Kim Kielsen Siumumi aamma ilaasortaajunnaartoq
Vivian Motzfeldtip Siumumit ilaasortaajunnaarluni nalunaarutigeqqammerluinnarpaa.
Kim Kielsen maanna taamaaliorpoq.
Siumumi ukiuni 41-ni ataannartumik ilaasortaareerluni ukiunilu arlalinni aamma siulittaasuusareerluni ilaasortaajunnarpoq.
- Vivian Motzfeldt tamakkiisumik isumaqatigaara, tallimanngormat Siumut naalakkersuisooqatigiinniit aninera aalajangerneruvoq kukkusumik, isumagalu naapertorlugu paasiuminaatsumik tunngavilik.
Partiimi naalakkersuisunilu siulittaasuusimasoq tusagassiuutinut marlunngornermi ualigaa nalunaarummi allappoq.
- Innuttaasut qinigaat qarsutiinnarlugit aalajagiisoqarsinnaanngilaq, Siumullu imminut sunniutaarutsilluni siunnerfeqarsimanngisaannarpoq.
- Nalunngeqqissaarpara uannut qinersisut tamarmik sapinngisara tamaat pitsaasumik nunatta ingerlatitaanerani suleqataallunga sunniuteqaqataanissara kissaatigalugu naatsorsuutigalugulu qinernikugaannga.
Avissaartuutsitsineq iluatsinnavianngitsoq
‘Aatsaat taama pingaaruteqartigisumi’ inissisimasugut Kielsen tusagassiuutinut nalunaarummi allappoq.
- Avissaartuutsitsiniat qaquguluunniit ajugaaffigissanngilaatigut. Qaquguluuniit kalaallit inuiaat ajorsartinneqassanngillat.
- Inuiaat kalaallit pingaarnerummata, Kim Kielsen naggasiuteqarluni tusagassiuutinut nalunaarummi allappoq.
