Issittumi immap sikua saatsoq aasaq manna tupinnaannartumik aanngitsoortoq

Issittumi immap sikua saatsoq aasaq manna tupinnaannartumik aanngitsoorpoq. 

Tamanna pillugu, Danmarks Meteorologiske Institut (DMI) tusagassiuutinut nalunaarummi sisamanngornermi allappoq. 

Siorna ukiuunerani immap sikua aatsaat taama, kvadratkilometerinngorlugu uuttorlugu, siammarnikitsigisimavoq. Issittumili aasaanerani naqitsiniisaffiup naqinitsinikippallaarnera pissutigalugu sila nillernerusimavoq, tamannalu siku aakkiartornikinnerulluni. Tamanna DMI-mi silap pissusianik ilisimatusartup Gorm Dybkjærip nassuiaatigaa. 

–Issittumi aasaagaluartoq sikoqaannarnera tupinnarpoq. Silalli pissusiata allanngoriartornera sikumut suli sunniuteqarpoq, taanna oqarpoq. 

Sikup 20 procentimik annikillisimanera

Immalli sikua aasaanerani annikillerpiarsimanngikkaluartoq, DMI-p allallu nunarsuup kissatsikkiartornera ilutigalugu immap sikuata saaligaluttuinnarnera ukiorpassuarni maluginiarpaat. 

Immap sikuata nunarsuaq tamakkerlugu ataatsimut isigalugu 2007-mili 20 procentinik annikillisimanera, nalunaarsuinerit takutippaat.

– Saannerusumik qajannarnerusumillu sikusalerpoq. Tamannalu anorlertarneranit, kissattarneranit immallu sarfaasa kissaanit immap sikua annikillerujussuarsinnaavoq. 2007-mi taamaattoqartoq takuarput, apeqqutaavorlu immap sikuata taamatut tassanngaannaq annikilleriaqqinnissaa pisinnaanersoq, Gorm Dybkjær tusagassiuutinut nalunaarummi allappoq. 

Ilisimatusartut immap sikuanik nakkutiginninnerat, albedomik taaneqartartoq, pissutaanerpaat ilaanniippoq. 

Tassaavoq, seqernup qinngornerisa avataarsuanut uterteqqinneqartarnerat. Sikorsuit nuissallu seqernup qinngornerinik avataarsuanut annertuumik utertitsisarput, imarlu taartoq seqernup nukinganik tigooraanerusarpoq. 

Ritzau