Danmark, USA Kalaallit Nunaallu Kalaallit Nunaannut tunngatillugu isumaqatigiissummik, USA-mut sillimaniarnermik aqutsisuulersitsisumik isumaqatigiissuteqartut Donald Trump Truth Socialikkut allappoq:

- USA-p Kunngeqarfik Danmark Kalaallit Nunaallu USA-p sillimaniarnermut ataavartumik aqutsisuulernissaanik isumaqatigiissuteqarfigigai nuannaarutigalugu nalunaarutigisinnaavara, præsident allappoq.

Nunanut allanut naalakkersuisoq, Múte B. Egede suliaq pillugu Facebookikkut unnummut ima allappoq:

Múte B. Egedep aaqqiissut illuatungeriinnut tamanut pitsaasuusoq ilaatigut allappaa.

Ministeriunerup isumaqatigiissut sapaatip akunnerata tulliani atsiorneqartussatut naatsorsuutigineqartoq uppernarsaraa, TV2 allappoq.

- Kalaallit Nunaata, Danmarkip USA-llu isumaqatigiissut, Issittumi nunanilu avannarlernermi sillimaniarnermut pitsanngorsaataasussaq sapaatip akunnerani aggersumi atsiussagaat naatsorsuutigineqarpoq, Ministeriuneqarfimmit tusagassiuutinut nalunaarummi allassimavoq

- Nuannaarutigaara Kalaallit Nunaata, Kunngeqarfik Danmarkip USA-llu 
isumaqatigiissuteqarluarnissaat anguneqalermat. Isumaqatigiissutip issittumi atlantikullu avannaani sillimaniarneq qulakkeerpaa aammalu 
Kunngeqarfiup killeqarfiinik kiffaanngissusianillu ataqqinnittoq aammalu kalaallit inuiattut
namminiussuseqarnerannik naqissusiisoq, naalakkersuisut siulittaasuat peqatigalugu tusagassiuutinut nalunaarummi oqarpoq. 

Amerikamiut præsidentiata Donald Trumpip nunatsinnik sillimaniarnermut tunngatillugu aqutserusulluni oqariartuuteqartarnerata kingorna, januaarimiilli isumaqatigiissusiortoqarpoq. 

Naalagaat Peqatigiit sapaatip akunnerata tulliani tikeraassagai

Nunanut allanut naalakkersuisoq, Múte B. Egede (IA) septembarip 22-anni New Yorkiliassasoq, Naalakkersuisut ullumi siusinnerusukkut uppernarsarpaat.

Múte B. Egede Naalagaaffiit Peqatigiit ukiumoortumik ataatsimeersuarneranni peqataassaaq.

Taassuma tassunga atatillugu Kalaallit Nunaata siunissaa pillugu USA-mut isumaqatigiissutit saqqummiunneqaqqammersoq atsiussaneraa suli ilisimaneqanngilaq.

Jens-Frederik Nielsenip USA-p siunissami nunatsinniilernissaanut isumaqatigiissut namminiussuseqarnermik ataqqinniffiusoq Facebookikkut allappaa.

- Isumaqatigiissummik atsiorsinnaaleratta nunarput sinnerlugu nuannaarpunga. Isumaqatigiissut tamatsinnut iluaqutaassaaq, isumannaallisaaneq illersornissarlu eqqarsaatigalugu – kiisalu aamma nunatta ineriartortuarneranut atatillugu.

. Isumaqatigiissutip issittumi atlantikullu avannaani sillimaniarneq qulakkeerpaa aammalu Kunngeqarfiup killeqarfiinik kiffaanngissusianillu ataqqinnittoq aammalu kalaallit inuiattut namminiussuseqarnerannik naqissusiisoq.

Naalakkersuisut siulittaasoqarfiata isumaqatigiissut sapaatip akunnerata tulliani atsiorneqarnissaa naatsorsuutigineqartoq uppernarsarpaa.

- Kalaallit Nunaat, Danmark aamma USA sap. ak. tulliuttumi isumaqatigiissummik atsioqatigiissinnaanerat naatsorsuutigineqarpoq, naalakkersuisoqarfik tusagassiuutinut nalunaarummi allappoq.

- Isumaqatigiissuteqalernerput nuannaarutissaavoq. Nunatsinni, Kunngeqarfiup Danmarkip, USA-p kiisalu Nunani killerni illersoqatigiinni isumannaallisaaneq nukitsorsarneqassaaq. Isumaqatigiissutip nunatta soqutigisaanik akuersineruvoq nunallu tamalaat akornanni nunatta pingaaruteqarneranik takussutissiilluni. Tamatsinnut iluaqutaassaaq, Jens-Frederik Nielsen tusagassiuutinut nalunaarummi allappoq.

Naalakkersuisut tusagassiuutinut nalunaarummi 'Issittumi nunanilu avannarlerni isumannaannerulernissamut isumaqatigiissut naatsorsuutigineqartumik' taagorpaat. 

Allamik oqaasissaqanngitsut

KNR-ip naalakkersuisut siulittaasuat Jens-Frederik Nielsen attaveqarfigisimangaluarpaat, oqaaseqarusussimanngilarli tusagassiuutinullu nalunaarummut innersuussilluni. 

Nunanut allanut naalakkersuisoq Múte B. Egede KNR toqqaannartumik aallakaatitsinerani apersorneqassaaq. KNR 1-ikkut malinnaaffigineqarsinnaavoq. 

- Ukiut marlungajaat imaannannginnikooqaat. Nalaatarpassuaqarpugut nunatsinnik nunaqaannarsinnaanermik nalornineq atorneqarnikuuvoq. 

- Taamannallu nalorniunnaarnissarput anguniarlugu toqqammavissaqartariaqarpugut. 

- Isumaqarpugut taakku toqqammaviit tamarmik pigineqarlutik akunnitsinni isumaqatigiissuteqartoqarsinnaanngortoq, Múte B. Egede oqarpoq.

Tassa siornatigut Trump nunarput tiguarniarlugu siorasaarereernikuusoq tamatta nalugunanngilarput, unami isumaqatigiissutissaq suli atsiorneqanngitsoq pillugu toqqissisimassaagut?

- Massakkut ilaatigut unnuk manna Trumpip nammineerluni oqariartuutigaa isumaqatigiissuteqaraluttualertugut. Tamanna isumaqarpoq illuatungeriit isumaqatigiissummik atsioqatigiinnissamut piareersimasut. Naalakkersuisuninngaanniit isumalluarfissaqarluta isumaqarpugut. 

-  Ukiut kingulliit marlungajaat imaannaannginnikooqaat inuiaat kalaallinut.Nunatsinnik nunaqaannarsinnaanermik nalornineq inuppassuarnit pigineqarnikuuvoq. Siunissarput qanoq ittuujumaarnersoq toqqammaviit taakkua nalorniffigalugit inissisimaffigisarnikuuagut. 

- Taakkualu nalorninarunnaartissallugit maani nunami uagut tummiuarsinnaanissatsinnut toqqammavissat ujartorneqarnissaat soorunami isumaqatigiinniartitagut aqqutigalugit ilungersornikuuvugut massakkullu isumaqarpugut taakkua tamarmik toqqammaviit pigineqarlutik akunnitsinni isumaqatigiissuteqartoqarsinnaanngortoq, Múte B. Egede KNR-imit apersorneqarami akivoq.