Taatsiannguaq Geisler Michelinimik ulloriannattoq

Taatsiannguaq suleqatinilu sinneri nersornaammik agguaasoqarneranik fjernsynikkut malinnaallutik neriniartarfimmi issiapput. Igaffiup pisortaa, Søren Birch aamma neriniartarfiup pisortaa, Jacob Urth nersornaasiinermut najuukkiartorlutik Sjællandiliarput. Alimentum innersuunneqarpoq, immikkoortunilu "Michelinimik ulloriaq siulleq" atuarneqarmat pissanganartorujussuanngorpoq.

- Ilimasuppugut. Nerisassat arlaleriarpassuariarluta misilittarnikuuarput, qulakkeersimallutalu misigisimalluta. Kisianni ilisimaneqartuaannanngilaq, Taatsiannguaq Geisler oqarpoq.

Sekundialuit minutsitut misiginarput. Alimentum immikkoortumi kingullermi eqqaaneqarmat tamanna eqqissiallaataallunilu nuannaarnermik pilersitsivoq.

- Pissarsiarigipput uanga siulliullunga tusarpara. Allalli qisuarianngillat. Taamaammat qulalerpunga. Oqarpulli Alimentum! Tamarmillu pillingaarsulerput. Uanga timera tamarmi najulerluni. Soorlu quinniit 50 kiilu iperarlugu, Taatsiannguaq Geisler oqarpoq.

Igaffik tunniutiinnarfiunanilu misileraaffiusoq

Alimentum kusanartunik neriniartarfiuvoq 26-t missaannut inissaqartitsisoq – neriniartullu tamarmik inniminniigaareertarput. Isiinnarluni neriartortoqarsinnaanngilaq, suullu tamarmik annikitsortai tamaasa ilanngullugit pilersaarusiugaallutik. Alimentum latinerit nerisassanut imaluunniit inuussutissamut oqaaseraat.

- Alimentumimi suut tamarmik nakkutigilluarpagut. Neriartortut kikkuuneri nalunngilagut, Taatsiannguaq Geisler oqarpoq.

<em>Alimentumimi nerisassat toqqagassat ukiup qanoq ilineranit inissitaasarput. Namminneq naatissinnaasatik kisiisa atortarpaat.</em> Assi © : Taatsiannguaq Geisler

Nerisassanut suunerinut allattukkat ukiup qanoq ilinerani naapertorlugu suliarineqartarput, nerisassiassallu ooqanngitsut ukkatarineqartarlutik.

- Nerisassiassat aalajangiisuusarput. Angakkuartoqarnanilu angakkuarniuteqanngilaq. Naatsiivimmit naatitat, uumasut ullualuit sioqqullugit pisarineqartut atorneqartarput. Aalisakkat unnukkut pisarineqartarput ullaakkullu akitsorterussinermi tunineqartarlutik, taanna oqarpoq.

Suleqatigiit arfineq marluusut tassaapput: igasoq, pisortap tullia, igaffimmi pisortaq, saqisutut ilinniartut marluk saqisutut ilinniarsimasoq ataaseq erruisorlu. Taakkulu tamarmik pimoorussilluinnartuupput.

- Allat tamarmik unitsillugit piffissaq sapinngisamik annertunerpaaq maani atorniarsaraarput. Kisianni Alimentumimi sulisut tamatta assigiippugut: ullut tamaasa 110 procentimik tunniusimalluta sulisarpugut, Taatsiannguaq Geisler oqarpoq.

Igasutut ilinniartumit ajugaasunngorneq

Taatsiannguaq Geisler 25-nik ukioqarpoq, taannalu arfineq-pingasunik ukioqarluni nunatsinniit Aalborgimut nuuppoq. Taassuma igasutut sulinini Blokhusimi Standhotelimi aallartippaa. Tamatumalu kingorna Alimentumimi sulinissamut periarfissaqalerpoq. Tassanilu sulinermini igasutut ilinniakkani ukiut marluk missaata matuma siorna naammassivaa.

- Blokhusimi Standhotelimi sukkasuumik sulineq ilinniarpara. Alimentumimi ullut tamaasa eqqortumik sulinissamut tunngavoq. Isumaqatigiinngissutissarsiornissamuunngitsoq. Ullut tamaasa ajugaasuuniarsaraluni, Taatsiannguaq Geisler oqarpoq.

Taatsiannguaq Geisler Alimentumimi igaffimmi pisortaq ilinniartitsisunilu Søren Birch peqatigalugu.

Taassuma Alimentumimi sulileramili ilinniartitsisuni, igaffimmi pisortaq, Søren Birch sanileriuarsimavaa. Tassa imaappoq Søren Birchip nerisassanut, periutsinut eqqarsartariaatsimullu pissusaa Taatsiannguaq Geislerip atulersimavaa.

- Søren Birchip qanoq ittuunera aallartinnginninni takoqqaalaarpara. Taamaammat suut tamaasa ujartuiffigaakka. Ukiut sisamat sinnerlugit malinnaaffigereerluta qanoq ittuunera takusinnaavara. Søren ajugaasuuvoq. Uanga aamma ajugaasoorusuppunga, taanna oqarpoq.

Kakiornerup tullia

Alimentumip Michelinimik ullorialerneqarnera akunnerpassuarni igaffimmiissimanermut, sulilluarnermut, suliassanullu tunniussimanerujussuarmut ersiutaapput. Kisianni aamma pingaarnersiuineqarpoq. Ilaquttat, ikinngutit inuuissiortullu amerlanertigut tunulliunneqartarput.

- Ikinngutima ilaquttamalu sulinngiffigisaani tamani ulluni sulisarpunga. Inuttut nammineq pisassat taamaatinneqartarput. Kisianni uanga igaffimmiikkusunneruvunga. Tassanimi nuannaartarpunga. Maani suut tamarmik isumassaqartippakka, Taatsiannguaq Geisler oqarpoq.

<em>Nerisassiaq ataaseq Taatsiannguaq Geislerimut amikumineq ooqanngitsoq citronimik arrorsagaq, peberrodimik honningimillu akuugaq. Uuliamik bronzefennikelitalimmik akunnequtillit. Taakkununnga jordbærit aappaluttut qorsuillu saniatigooralugit. Fennikeli ooqanngitsoq errortorluagaq. Naatsiivimmiillu naasut naatitallu isseqarluartut. Naggataatigullu jordbærit tunguanik sikuliaq.</em>

Pigititsinera amiani allassimavoq. Taliani Alimentumip ilisarnaataa ulloriarlu qorsuk neriniartarfiup nerisassiortaatsimi piujuartitsisumik periuseqarnerannik uppernarsaasoq kakiornioreerput. Michelimik ulloriaq aamma ilanngutingajalerpoq.

- Kakiuisartumik neriniartarfimmukartitsissaagut, taamaammat peqataasimasut – piumasullu – kakiortissinnaassapput, taanna oqarpoq.

Kakiornerup tullia suussanersoq suli ilisimanngilaa. Ajugaanerli nuannaarutigineqaqqaassaaq, suliaq pitsanngorsarneqassaaq siunissallu tulliani susoqarumaarnera takutikkumaarpaa.