Kalaallit Nunaat Danmarkilu nunarsuaq tamakkerlugu misissuinermi tapersersorneqangaartut
Nunarsuaq tamakkerlugu isumasiuinerup nutaap takutippaa, USA-mut akerleriinnermi Kalaallit Nunaat Danmarkilu tapersersorneqangaartut.
Nunani 98-iusuni nunat 85-ini innuttaasut amerlanerussuteqartut Kalaallit Nunaannut Danmarkimullu isumaqatiginninnerpaapput, nunanilu aqqanilinni ima naligiitsigisumik agguataaqqasoqarpoq, naatsorsueqqissaarnermi nalorninartumi 4,7 procentimut inissittoqarluni.
Nunani marluinnarni - Israelimi Dominikanske Republikkimilu - amerlanerussuteqartut USA tapersersorpaat.
Tamanna tamat oqartussaaqataanerannik misissuinermit Democracy Perception Indeximit suliaannit, Nira Datamit aamma kattuffimmit Alliance of Democraciesimit suliarineqartumit paasinarsisoq, Berlingske allappoq.
Ukraine tapersersorneqartoq
Tamat oqartussaaqataanerat pillugu misissuineq ukioq manna Copenhagen Democracy Summit-imi marlunngornermi pisussaq sioqqullugu suliaavoq.
Misissuinermi nunani 98-ini inuit 94.000-init amerlanerusut akissutaat tunngavigineqarput. Qulingiluassaanik misissuisoqarpoq.
Apeqqutinulli aalajangersimasunut tunngatillugu inuit kina isumaqatiginerunerlugu aatsaat aperineqarput.
Ukrainemi sorsunneq pillugu nunani 55-ini innuttaasut Ukraine tapersersornerpaavaat, nunanilu 30-ni innuttaasut Rusland tapersersornerullugu.
Inissisimaffitsipput takorloorsinnagaat
Nunat amerlanerit nunanut allanut sanilliullugu Kalaallit Nunaannik Danmarkimillu tapersersuinerat, Danmarkip Kalaallit Nunaatalu inissisimaffiannik paasiuminartitsinerannik tunngaveqarpoq.
- Naalagaaffissuartut piumasani naammassiniarlugu pissaanini atorniarlugu misiliisutut isigineqarpoq, Anders Wivel, pissaaneqarnerup politikkianik naalagaaffiillu mikisut nunat tamalaat akornanni politikkiannik ilisimatusartoq, Berlingskemut oqarpoq.
Kalaallit Nunaat Issittumi inissisimagami Danmarkimut USA-mullu pingaaruteqarluinnarpoq.
USA-p præsidentiata Kalaallit Nunaat Amerikamiut tigusinnaagaat 2019-imi siullermeerluni oqaatigaa.
Danmarkip Kalaallit Nunaatalu tamanna itigartippaat. Trumpilli isumaa allanngunngilaq. Akerleriinneq nunat tamalaat akornanni pissuserissaaqatigiinnermut ajornartorsiortitsivoq, Trumpillu Kalaallit Nunaat sakkulersorluni tiguarniarniarlugu sioorasaarissutigaa.
EU-mili ilaasortaasut Danmarkip Kalaallillu Nunaata nammineersinnaanerat tapersersorpaat.
