Sulinermi atukkat pitsaanngitsut, sulinermi atukkatigut ilungersuaneq akissaatikinnerlu ilungersunartutut IMAK-ip siulittaasuata Elna Heilmannip 2025-mi ukiortaami oqaaseqaammini taasaata ilaminiinnarai.

- Suliassaqarpallaaqaaq, assaallu taakkuninnga kivitsisinnaasut ikippallaarlutik. Ilinniartitsisussaalatsineruleraluttuinnarpugut, ingammik sineriammi, Elna Heilmann oqarpoq.

Ilinniartitsisussaalatsineq pissutigalugu atuarfiit ikiortaalluni ilinniartitsisussanik paarlattaasussanillu atorfinitsitsiortornerusariaqaleraluttuinnarput. Tamanna aaqqiissutissaqqinngitsoq, Elna Heilmann oqarpoq.

- Ilinniartitsisuusut ilinniarsimasuunngikkaangata atuartitsinerit pitsaassusaat appartarpoq. Ilinniarsimasuunngitsut ilinniarsimasutulli atuartitsinermut najoqqutassaqarnatillu tunuliaqutaqartiginngillat. Naak pikkorissunik paarlattaasartoqaraluarluta ikiortaallunilu ilinniartitsisoqaraluarluta, taakkua suliatigut tunuliaqutaat allaanerussuteqarput, taanna oqarpoq. 

Assi © : Privat

Aaqqiigallarnerit ajornartoortoqartillugulu iliuuseqalertornerit

Ilungersunartutut taasat Tasiilami Alivarpiup pisortaanut tullersortip Josephine Dam Carlsenip ilisarai.

- Ajornartorsiutit ilarpassui ajoraluartumik ilisaraakka. Suliassaqarfiit ilaanni pitsanngoriartoqartarpoq, ilarpassuinili suli ernumanartoqarpoq, taanna oqarpoq.

Ingammik isorliunerusuni ilinniartitsisussaalatsisoqaqaaq. Sumiiffinni taakkunani atuartitsinerit ataavartuutinniarneqartarput, atuartitsissutini tamalaani annertoqqutaasariaqartartussanik ikiortaalluni ilinniartitsisoqarnikkut paarlattaasartoqarnikkullu, naammassisassarpassuaqartunik pisariaqartitsiviunerpaasunillu naammassinnigasuaasartunik.

Ilinniartitsisussaalatsineq ulluinnaat alaakkaasuunissaannik, ingammik napparsimallutik sulinngitsuukulasoqaraangat, qularnaarinninniapiloorfiusartut, Josephine Dam Carlsen oqarpoq.  

- Napparsimallutik sulinngitsuukulasoqartarnera ajornartorsiorneruleqqeriartitsisarpoq. Sulisut taamaalillutik sulerulunneruleqqeriaannartarput, taanna oqarpoq.

Taamaammat ilinniartitsisut piffissaq atuartitsinermut atugassaraluartik ajornartoortoqartillugu iliuuseqalertornermut atoriaqalersaraat, Elna Heilmann oqarpoq.

- Ilinniartitsisut sulerulupput, sulili ingallutik sulerulunneruleriartorput. Ilaasortavut ikioqqupput. Ilinniartitsisussaqarniarneq kipiluttunarsigaluttuinnarpoq, tamannalu ilinniartitsisooreersut sulerulunneroriaannarnerannik kinguneqarpoq. Taamaanneralu meeqqat tassa eqqorneqaatigaat, taanna oqarpoq.

Assi © : Privat

Tusaajumaneqanngilagut

Meeqqat atuarfianni ilungersunartut ukiorpassuanngortuni atuuttut ilungersunarneruleriartuinnartullu, Elna Heilmann erseqqissaavoq. Ajornartorsiutit taakkua kingullermik qineqqusaartoqarneranisulli oqallisaaqqipput.

Elna Heilmannip tusaajumaneqannginnertik qatsuppaa.

- Politikerimmi qasseeriaqaluta anngussivigaavut. Peqataatinnatali aalajangiisarput. Ilinniartitsisunik peqataatitsisannginnerat inissaminiinngilaq, taanna oqarpoq nangillunilu:

- Meeqqat atuarfiat ilinniartitsisunillu atorfinitsitsiortornissaq politikkikkut salliunneqanngippallaarput, naak tamatumani pissutsit ilungersunaraluartut. Utaqqiinnarsinnaajunnaarpugut, massakkoqqissaaq iliuuseqartoqartariaqarpoq.