Broberg: NunaGreen matuniarli aningaasanillu utertitsili
Ukioq 2024 nunap karsiata angusaanut pitsaanngilaq. 257 millionit koruuninik siorna amigartoorpoq. Inuit Ataqatigiit Siumullu naalakkersuisoqatigiillutik aningaasaqarnermut ukiumi tassani akisussaasuupput.
Partiit taakkua aningaasanik aqutsinermut pikkorlunnerat amigartoornermut ersiutaavoq.
Illua-tungiliuttut partiianni, Naleqqami siulittaasoq taama isummerpoq.
- Tupigusuutigisimanngilarput 2024-imi killiffigisimagaat amigartoorneq.
- Aningaasanik aqutsisinnaannginneq, aqutserusunnginnerlu, ersiutaat tassa erseraluttuinnavikkamik, Pele Broberg oqarpoq.
Broberg: 400 millionit koruunit utertinneqarniarlik
Ingerlatsinermi siorna angusaq pitsaanerugaluarpoq. Ingerlatsinermimi 150 millionit koruunit sinneqartoorutaapput. NunaGreenimulli 400 millionit koruuninik Kalaallit Airportsimullu 100 millioninik aningaasaliineq peqqutigalugu angusaq amigartoorfiuvoq.
NunaGreenimut 400 millioninik aningaasaliineq pisussaanngikkaluartoq, Pele Broberg isumaqarpoq. Ingerlatseqatigiiffiullu matunissaa aningaasanillu utertitsinissaa taassuma maanna kissaatigilerpaa.
- NunaGreenimut aningaasat tunniunnikuusat utertillugit, NunaGreen matoriarlugu, kingusinnerusukkumut kinguartillugu taanna sulineq, Pele Broberg oqarpoq.
Naleqqap akuerisaa isorileraa
NunaGreen ukiuni missingersuusiorfiusuni sisamani katillugit 400 millionit koruuninik aningaasalerneqassasoq, Inatsisartut aningaasanut 2024-mut inatsimmut akuersigamik akueraat. Naleraq akuersisunut ilaavoq.
Taamaalilluni Pele Brobergip partiip siulittaasuuffimmi akuerseqataaffigisaa maanna isornartorsiorpaa.
Partiip siulittaasuuffimmi ilaasortaasa akuerseqataaffigisaannut isornartorsiuilernini tunngavilersuutissaqartippaa.
Aningaasanut inatsit 2024-moortoq akuerineqalermat Naleqqap angorusutai tassani aamma ilaatinneqartut, Pele Broberg oqarpoq. Angorusutatillu ilaammata inatsisip imarisaa tamakkiisumik isumaqatiginngikkaluarlugu partiip ilaasortai akuerseqataasimasut maanna nassuiaatigaa.
- Uagut angorusutagut arlaat, sunniuteqaqataaffigisinnaasagut ilaatinniarutsigit taava allat kissaataata aamma angertariaqartarlutigit. NunaGreen tassani aamma ilaavoq, Pele Broberg oqarpoq.
KNR-ip aningaasaqarnermut naalakkersuisoq, Múte Bourup Egede, nunap karsiata 2024-imi aningaasaqarnera pillugu apersorusullugu marlunngornermi attaveqarfigaa. Tamannali suli iluatsinngilaq.
