Utoqqaat illuanni ajornartorsiorneq: Kujallermi borgmesteri allamiunik sulisussarsiorniartoq

Qaqortumi utoqqaat sulisussaaleqisoqartarneq peqqutigalugu tamakkiisumik isumassorneqanngitsoortarput. Malene Vahl Rasmussenip (D) ajornartorsiummut aaqqiissutitut allamiunik sulisussarsiortoqassanersoq maanna eqqarsaatersuutigivaa.
Malene Vahl Rasmussenip (D) Qaqortumi utoqqaat illuanni massakkut inissisimaffik ajusaarnarivaa. Ajornartorsiornerup qanoq aaqqiivigineqarnissaa massakkut nalilersussavaa. Assi © : KNR
Allattoq Jørgen Semionsen, Birgitte Kjeldsen
aggustip 15-at 2025 14:03
Share to Facebook Share to Twitter Copy link Print
Nutserisoq Connie Fontain

- Uffaanngitsoornerit, tamakku utoqqaat ilaat oqarneratuut ataasiakkaat soorlu qaammat ataaseq marlulluunniit uffanngitsoorneqarsinnaasarput.

Qaqortumi utoqqaat illuanni Ajarsivasimmi sulisutuanngortut ilaat, Ingeborg Jakobsen oqarpoq.

Ajarsivasimmi sulisussaaleqisoqangaarmat igaffimmi ilinniartut, eqqiaassut errorsisarfimmilu sulisut utoqqarnik isumaginnitsinneqartariaqartartut, taassuma KNR-imut sapaatip akunnerata siuliani oqaatigaa.

Kommune Kujallermi borgmesterip, Malene Vahl Rasmussenip (D) Ajarsivasimmi utoqqarnut 48-nut inissaqartinneqartunut sulisussarineqartut 17-iinnaapput. Sulisut 27-usussaagaluarput.

Avataanit tikisitanik sulisussaqartitsinikkut tamanna matussuserneqarsinnaagaluartoq, borgmesteri oqarpoq:

- Assaat kissalaartut sulisinnaasut taaku amigartuaanarnikuupput, aamma amigartuaanassapput ajoraluartumik. Taamaammat aamma nalilersueqqippugut massakkut, ilumut taakuinnaalluta suliaq naammassisinnaanerlugu, imaluunniit avataaniit tikisitsisariaqassanerluta.

Aaqqiissuteqarnissamut ulluliisoqanngitsoq

Utoqqarnik isumaginninnerup ajunngitsumik ingerlanissaa pingaarnerpaasoq Malene Vahl Rasmussenip erseqqissaatigaa. Sulisullu qanoq oqaaseqarnerat pingaannginnerulluni.

- Utoqqaat aamma nammineerlutik oqariartuutigaat soqutiginagu kalaaliuppat, qallunaajuppat, imaluunniit allamiuuppat. Paarineqarunik aamma isumagineqarunik naammagaat, borgmesteri KNR-imut oqarpoq.

Utoqqaat illuannili kisimi sulisussaaleqisoqanngilaq. Kommunimi tamarmi sulisussanik amigaateqartoqartoq, taanna oqarpoq.

- Aamma napparsimaveqarfimmi. Neriuppunga allanngortissinnaasallugu, aamma massakkut uku suliffiit inuttaqanngitsut inuttassarsiuunneqarnerat sakkortususisamik suliarissavagut, Malene Vahl Rasmussen oqarpoq.

Malene Vahl Rasmussenip utoqqaat illuanni pissutsit uggorai. Ajornartorsiutaasorli qaqugu aaqqiissuteqarfigineqassanersoq suli oqaatigisinnaanngilaa.

- Malunniutissai sunniutissaalu nalilersulaariarlugit aalajangerumaarpugut susoqassanersoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Eqikkaaneq: Erngup nukinganik atorluaaneq nunaniillu allanit suliartortut nunatsinniinnissaannik killilersuineq

Imigassat aalakoornartullit matuneqarmata utoqqaat illuanni sulisunik sulinngitsoortoqannginnerulertoq

Ullormut nalunaarut: Meeqqat kælkertut biilimit aportittut - ataaseq ajoqusingaatsiartoq

Løkke: EU-p Issittoq pillugu periusissiornera Europap sunniuteqarluarnerulernissaanut iluaqutaassaaq

Tikeraartut peqqinnissaqarfimmut millionilikkaanik aningaasartuutaasarnerat politikerinit aaqqiiviginiarneqarusuttoq

EU-p Issittoq pillugu periusissiariligaa: Immap naqqatigut kabelit, sikusiutit isumannaallisaanerlu