Air Greenlandimut ukioq 2025 ilungersunarpoq
Air Greenland 2025-mi akileraannginnermi 3,3 millionit koruuninik angusaqarpoq. Angusat naammaginartutut allaaserineqaraluartut angusassatut 2024-mit naatsorsuutigisamit ikinnerujussuupput.
65 millionit koruunit 75 millionit koruunillu akornanni angusaqarnissaq taamani naatsorsuutigineqaraluarpoq.
Taamani ukiumut angusassatut naatsorsuutigisat, Nuup mittarfiani taamaatitsivallaannginnissaq tunngaviusunut ilaavoq. Air Greenlandimulli ukioq 2025 ilungersunartorsiorfiuvoq.
Nalinginnaasumiimmi silarlunnerusarpoq, Nuullu mittarfiata ingerlanneqarnera aamma ilungersunartuuvoq.
Ukiumullu angusat 3 millionit koruunit sinnilaarpaat.
- Taakku ukiumut missingersuutini naatsorsuutigisanit ikinnerupput ukiullu siuliinit angusanit ikinnerullutik, Air Greenland tusagassiuutinut nalunaarummi allappoq.
Silarluttarnerata saniatigut aamma timmisartuni inissat amerlineqartut tamaasa tuninissaat ajornakusoorsimavoq, tamannalu aamma aningaasartuutaalluni.
- Ukiup naajartornerani silap pissusia nalinginnaanerulerpoq, timmisartuussinermilu inissat tunisallu iluarsiiffigineqarput, taamaalillunilu ingerlatsineq patajaannerusoq pilersinneqaqqippoq, pisortaaneq Jacob Nitter Sørensen oqarpoq.
2025-mili angusat 60 millionit koruunit missaannik ikinnerugaluarlutik septembarimi naatsorsuutigineqartunit pitsaanerupput. Tassanimi 30 millionit koruuninik amigartooruteqarnissaq naatsorsuutigineqaleraluarpoq.
Ukiumiilli ilungersunartorsiorfiusumit misilittakkat siunissamut atorluarsinnaagitsik, timmisartuutileqatigiiffimmit allapput.
- Angalanissanut pilersaarut pitsanngorsaavigaarput, eqaannerusumik aaqqiisinnaanissaq aningaasaqarnerullu pitsaanerulernissaa anguniarlugu. Nuummi nunani tamalaani mittarfiup aallarnisarnerani ajornartorsiutit ikilipput, aamma Qaqortumi Ilulissanilu mittarfiit nutaat ammarpata ilungersuutigineqartussat taama amerlatiginissaat naatsorsuutiginngilarput, siulersuisuni siulittaasoq Malik Hegelund Olsen oqarpoq, nangillunilu.
- Taamaalilluta piffissaq eqqorlugu angalasarneq pitsanngoriaateqassasoq naatsorsuutigaarput, taamaatitsiinnartarnermilu aningaasartuutit ikileriarnissaat naatsorsuutigalugu, Malik Hegelund Olsen oqarpoq.
Nunatsinni mittarfeqarneq allanngormat, nunatsinni timmisartuussiinnartarnissamut aningaasaliinissaq aamma pisariaqarpoq. Air Greenlandilu 248 millionit koruuninik 2025-mi aningaasaliivoq.
Ukiuni aggersuni isertitaqarnerunikkut aningaasaliinissamut pilersaarutit attatiinnarneqarnissaat timmisartuutileqatigiiffimmi naatsorsuutigaat.
