Nalaakkersuisup Qeqertarsuup peqqissaaviani peqqissaasut ataatsimeeqatigigai
Qeqertarsuami peqqinnissaqarfiup siunissami sisamanut matusarnissaa, Kalaallit Nunaanni Peqqinnissaqarfimmit sapaatip-akunnerata aallartinnerani aalajangerneqarpoq, tamannalu arlalitsigut isornartorsiorneqangaatsiarpoq.
Taammaammat Peqqissutsimut inunnullu Innarluutilinnut Naalakkersuisoq, Anna Wangenheimip Kommune Qeqertalimmi Borgmesteri Qeqertarsuarmilu peqqinnissaqarfimmi sulisut tallimanngornermi oqaloqatigalugit ataatsimeeqatigai.
Ulloq unnuarlu sulisoqarnissaanut pisariaqartitsisoqarpallaanngitsoq
Illoqarfimmi innuttaasunit peqqinnissamullu tunngasutigut sullissisunit ernumasunit saaffiginnissutit arlallit, inoqatinullu attaveqatigiittarfinni ikkussat tunngavigalugit ataatsimiittoqarpoq.
Taamak Peqqissutsimut inunnullu Innarluutilinnut Naalakkersuisoq tusagassiutinut nalunaarummi allappoq.
- Qeqertarsuarmi innuttaasut peqqinnissaqarfimmilu sulisut eqqissisimannginnerat ernumanerallu paasisinnaalluarpara, Anna Wangenheim oqaaseqaateqarpoq.
Napparsimasut isumannaatsuunerannik pitsanngorsaanissamut atatillugu
annikinnerusumik allannguuteqartoqarsimanera Peqqinnissaqarfiup qullersaqarfianit ilisimatitsissutigineqarpoq.
Pinasuartumik napparsimasut napparsimmavinnut annerusunut katsorsaanissaq eqqarsaatigalugu amerlanerusunik periarfissalimmut sukkanerusumik nuunneqartarnissaat qulakkeerniarlugu allannguinermi anguniarneqarpoq. Tamatumalu kingunerisaanik peqqissaavimmi ulloq unnuarlu sulisoqarnissaanut pisariaqartitsineq annikinnerulersimavoq.
Pinasuartumilli napparsimasunik unitsitsisoqarsimatillugu soorunami ulloq unnuarlu sulisoqartassaaq, soorlu aamma ambulancenik angallassisoqartassasoq.
Peqqinnissaq pillugu isumaqatigiissut annertusarniaraa
Anna Wangenheimi innuttaasut sumiluunniit najugaqaraluartut ajunnginnerpaamik katsorsarneqarsinnaanissaannut qulakkeereisussamik, peqqinnissaq pillugu isumaqatigiissummik annertusisamik isumaqatiginninniarnerit aallartisareersimallugit ilisimatitsivoq.
2023-mi peqqinnissaq pillugu isumaqatigiissut naapertorlugu pinasuartumik ilungersunartumillu napparsimasunik ullumikkut nuussisoqartarpoq.
Peqqinnissaq pillugu politikkikkut aqutsinermi qitiusumik immikkoortut assigiinngitsut isumaqatigiissummi isummerfigissagaat, tusagassiutinut nalunaarummi ilisimatitsivoq.
