Arsaanneq: Kalaallit Østrigimut ajorsarput
Kalaallit arsaannermi nunanut allanut unammisartut Østrip akissarsiutiginagu arsaannermi nunanut allanut unammisartuinut ataasinngornermi ualikkut unammipput. Tassani Østrig tallimaraarluni ajugaavoq kalaallit ataaseraartut tamannalu sioqqullugu kalaallit 1-1-mut angummakkaluarput.
Kalaallit peqataaffigisaat tassaavoq Amateurs Nations Cup tassanilu unammisassaat tassaapput Østrig aamma Slovenien.
Unammineq sioqqullugu ilimagineqarpoq Østrigimut unamminermi kalaallit ilungersuatitaangaatsiarumaartut.
- Unamminerup ingerlanera naammagisimaarpara. Aa, 5-1-mik ajorsarpugut kisianni unammineq assut ilinniutaavut pikkorissut akornanni unamminermi qanoq piumaffiginnittoqartarneranut, nuna tamakkerlugu sungiusaasoq Morten Rutkjær KNR-mut oqarpoq.
Tupaallaataanngilaq unammineq aallartisimatsiaannartoq Østrig ataaseraarluni siuaqqaarmat.
- Kusanarluinnartumik isertitsisoqarnerani 1-0-mut kinguarpugut kisianni torrallalluinnarlugu Karsten Møller Andersen isertitsimmat 1-1-mut angumappugut, Morten Rutkjær oqarpoq.
- Piffissami tassani saassussiniaqattaarfigineqarnermi akiuulluaqaagut aammalu iliuuseqarniaqattaarluta. Taamaattumik minutsit 25-it siulliit naammagisimaarpakka, Morten Rutkjær oqarpoq.
Saassussiffigiteqattaarneq
Unammineq ingerlatillugu Østrip aqutsinera ersarissiartorpoq. Aamma nuna tamakkerlugu sungiusaasup assersuinermi eqiinganerunissaq kissaatigaa.
- Isertitsiffigineqarnitta ilai iluarinngilagut saassussiffiginiarneqarnitsinni eqqarsaatiniit iliuutsit kigaannerummata. Kisianni Østrigimiut ullut tamaasa arsaapput ullut tamaasa sungiusartarlutik. Taamaattumik unammisavut pikkoreqaat uagut arsartuvut eqqarsartaatsikkut angummanniarnerusut, Morten Rutkjær oqarpoq.
Unamminermi tullermi pingasungornermi ualikkut Sloveniap akissarsiutiginagu unammisartuinut unammissapput tassanilu ataqatigiilluarnissaq kalaallinut pingaaruteqarluinnarpoq.
- Arsaaffimmi ataqatigiissaagaaneq aallutissavarput isertitseriarsinnaalerumalluta. Østrigimut isertitarput torrallataaqaaq sungiusariikkatsinnik aallaaveqartoq. Puigussanngilarput Kalaallit Nunaanni pissartanngorniunneq qangali naammassinikuummat. Taamatullu takutitsilluartigisinnaammata assut ajasoorutigaara, Morten Rutkjær oqarpoq.
