Eqqartuussisuuneqarfiup Keira Kronvold isumaqatigigaa

Danmarkimi eqqartuussisuuneqarfiup, suliami Keira Kronvoldip panianik pinngitsaaliissummik arsaarinninnermut tunngasumi, Isumaginninnermut Nakkutilliisoqarfik avoqqaaraa.

Allattoq Ritzau, Ann-Sophie Greve Møller

maajip 08-at 2026 09:22

Nutserisoq Medea Olsen

Keira Alexandra Kronvold Vestre Landsret-imi tallimanngormat, Danmarkimi eqqartuussivimmi pingaarnersiuilluni eqqartuussummi, panimmi 2024-mi inunngornerata kinguninngua pinngitsaalineqarluni arsaarneqarnera pillugu isumaqatigineqassaaq.

Arnap eqqartuussissuserisua, Gert Dyrn taama oqarpoq.

- Tassa imaappoq, erneqqammiinnartoq ingerlaannaq arsaarneqarnera inatsisinut naapertuutinngilaq, taanna oqarpoq.

Angajoqqaat piginnaaneri pillugit misissuineq, FKU-mik taaneqartartoq, meeqqanik pinngitsaaliissummik arsaarinnissutiginninnermi 2025-p tungaanut atorneqartartoq pissutigalugu suliaq una tusaamaneqaqaaq.

Danskit naalakkersuisuisa misissuinerit taamaattut atorunnaarniarlugit 2025-mili aalajangerpaat, kommunillu meeqqanik kalaallinik angerlarsimaffimmut inissiinermut tunngatillugu immikkut siunnersortitut immikkoortortaqarfimmik atuisarnissartik pisussaaffigilerpaat.

Vestre Landsretip tallimanngornermi eqqartuussutaani eqqartuussiviup misissuinerit Keira Alexandra Kronvoldip qitornaanik 2024-mi pinngitsaaliissummik arsaarnissamut tunngaviusut pisoqaavallaartutut siullertut nalilerpai.

Aammattaaq eqqartuussissuserisuata oqaluttuaraa, kalaallit immikkut pisinnaatitaaffii pillugit isumaqatigiissummi piumasaqaatit naapertorlugit misissuisoqarsimanngitsoq.

Meeraq inunngormat pinngitsaaliissummik arsaarinnissutigineqartoq, eqqartuussummi pineqarpoq - meeqqap ullormi matumani arsaarinnissutaaqqanera pineqarnani.

Keira nuannaaqisoq

Eqqartuussisuuneqarfimmili ajugaanerat Keira Kronvoldip paniata angerlarsimaffiup avataanut inissinneqarnerata atorunnaarsinneqarnissaanik kinguneqarnissaa qulakkeerneqanngilaq.

Tamanna suliap VISO-p ataani immikkoortortaqarfimmit immikkut ittumit kalaallisut kulturimik oqaatsinillu ilisimasaqartumit siorna suliarineqaqqinneranik pissuteqarpoq.

- Nunap eqqartuussisuuneqarfiata eqqartuussutaa Keiramut toqqaannartumik sunniuteqassanngilaq. Kalaallilli soqutigisaannik suliani tamakkunani sumiginnaasoqarnera inatsisitigut nassuerutigineqarpoq, Gert Dyrn Stage Advokatfirmameersoq oqarpoq nangillunilu:

- Aammattaaq arnanut kalaallinut nutaamik misissuiffigineqarsimanngitsunut eqqartuussut tunngavilersuutissatut immaqa pingaaruteqarsinnaavoq. Eqqartuussulli taanna meeqqaminnik angerlartitseqqinniarnerminnut immaqa atornavianngilaat.

ANGAJOQQAAT KALAALLIT MEERARTAASA ALLAMUT INISSINNEQARATARSINNAANERANNIK DANMARKIMI KOMMUNIT NALILEERIAASIISA ISORNARTORSIORNEQARNERAT NAATSUMIK

Ilaqutariit kalaallit Danmarkimiittut meerartaat allamut inissitat ilaqutariit qallunaat meerartaasa allamut inissitaasut tallimariaatigaat, VIVE (Det Nationale Forsknings- og Analysecenter for Velfærd i Danmark) nalunaarusiamini 2022-meersumi allappoq.
Danmarkimi kommunit isumaginnittoqarfiini kalaallit meerartaasa allammut inissinneqaratarsinnaanerannik suliat kalaallit kulturiannik oqaasiinillu eqqarsaatiginninnani suliaasut taamaannerallu kalaallit angjoqqaat paatsoorneqarnerannik taakkualu pigiliutiinnakkanik isumaqarfigineqarnerannik kinguneqarsinnaasut, VIVE-p nalunaarusiamini 2023-meersumi allappoq.
Kalaallit angajoqqaat meeraasa allamut inissinneqaratarsinnaanerannik Danmarkimi kommunit angajoqqaat piginnaasaannik nalileeriaasii (FKU) aamma isornartorsiorneqarput. Nalileeriaatsit taakkua nunani killerneersut kulturiannut ileqquinullu naleqqussaagaanerat isornartorsiorneqarnerinut tunngavilersuutigineqarpoq.
Inatsit naammagittaalliuutigisaat maajip aallaqqaataani 2025-mi atuutilerpoq, kalaallit meerartaannik angerlarsimaffiup avataanut inissiinerni suliani, kalaallit oqaasiinik kulturiannillu immikkut ilisimasalimmit, immikkoortortaqarfimmit immikkut ittumit VISO-meersumit suliarineqartartussanngorlugit qallunaat kommunii pisusanngortinneqarput. Taakku FKU-mik isornartorsiorneqartunik taarsiisuussapput.
Tamatumunnga ilanngullugu FKU atorlugu angerlarsimaffiup avataanut inissiinerit suli ingerlanneqartut immikkoortup misissuiffigissavai.

Allisiguk

Eqqartuussulli Keira Kronvoldimut panimmi angerlartinneqarnissaanik neriuuteqalersitsivoq.

- Tupinnangaarpoq. Allatut taasinnaanngilara, taanna nuannaarpaloqaluni oqarpoq.

- Ilungersuutigalugu anguniartuassavarput.

Keira Kronvoldip suliaq inuiaqatigiinnut kalaallinut sunniuteqarsinnaanissaa aamma neriuutigaa.

- Eqqartuussut kalaallinutt ilaqutariinnut Danmarkimi pinngitsaaliissummik arsaarneqarsimasunut arlalitsigut iluaqutaasinnaavoq. Inatsisitigut amerlanerusunik allannguisoqarnissaa neriuutigaarput. Kalaallit inuit maanga (Danmarkimut, aaqq.) toqqissillutik tikissinnaaniassammata inatsisinik suli allannguisoqarnissaa neriuutigaarput, taanna oqarpoq.

Nalileeqqinneq isorineqartoq

Tamatuma saniatigut suliaq Keira Kronvoldip tunngasoq eqqartuussivimmi nangeqqinneqassaaq.
- Suliaq una maanna soorunami atussavarput suliamullu matumunnga attuumassuteqartumut, Keirap paniata misissuinerit nutaat tunngavigalugit arsaarinnissutaasimaneranut tunngavigissallutigu, Gert Dyrn oqarpoq.

Eqqartuussissuserisup suliaq Keira Kronvoldimut tunngasup VISO-mit suliareqqinneqarnera eqqortumik pisimannginnerarlugu isoraa.
Gert Dyrnip oqarnera naapertorlugu, immikkoortortaqarfiup immikkut ittup kalaallit ilisimasaat naammaginartumik ilanngutinngilaat, naak taamaaliornissaq inatsisinik allannguinermi siorna maajimi atuutilersumi siunertaasimagaluartoq.

- Paasisakka naapertorlugit suliaq Keiramut tunngasoq VISO-mit suliarineqaqqittut siulliit ilagaat. Akerliliissuteqarpugut. Kalaallinik tarnip pissusaanik ilisimasalinnik peqataatitsisoqarnissaa kissaatigaarput, suullu tamarmik kalaallisut ingerlanneqarnissaat kissaatigalugu. Taamaattumik suliami tassani ajornartorsiuteqarpoq sammisassatsinnik, Gert Dyrn oqarpoq.

Aamma atuarukKeira Kronvold panimminik pinngitsaaliissummik arsaarneqarpoq. Suliap suliareqqinneqarnissaa maanna utaqqivaa

FN-ip suliaq Keira Kronvoldimut tunngasoq aamma akuliuffigaa.
FN-imi nalunaarusiortut pingasut danskit naalakkersuisuinut allakkaminni allapput, kalaallit angajoqqaat tarnimikkut misissorneqarnerat "inuiaassutsikkut immikkoortitsinertut isigineqarsinnaasoq“. The Guardian taama allappoq.

Isumaginninnermut Ineqarnermullu ministereqarfik akissuteqaammi, KNR-imit takuneqareersumi allappoq, FN-imi atorfilittat pingasut suliaq pineqartoq pillugu oqaloqatiginiarlugit ataatsimeeqatigiumallugit. Ministereqarfiup Genèvemi, FN-ip Europami qullersaqarfiani imaluunniit Københavnimi ataatsimeeqatigiinnissartik siunnersuutigaa.

- Københavnimi ataatsimeeqatigiinneq immikkoortortamut immikkut ittumut VISO-mut, kalaallit oqaasiinik kulturiannillu immikkut ilisimasalinnut Odensemi pulaarnissamut periarfissiisinnaavoq, ministereqarfimmit allakkami allaqqavoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.