Nunanut allanut naalakkersuisoq, Múte B. Egede (IA) timmisartumik angalalluni ingerlaqqinnginnermini, KNR TV-kkut pulaartorineqarpoq.

- Isumaqatigiissummi uagut tungitsinnit aallaqqaammulli anguniagarput erserpoq; Kalaallit Nunaata inissisimaffiata akuerineqarnissaa, Múte B. Egede oqarpoq.

- Kalaallit Nunaata nammineq aalajangiisinnaassuseqarnerata akuerineqarnissaa kalaallit inuit nunat tamalaat akornanni inatsit naapertorlugit pisinnaatitaaffiisa akuerineqarnissaat.

Taanna innuttaasunut maanna qanoq oqariartuuteqarusunnersoq aperineqarami nunatta killiliussaa qaangerneqanngitsoq naalakkersuisup akissutigaa.

- Aallaqqaataaniilli tunngavigisarput tassaavoq inissisimaffitta akuerineqarnissaanut killiliussaqaratta, kisianni aallaqqaataaniilli illersornissamut ilaatigut USA-mik nunallu killiini iligisanik suleqateqarnerulernissamut piareersimalluta oqaatigiuartarparput.

- Isumaqatigiissutissatut missiliussami taanna maanna erserpoq.

Assi © : Markus Valentin / KNR

Sakkutooqarnikkut najuunnermut sulineq nutaaq

Amerikamiut illersornissamut ministeriata, Pete Hegsethip USA-p sakkutooqarnikkut Kalaallit Nunaanni najuunnerulernissaanut suliaq erngertumik aallartinneqassasoq inoqatinut attaveqaatikkut X-ikkut tallimanngornermi unnukkut allappaa.

- Kalaallit Nunaata ilaani sakkutooqarnikkut najuuttoqarnerulernissaanut suliaq erngertumik aallartissavarput, Pete Hegseth allappoq.

Múte B. Egedep isumaqatigiissutip imarisaa oqaaseqarfiginianngilaa. Taassumalu Amerikamiut illersornissamut ministereqarfimmit nalunaarut toqqaannartumik oqaaseqarfiginiarnagu.

Taamaakkaluartorli USA-p Danmarkillu illersornissamut isumaqatigiissutaat 1951-imeersoq atuuttuaannartoq oqaatigaa.

- Taanna USA-p Kalaallit Nunaanni sakkutooqarfeqarnissaanut periarfissaqartitsivoq.

- Nunatta tungaaniit isumaqatigiissummi sunniuteqarnissarput isumaqatigiissummilu tamarmi naligiimmik peqataalernissarput anguniarsimavarput.

Naalakkersuisup isumaqatigiissut nunatta tungaanit kisiat nuannaarutiginngilaa, nunanili killerni  tamani iligisat tamarmik sinnerlugit nuannaarutigalugu.

- Nunarsuarmi eqqissiviilliorfiugaluttuinnartumi nunat killiini tamani Issittumi Amerikallu avannaani ullumikkut nukittunerulertoqarpoq.

Assi © : Markus Valentin / KNR

Trumpip nunatsinnik tiguaanissamik siorasaaruteqarnikuunera ilisimavarput, isumaqatigiissutigineqartussat toqqissisimaffigisinnaavarput?

- Amerikamiut præsidentiata unnuk manna nammineerluni aamma oqariartuutigaa isumaqatigiissuteqaraluttualertugut. Tassa imaappoq illuatungeriit isumaqatigiissummut atsiornissamut piareersimapput. Isumaqarpugut naalakkersuisuninngaanniit isumalluarfissaqartugut.

- Ukiut kingulliit marlungajaat imaannaannginnikooqaat kalaallinut, nalaatarpassuaqarpugut. Aammalu nunatsinni iluamut nunaqaannarsinnaanermik nalornineq inuppassuarnit aamma pigineqarnikuuvoq. Siunissarput qanoq ittuujumaarnersoq toqqammaviit taakkua nalorniffigalugit inissisimaffigisarnikuuagut. 

- Taakkualu nalorninarunnaarsissallugit maani nunami uagut tummiuarsinnaanissatsinnut toqqammavissat ujartorneqarnissaat soorunami isumaqatigiinniartitagut aqqutigalugit ilungersornikuuvugut. Massakkullu isumaqarpugut taakkua tamarmik toqqammaviit pigineqarlutik akunnitsinni isumaqatigiissuteqartoqarsinnaanngortoq, Múte B. Egede KNR-imit apersorneqarnermini oqarpoq.

Maannakkut susoqarnissaa

Isumaqatigiissut nunatsinnit, Danmarkimit USA-miillu atsiorneqaqqaassaaq. Tamatuma kingorna poltikkikkut suliaqarneq aallartissasoq, Múte B. Egede oqarpoq.

- Isumaqatigiissutissamut missingiut illuatungeriit akornanni atsiorneqassaaq. Suliaqarnermi naammassineqartussani taanna siulliuvoq.

- Tassanngaanniit tullianut ingerlaqqissaagut. Nunat akornanni naalakkersuisut isumaqatigiissutigimmassuk inatsisartunukaanneqassaaq, suliaqarneq aallartinneqassaaq, atsiortoqariarpat uagut inatsisartutsinnukaatissavarput.

- Taamaammat assigiinngitsorpassuit suliarineqassapput.