Akerleriinneq meeqqat akornanni sunniuteqartoq: Filmi nutaaq aaqqiissutissanik sammisaqarfiusoq
Ilinniartitaanermut Aqutsisoqarfik meeqqerivinni aamma meeqqat atuarfiini nukarlerni meeqqat akornanni pimmatiginnittarnerup pinaveersaartinnissaanik suliaqarneq pillugu nutaamik isiginnaagassiorpoq.
Isiginnaagassiaq minutsinik aqqaneq-marlunnik sivisussuseqarpoq, taannalu Nunatta Atuagaateqarfiani sapaatip akunnerani matumani sisamanngornermi aaqqissuussinermi siullermeertumik takutinneqassaaq.
Isiginnaagassiami saqqummiisoq Kimmernaq Kjeldsen Ilulissani Atuarfik Mathias Storchimi ilinniartitsisunik oqaloqateqartoq malinnaaffigineqarpoq.
Ilinniartitsisut pimmatiginninnermik pinaveersaartitsinermi atortunik nutaanik qanoq atuisarnerat ilaatigut takutippaat.
Isiginnaagassiami Atuarfik Mathias Storchimi atuartut ilinniartitsisullu malinnaavigineqarput. Pimmatiginnittarneq akiorniarlugu oqaloqatigiissuteqartut takuneqarsinnaavoq. Foto © : KNR / Markus Valentin
KNR-ip Ilisimatusarfimmi lektori, Helle Rabøl Hansen nunatsinni meeqqat akornanni pimmatiginnittarneq pillugu ilisimatusartoq oqaloqatigaa.
Taassuma Kammagiitta ilinniartitsisut perorsaasullu qanimut suleqatigalugit ineriartortinneqarsimasoq tamannalu nunatsinni ilisimasanik aallaaveqartoq oqaatigaa.
Tamatuma saniatigut Mary Fondenimit aamma Red Barnetimit atortussat kalaallisuumut qallunaatuumullu nutserneqarput.
-Nutsigaannaanngillat suliassartaqaqimmata; tassunga maanngaanniit assersuutissaqarlunilu nunatsinni sumiiffinni assigiinngitsuni misilittarneqarsimasunik atortussaqarpoq, Helle Rabøl Hansen oqarpoq.
Pimmatiginnittarneq pillugu isiginnittaaseq 'nutaaq'
Helle Rabøl Hansenip isiginnaagassiami 'pimmaginnittarnermut isiginnittaatsimik nutaamik' taaneqartup saqqummiunneqarnera pingaarnerpaasoraa.
- Meeqqat inuillu ataasiakkaat pimmatiginninnermut siornatigut pisuuteqqajaasarigut nassuiaatigineqarsinnaavoq.
- Pimmatiginninneq eqimattani siullertut pisartoq ullumikkut ilisimavarput. Tassa imaappoq atuaqatigiinni pimmatiginnittoqarfiusuni aamma atuaqatigiinni pimmatiginniffiunngitsuni assigiinngissuteqartoqangaatsiarpoq.
Pimmatiginninneq pillugu ilisimatusartup atortussat nutaat pimmaginninnermi inunnut ataasiakkaanut pisuutitsisoqarunnaarluni ataatsimut akisussaaffeqartoqalernissaanut allannguinissaa neriuutigaa.
- Pimmatiginnittarneq inunnut ataasiakkaanit avatangiisiniilersissavarput. Meeqqat ataasiakkaat kisiisa sammigutsigit iluaqutaanavianngilaq. Aaamma angajoqqaat tamanna akisussaaffigigaat oqaatigissallugu iluaqutaanngilaq, taanna oqarpoq, pimmatiginnittoqannginnissaanillu suliaqarneq inuiaqatigiinni suliassaasoq erseqqissaatigalugu.
Akerleriinneq pimmatiginnittoqarnerulersitsisartoq
Nunatsinni Meeqqanik atuartunik misissuisartoq, HBSC Greenland naapertorlugu atuartut 35 procentiisa pimmatigineqarsimallutik oqaatigaat.
Pimmatiginninnerilli peqqarniitsut pillugit saaffiginnissutit amerlassusaat ukiuni kingullerni amerlisimasut, Helle Rabøl Hansenip oqaatigaa.
Taassuma suleqataatalu tamanna tunngavigalugu taanna Trumpimit sunniutitut taagulerpaat, tamannalu sammisaq pillugu ukiuni 20-ni misilittakkaminut tunngaveqartillugu.
- Nuna tatisimaneqaraangat najukkami avatangiisit aamma qisuariartarput. Inuiaqatigiinni akerleriittoqarneruleraangat meeqqat tungaanni aamma taamaattoqartarpoq.
Pimmatiginninnerup sammineqarnerunera amerlanerusullu sammisamik oqaluuserinnikkusunnerat aamma pissutaasinnaava?
- Taamaattoqarsinnaalluarpoq. Pimmatiginninneq pillugu saaffiginnittoqarnerunera tamanna pillugu oqaluuserinninnermut aamma akuersinerunermut; tamannalu siuarinerulluni.
- Kisianni tamanna soorlu siaruariartorpasittoq. Inersimasut akornanni akerleriittoqarneratulli meeqqat akornanni aamma malugineqarsinnaavoq.
Kammagiittamit isiginnaagassiaq nutaaq linkimi uani takuneqarsinnaavoq.
