Illersornissaqarfiup nunatsinni aasap ingerlanerani sakkussiornera sukkaannaq ineriartorpoq.

Nuummi, Sisimiuni Kangerlussuarmilu innutaasut pingaartumik qulimiguullit nutaat EH-101-it suliaqartut danskillu sakkutuuisa sumiiffimmi sungiusarnerat takullugillu tusareerpaat.

Naak naalakkersuisut namminneq nunanut allanut politikkiamut periusissiaanni ima allassimagaluartoq:

"Tunngaviusumik sakkutooqarfiit amerlanerusut piumanngilavut, sakkutuulersornerilli sakkussakillisaanermut aqqutaasariaqarput."

Innuttaasut aggersarneqartut

Issittumi Sakkutooqarfiup pisortaa, generalmajor, Søren Andersen sakkussiorneq pillugu innuttaasunut ataatsimiititsinissamut maanna qaaqqusivoq.

Tamanna Nuup Timersortarfiani sapaatiuppat nalunaaqutaq 15.00 pissaaq.

Ataatsimiinnermi Issittumi Sakkutooqarfik sakkutooqarnikkut pitsanngorsaanerup tunuliaqutaa pillugu saqqummiissaaq, suliassallu aggersut piffissalerneqarnerat saqqummiutissallugu.

- Nuummi innuttaasut ammasumik oqaloqatiginissaanni takunissat qilanaaraarput, Issittumi Sakkutooqarfik tusagassiuutinut nalunaarummi allappoq.