KNAPK: Qaleralittassat nungulernerat ernumanarpoq
Qeqertarsuup Tunuani umiatsiaaqqamik paggallutik qaleralinniarnissamut akuersissutaatillit 297-pput. Taakkua ukioq mannamut 1.060 tonsimik Naalakkersuisunit pisassinneqarput.
Aalisartulli paggattut ukiumut pisassaminnik nunguutsinissaat ernumagineqalerpoq.
Kalaallit Nunaanni Aalisarnemut Piniarnermullu Nakkutilliisoqarfiup nalunaarsugai naapertorlugit paggallutik aalisartut taakkua ukiumut pisassamik 81 procentia juunip 15-anni tunereerpaat.
KNAPK: Pisassaaruppata susoqassava?
Aalisartut qaleralittassaarukkunik sulerissanersut ernumanartoq KNAPK-p siulittaasua, Naalakkersuisunut juunip arfernanni allappoq.
- Paggatassiissutinik aalisarnermi pisassiissutit nunguppata taava susoqassava? Umiatsiaararsorlutik aalisartut pisassaarukkunik sulerissappat?
Nikkulaat Jeremiassen aalisarnermut naalakkersuisumut, Peter Borgimut taama aperaaq.
Pisassat nunguppata isumaginninnikkut ikiorsiisoqarani qaleralittassat ilaneqarnissaat kattuffiup kissaatigaa.
- Isumaginninnikkut ikiorsiineq pinnagu kisiannili qaleralittassanik pisassanik annertusaanikkut, KNAPK-ip siulittaasua kissaateqarpoq.
Kissaat akuerineqartoq
Aalisartut kattuffianni siulittaasup kissaataa Naalakkersuisut tusaatissatut tigullugu pisassanik ilasinissamik maanna suliaqarput. Tamanna aalisanermut naalakkersuisup, Demokraatineersup, Peter Borgip, KNAPK-mut juunip qulingani akissutaani allaqqavoq.
- Suliaq ingerlavoq sapinngisamillu piaarnerpaamik naammassineqassalluni, Peter Borg allappoq.
Taassuma akissutaani qaleralittassat qanoq oqimaatsigisumik qaqugulu ilaneqassanersut allaqqanngilaq.
KNR-ip aalisarnermut naalakkersuisoqarfik pisassat qaqugu ilaqqinneqassanersut ilassutillu qanoq oqimaatsigissanerannik apeqquteqarfigaa. Taakkuali suliap ingerlanerata naammassippallu avammut nalunaarutaajumaarnerata saniatigut oqaaseqarumanngillat.
Aalisarneq pillugu ataatsimiititaliarsuusimasup isumaliutissiissutaa naapertorlugu aalisartoq imminut ilaquttaminillu pilersuissaguni ukiumut oqinnerpaamik 33 tonsimik qaleralittussaavoq. Innersuusssut malinneqaraluarpat paggattuni maanna 297-suni 32-nnaat maanna aalisassagaluarput.
