Kalaallit Nunaat Skak-OL-imut siullermeerluni peqataatitsilerpoq
Kalaallit Nunaat nunat tamalaat akornanni skakkernermik unammersuarnermi siullermeerluni peqataatitsilerpoq. Unammersuariartunut siuttuusussaq Hans-Christian Dahl angusarissaarluarnissartik neriuutigaa.
Allattoq Jonna Enoksen Dahl
septembarip 11-at 2026 10:55
Kalaallit skakkertartut sisamat nunat tamalaat akornanni skak-OLimi unammersuaarnermi Europami annerpaasuumi FIDE chess olympiadimi kalaallit erfalasuat atorlugu Usbekistanip illoqarfiani Samarkandimi septembarip 15-ianiit 27-ata tungaanut unammeqataalerput.
Hans-Christian Dahl, Carl Fleischer, Aputsiak Niels Janussen aamma Egon Mattaaq Kalaallit Nunaat sinnerlugu holditut peqataassapput.
Hans Christian Dahl Kalaallit Nunaanni Skakkertartut Kattuffiannik, KNSK-imik, 2014-imi pilersitseqataasuuvoq.
KNSK-ilu Nunat tamalaat skakkimik peqatigiiffiannut FIDE-mut 2024-imi ilaasortanngorluni.
Tamaangalu killinnissaq oqitsuinnaasimanngilaq.
-Siullermik 2014-nikkunni uku malittarisassat suliarinikuuagut. Periarfissarlu takkuppat kattuffittaarnissatsinnut FIDE-minngaanniit, qallunaat nunaanninngaanniit, skak unioniminngaanniit periarfissat taakkua takkummata akoratsigit, Hans Christian Dahl oqarpoq nangillunilu:
-Aporfeqaalunnikuugaluaqaluta nammineq erfalasorput atorlugu angalasinnaanngoratta soorunami nuannaaqaagut.
Aatsaat taama amerlatigisunik peqataaffigineqalersoq
Skak-OL ukioq allortarlugu ingerlanneqartarpoq, ukioq mannalu aatsaat taama amerlatigisunik peqataaffigineqalerpoq, tassami holdit katillugit 400-it peqataassapput.
Unammineq marlunnut agguataarneqarpoq, unammineq ammasoq, Kalaallit Nunaanniit holdip peqataaffigisassaa, taanna holdit 208-t peqataaffigissavaat.
Aappaani arnat skakimik unammiffissaanni holdit 192-it peqataassapput.
Unammiarnissaminnut angusarissaarnissartik Hans Christian Dahlip neriuutigaa.
- Peqataanissarput pingaartinneruara sanitigullu neriukkaluarpunga tabelip nunat 200 sinnerlugit akornaniittuni qeqqaniissinnaassallutaluunniit taanna neriuutigivara soorunami angusarissaarnerunissarput kissaatigaara, Hans Christian oqarpoq nangillunilu:
-Massakkut nunarput avataaninngaanniit oqallisigineqartorujussuuvoq, saqqumminerulaarnerput nammineersinnaanerpullu takutinnissaa avammut ingerlakkusunnerpaavarput.
OL-imut peqataasussat ilaat Egon Mattaaq nunatsinni skak-imik ukioq manna apriilimi unammersuarnermi pissartanngorpoq.
Meeraallunili skakkertalersoq
Hans-Christian Dahl, unammersuaarnermi siuttuusussasaq, meeraagallaramili ataatani peqatigalugu skakkertalerpoq.
Skak-OL-imullu unammiarnermini nuannaartorisami ilai unammeqatigisinnaaleramigit pissangavoq.
-Skak-OL-imut massakkut siullerpaamik peqataalernitsinni misinnarporlusooq, meeraallunga imaluunniit inuusuttuullunga nunani allaninngaanneersut unammisartut takusarnikuusakka unammiuaartarfiannut peqataalerpugut, sinnattortutullusooq misinnarpoq.
-Nutaarsiassani internetikkullu takujuaannartakkagut inuit skakkimi unammisartut peqataasussaagamik isimiik isimut isigalugit assiliseqatiginissai inuusuttuullutali nuannaartorisagut peqataalersut ilaaffigilerpagut.
Nunatsinni skakki soqutigineqarluaraluartoq peqatigiiffiit ikiliartuinnartut Hans Christian Dahlip oqaatigaa.
-Soqutigineqarluarpoq, kisianni interneti pilermat peqatigiiffiit skakklubit sineriatsinniit ikilinikorujussuugamik. Skakkerneq mobiilikkut tigoriaannanngornikuugami, tassanilu skakkerneq annermik ingerlanneqalerluni, taamaasilluni peqatigiiffiit nungupilooramik.
KNSK sineriak tamakkerlugu Kalaallit Nunaatalu avataaniit 36-inik ilaasortaqarpoq, sineriammilu sisamanik peqatigiiffeqarluni.
Skakkernermillu peqatigiiffiit amerlinerunissai neriuugaa.
-Siunertarivarput peqatigiiffiit amerlanerulertikkusullugit meeqqallu skakkertartut amerlanerulerpata taamatullusooq atuarfeqarfinni aamma angorusullugu skakkimik ilinniartitsisarneq ingerlateqqikkusukkatsigu siunissamut ungasinnerusumut, Hans Christian oqarpoq.
