Katsorsaasoq: Misigissutsigut aalakoornartumut qimarngutigisarpagut
Meeraanerlussimanermit kingunipiluutit imigassatornikkut qimarratigisarpagut.
Katsorsaavik Nuummi pisortaq Arqaluk Kramer Berthelsen taama isumaqarpoq. Taassuma politimesterip nunatsinni imertariaasitta allanngortariaqarneranik kaammattuinera isumaqatigaa.
- Politimesterip oqaasia ilumoorpoq.Imerujussuarsimariarluni kamannerit assigisaallu pilertarput, soorlu angerlarsimaffinni eqqissiviilliornerit. Tassa imerujussuarsimatilluni misigissutsit aqussinnaajunnaarlugit, Arqaluk Kramer Berthelsen oqarpoq. Taanna Katsorsaavik Nuummi pisortaavoq.
Aqussinnaajunnaarluni silaarulluni aalakoortoqartillugu inuit ilaat killissaarullutik nakuusertarmata kinguaassiutitigullu pinerluttarmata, nunatsinni imertariaaserput oqallisigineqartariaqartoq, politimesteri politiit ukiumoortumik nalunaarusiaata saqqummerneranut atatillugu oqarpoq.
AAMMA ATUARUK Politimesteri: Imigassamik atueriaaserput allanngortittariaqarparput
Kalaallit Nunaanni Danmarkimilu imigassamik atuineq
Danmarkimi Kalaallit Nunaannut sanilliullugu imigassamik atuisoqarneruvoq. Kisitsisit 2020-meersut takutippaat Kalaallit Nunaanni agguaqatigiissillugu inuup 6,95 literi ukiumut imertaraa, Danmarkimi kisitsit 7,8 literiuvoq.
Nunatsinnili inuit Danmarkimut sanilliullugit inuusunnerupput. Nunatsinni imigassarsisinnaasut Danmarkimut sanilliullugu ikinnerullutik. Tassalu Danmarkimi innuttaasut agguaqatigiissillugit 42,2-nik ukioqartut, nunatsinni 36,22-nik ukioqarput.
Paasisat: Danmarks Statistik og Grønlands Statistik
Politimesterip naliliinera katsorsaavimmi pisortap ilisarisinnaavaa. Katsorsartittorpassuit, meeraanerminnit misigisapilutik qimarratigalugit aalakoornartumik atornerluilersimasut, nalaattarpai.
- Soorlu maani katsorsartittartut eqqarsaatigigaanni 92 procentii misigissutsikkut, timikkut kinguaassiuutitigullu meeraanerminni atornerlugaasarsimasarput. Taamaasillutik taakkua misigissutsit ulluinnarni anniaatigisatik ullormi ataatsimi marlunniluunniit aalakoorujussuarlutik puiorniartarpaat. Misigissuseqaratik inoorusullutik, Arqaluk Kramer Berthelsen oqarpoq, nangipporlu:
- Meeraalluni atornerlugaasimaguni iluamillu suliarinagu oqaatiginagulu sivitsoriartornerani kamannguukkiartortarpoq. Taavalu kanngusunnermik akusarlugu. Kanngusunneq alliartortarpoq, eqqarsarluni "soorunami taamani uanga meeraallunga naaggaanngitsunga? Sooruna oqaluttuarsimanngitsunga?". Taava taamatut kanngusunneq annertusiartorluni kamannguuttarluni.
Qallunaat imernerupput uagulli imernerluttarpugut
Danmarkimi imigassartoriaaseq allaanerusoq katsorsaasoq oqarpoq. Tassa unnukkorsiutitornermi viinnimik iggisertoqartartoq, nunatsinni tallimanngornermi arfininngornermilu ataannartumik aalakoortoqartarpoq. Taamannak imeriuseqarneq "binge-drinking"-imik taaneqartarpoq, tassa silaarunnermik kinguneqarsinnaasumik imerujussuarneq.
Akeqanngitsumik katsorsartinnissamik neqeroorut
Imigassamik, ikiaroornartumik aningaasanoornermilluunniit ajornartorsiuteqaruit Allorfimmi katsorsartissinnaavutit. Aasianni, Ilulissani, Nuummi, Qaqortumi Sisimiunilu katsorsartissinnaavutit.
Najugarisanni Kommuni Allorfilluunniit toqqaannaq attaveqarfigineqarsinnaapput.
Katsorsarneqarnissamut najugarisarnut qanittumi periarfissatit pillugit apeqqutissaqaruit Allorfimmut 52 53 43-mut ulluinnarni nal. 9 – 15 akornanni imaluunniit allorfik@allorfik.gl-imut attaveqarsinnaavutit.
Paasissutissanik aallerfik: Allorfik
- Naatsumik oqaatigalugu, aalakoorujussuarluni amerlasuutigut silaarunnertalimmik sunniuttartumik imigassamik piffissap sivikitsup iluani atuerujussuarneq, Arqaluk Kramer Berthelsen oqarpoq.
Imigassamik ikiaroornartumilluunniit atornerluisunngorsimasut ikiortissarsioraangamik pitsaanerusumik sullinneqartariaqartut katsorsaavimmi pisortaq isumaqarpoq.
- Katsorsartikkusuttup piumassuseqarnerani ingerlaannaq aallartinnissaa oqinnerpaarpaajusariaqarpoq. Soorlu Danmarkimi ullut 14-it iluanni katsorsartilereertartussaapput.
Kommunilli ilaanni kigaappallaartumik sullissisoqartarpoq. Arqaluk Kramer Berthelsenip oqarnera naapertorlugu katsorsartikkumalluni saaffiginnittoq qaammat angullugu utaqqisariaqarsinnaasarpoq.
Kinaassutsimik isertuussilluni katsorsartissinnaaneq aamma periarfissaasariaqarsoraa. Tassa katsorsaavimmut isiinnarluni ikiorneqarsinnaaneq, katsorsartinnerullu ingerlanerni kommunimit sullinneqarnissamut ikiorneqarsinnaaneq periarfissaasariaqartut Arqaluk Kramer Berthelsen isumaqarpoq.
Meeraanermit aallartittariaqartoq
Imigassamik atueriaaseq allanngortinneqassappat angajoqqaat perorsaariaasiat pingaarnerpaasoq pisortaq isumaqarpoq. Tassa angajoqqaanngortut qanoq perorsaalluarnissamik ilisimassapput, arlaannaannilluunniit atornerluisuunatik.
Tamannalu iluatsissappat, inuiaqatigiittut kinguaassiutitigut atornerluisarnerup ajornartorsiutaanera paqumiginagu eqqartornerusariaqaripput Arqaluk Kramer Berthelsen isumaqarpoq. Timikkummi tarnikkullu innarlerneqarsimasut ullut tamaasa ilungersortarput ikiorserneqaratillu.
- Ullormiit ullormut inuuniapiloortilluni meeqqanut tunniussinnaasat killeqarujussuartaramik, Arqaluk Kramer Berthelsen oqarpoq.
