Visit Greenland pisortartaartoq
Visit Greenlandimi qaammatini pingasuni pisortassarsiortoqarpoq.
Takornariaqarnermilli suliaqarfik ujaaserujussuartariaqanngilaq.
Linda Kleistimi Anne Nivíka Grødemip pisortaanertut soraarneraniilli pisortaagallartoq pisortanngorpoq.
Visit Greenland tusagassiuutinut nalunaarummi allappoq.
- Siulersuisut tatiginninnerat qujamasuutigisorujussuuara, suliassamullu maniguullunga, Linda Kleist tusagassiuutinut nalunaarummi oqarpoq.
Linda Klesit Visit Greenlandimi 2023-mili atorfinippoq, taassuma sumiiffiit takornariarfiusut ineriartortinneqarnissaat aamma takornariaqarnermut siunnersuisunik suleqateqarneq ilaatigut suliaqarfigisimavai.
- Ingerlatseqatigiiffik ilisimaarilluarpaa, najukkami nunalu tamakkerlugu takornariaqarnikkut ineriartortitsinermik patajaatsunik misilittagaqarpoq, periusissiallu suleriusinngortissinnaaneri ingerlariutsinilu pisariusuni siuariartortitsisinnaassutsi takutissimallugu, Visit Greenlandimi siulersuisut siulittaasuat, Anette G. Lings oqarpoq.
Akisussaassuseqartumik takornariaqarnikkut ineriartortitsineq
Visit Greenlandip pisortaasimasoq, Anne Nivíka Grødem ukiuni sisamani pisortaareerluni soraartoq marsip aallartinnerani saqqummiuppaa.
Visit Greenlandip Linda Kleistimik toqqaanermini 2035-ip tungaanut siumut isigisumik aqutsisoqarnissaanik ataavartumik, patajaatsumik ersarissumillu siunnerfeqartumik qulakkeerinissi pingaartippaa.
Nunatta takornariarfissatut ineriartortinneqarnissaanut aamma takornariaqarnermi nunavissunut naleqalersitsiviusumik akisussaassuseqartumik ineriartortitsinissamut tunngassuteqarpoq.
- Periusissiornikkut ataatsimut isiginnissinnaaneq, niuernikkut ingerlatsinermik paasisimasaqarneq aammalu sumiiffiit takornariarfiusuni, suliffeqarfiit nunallu tamalaat akimorlugit sanngisuumik suleqatigiissinnaanermik piginnaasaqarneq tamatumani pisariaqarpoq. Lindap tamakku pisinnaasaqarfigai, Anette G. Lings oqarpoq.
Linda Kleistip takornariat nunatsinnik soqutiginnittut ataqqinnittullu pilerinarsaaffiginissaat pingaartuutippaa.
- Uannut akisussaassuseqartumik takornariaqarnikkut ineriartortitsineq aamma tassaavoq takornariaqarnikkut inuussutissarsiuteqarnermik pilerinartunngorsaaneq aammalu Kalaallit Nunaata najugarinissaata takornariarnissaatalu pitsaasuunissaanik ineriartortitsineq, Linda Kleist oqarpoq
Nunanit tamalaanit soqutiginninneq
Pisortaajunnaartup Linda Kleisti LinkedIn-ikkut innersuussutigalugu aamma allaaseraa.
- Periusissiatigut suliatigullu piginnaasaqarluarpoq, aamma eqqissisimasumik, ataatsimut isiginniffiusumik nunaqavissunik piviusumik naleqalersitsisunik maluginnissinnaalluarpoq, Anne Nivíka Grødem oqarpoq.
Nunatta nunat tamalaat akornanni soqutigineqaleraluttuinnarfigisaani takornariaqarnermi nunaqavissunik naleqalersitsinissaq sammineqangaatsiarpoq.
Takornariaqarnerullu ineriartortinneqarnerani ersarissunik pingaarnersiuisinnaasumik pisortaqarnissaq pisariaqarpoq.
- Ingerlatseqatigiiffiup nuna tamakkerlugu atuuffiani siuttuusinnaasumik ilutigitillugulu Kalaallit Nunaata nunat tamalaat akornanni inissisimaneranik nukittorsaasinnaasumik Visit Greenlandip pisortaqarnissaa pisariaqartippaa, Anette G. Lings oqarpoq.
