Naaja H. Nathanielsenip EU-p ‘ikiuukkusuttorujussuunera’ malugigaa
Inuit Ataqatigiit sinnerlugit Folketingimut ilaasortaq Naaja H. Nathanielsen Belgiami illoqarfiit pingaarnersaanni Bruxellesimi Europæiske Unionimut tikeraaqqammerpoq.
naalakkersuisut politikkikkut sulinerat tapersersorniarlugu Kalaallit Nunaatalu iluaqutissaanik attaveqaqatigiinnerulernissaq siunertaralugu tamanna pivoq.
EU Kalaallit Nunaata suleqatigisartagaasa pingaarnersaasa ilagaat, Naaja H. Nathanielsen tusagassiuutinut nalunaarummi allappoq.
- EU-p Kalaallit Nunaannut aningaasaliissutigisartagaasa ukiuni tulliuttuni amerlinissaat naatsorsuutigineqarpoq, Kalaallit Nunaatalu Europami nunanut allanut sanilliunneqarsinnaannginnera EU-mi paasineqarnissaa uagutsinnut pingaaruteqarpoq. Nunatsinni najugaqarfiit eqqarsaatigineqarniassammata aningaasaliissutit nikerartuusinnaanissaat pisariaqartinneqarpoq, taanna oqarpoq.
Aammattaaq IA-mi politikeri nunanut allanut tunngasutigut ajornartorsiutit annerpaattut taasani pillugu Europami inatsisartuni ilaasortanut oqariartuuteqarpoq.
Tamanna Amerikamiut præsidentiata Kalaallit Nunaata USA-mut ilaasariaqarneranik oqariartuuteqaqattaarnera eqqarsaatigalugu paasineqassaaq.
- Inatsisartuni ilaasortanut aamma ataatsimiititaliarsuarmullu oqariartuutiga tassaavoq avataaneersunit tatineqarnissatsinnut akiuussinnaajumanerulluta tamat oqartussaaqataanerat ineriartortittariaqaripput. Tamanna kisimiilluta naammassinnaanngilarput, Naaja H. Nathanielsen tusagassiuutinut nalunaarummi oqarpoq nangillunilu:
- Inoqatinut attaveqaatit tatiginninngilersitsiniaanermut avissaartuutsitsiniaanermilu atorneqarsinnaaput, paasissutissanillu eqqunngitsunik siammartikkanik sunnersinnaalluta. EU-mi tamakkuninnga akiuiniarnermi misilittakkat paasisaqarfigisinnaavagut. Nunatsinnilu tusagassiuutit killilersugaannginnissaannut tapersersueqataasinnaappata pitsaasuussaaq.
Tusarnaarusuttut
Naaja H. Nathanielsenip Europami inatsisartuni gruppit De Grønne aamma Left in Europe tikeraarnermini ilaatigut naapippai.
Tamatuma saniatigut EU-mi kommissionip siulittaasuata Ursula von der Leyenip, nukissiornermut ineqarnermut kommissærip Dan Jørgensenip Europamilu inatsisartuni ilaasortat arlallit ataatsimiinnerinut peqataavoq.
- EU-mi oqartussaqarfiit assigiinngitsut nunatta oqaaseqarsinnaatitaaneranut tunngatillugu ikiuukkumanerat tusarnaarnissaminnillu piumassuseqarluarnerat malugaara. Tikeraarnera pissarsiffiulluaqaaq, Naaja H. NAthanielsen oqarpoq.
