarneranit minutsit sisamat missaat qaangiuttut apuuppoq'.
- Taassuma matu erngertumik ammarpaa, ajoqusersimasullu isersinnaallutik. Sulisut arlallit kingunitsianngua aggersarneqarput erngertumillu apuullutik.
Attaveqatigiinneq pitsaanerusoq
Kalaallit Nunaanni Politiit nukappissat marluk tammaaneqarnerat pillugu nalunaaqutaq 22.40 nalunaaruteqarfigineqarsimallutik KNR-imut pisup aqaguani paasissutissiissutigaat.
Naalakkersuisoqarfiup politiit nakorsamut nalunaaqutaq 00.12 sianersimasut paasissutissiissutigaa: - politiilli qerussortoqarsimaneranik taamaallaat nalunaarutiginnipput, ajutoornerlu nalunaarutiginagu, taakku allapput.
- Tassa peqqinnissamik suliaqartut qamuteralannik ajutoortoqarsimaneranik imaluunniit ilungersunartumik ajoqusertoqarsimaneranik ilisimatinneqarsimanngillat. Sulisut qerussorsimasunik suliaqarnissartik naatsorsuutigisimavaat, nukappissanillu aqqunartitingaatsiarsimasunik marlunnik suliaqarnissaq kimilluunniit piareersimaffigineqarsimanani.
Anna Wangenheimip pisoq ilungersunarluinnartuusoq innuttaasullu ernumassuteqarnerat paasisinnaalluarlugu allakkatigut akissummi oqaatigaa.
Taamaammat oqartussat akornanni attaveqatigiinnerup pitsanngorsarneqarnissaa kissaatigaa.
- Pinasuartumik pisoqarnerani attaveqatigiinnermi aqqutit upalungaarsimasunit misissoqqinneqarnissaat kaammattuutiginiarpara, taamaaliornikkut assingusumik pisoqaqqissanani, Anna Wangenheim oqarpoq.
Sumiiffimmi isumaqatigiissut
Anna Wangenheimip innuttaasut peqqinnissaqarfimmut aamma Qeqertarsuarmi pigaartumut attaveqarsinnaajuaannartut erseqqissaatigaa.
Tamatuma saniatigut suleqatigiinnermi pitsanngorsaasoqartariaqartoq nassuerutigaa.
- Qeqertarsuarmi innuttaasunik ataatsimiititsinitsinni kingullermi suliassaqarfiit akimorlugit suleqatigiinnermi pitsanngorsaasoqarnissaa pisariaqartinneqartoq aamma nunap immikkoortuisa illoqarfiinut sukkasuumik assartuinissamut periarfissat amigaataanerat toqqissisimanngitsoqarneranut pissutaasoq ersersinneqarpoq.
Taamaammat taassuma naalakkersuisullu sumiiffimmi isumaqatigiissut nutaaq misissorniarpaat.
- Naalakkersuisut Qeqertarsuarmi suleqatigiinnissamut isumaqatigiissut nutaaq pitsaanerusorlu ujartorusuppaat, taamaaliornikkut suliamik ilisimasaqartut innuttaasullu ulloq unnuarlu toqqissisimanissamut misiginissaat pitsanngorsarneqassalluni.
Peqqissutsimut Inunnullu Innarluutilinnut Naalakkersuisoqarfiup allakkatigut akissuteqarnermini naalakkersuisut peqqinnissaq pillugu isumaqatigiissut annertusisaq pillugu partiit suli oqaloqatigigaat paasissutissiissutigaa.
- Suliaqarneq taanna innuttaasunut iluaqutaasumik, peqqinnissamut tunngatillugu suliat pitsaanerusumik sinaakkuteqalersinneqarnissaannik siunertaqarpoq, taakku allapput.
