- Innarluutillit atugarisaat pillugit annertoorujussuarnik suliassaqarpugut
Inuunermi artornartunut oqaasertaliiniarneq ajornakusoortarpoq. Pingaartumik tamanna amerlasuunit oqaluuserineqartinnagu.
Tamanna sapaatit akunnerisa marluk matuma siorna isumasioqatigiinnermi allanngortinniarneqarpoq, inuusuttummi innarluutillit Nuummi taalliornikkut artornartut oqaatiginiarlugit naapipput. Aaqqissuussineq iluatsilluartoq, aaqqissuussisut naliliipput. Taakku taama isumasioqatigiittoqaqqissinnaanissaa neriuutigaat.
Innarluutillit oqaaseqartartuat, Anja Hynne Nielsen sisamanngornermi tallimanngornermilu peqataavoq.
- Isumasioqatigiittoqarnera ajunngeqaaq, iluatsilluarpoq. Inuusuttummi ilinniartinneqarnissaminnut, isumassarsiornissaminnut, minnerunngitsumillu ataatsimoornissaminnut pisariaqartitsipput, Anja Hynne Nielsen oqarpoq.
Innarluutillimmi nunatsinni politikerinit sumiginnagaasarnerat ajornartorsiutaasoq taanna isumaqarpoq.
- Tamatta pisinnaatitaaffeqarpugut, innarluutillilli ullutsinni taamak pisinnaatitaaffeqanngillat, soorlu ilinniarsinnaanikkut, sulisinnaanikkut, tamat ornittagaanut ornigussinnaanikkut, inuiaqatigiinnut akulerunnissaminnut, attaveqatigiinermut tunngasuni, timersoriarsinnaanermut, nammineersinnaanermut, sumilu ineqarusunnermut innarluutillit pisinnaatitaaffeqanngillat, innarluutillit illersuisuat sapaatit akunnerisa marluk matuma siorna oqarpoq.
Nunatsinnili inuusuttut innarluutillit siusinaartumik soraarnerussutisiaqalernissamik utoqqarmiunilu inissamik neqeroorfigineqaannartarput. Tamanna inuit pisinnaatitaaffiinik unioqqutitsinerusoq, taanna oqarpoq.
Meeqqanut, inuusuttunullu naalakkersuisup, Aqqaluaq B. Egedep isornartorsiuineq ilisarisinnaavaa.
- Naalakkersuisuninngaanniit ilisimalluarparput nunatsinni innarluutillit atugarisaat pillugit annertoorujussuarnik suliassaqarluta. Tassani naalakkersuisuugutta inatsisartuugutta aammalu kommuneni qinikkatut atuukkutta unammilligassaqarpugut annertuumik, taanna oqarpoq.
Ukiorpassuarni suliassaq annertusoq
Taassuma oqarnera naapertorlugu innarluutilinnut sullissisut pikkorissartinneqarnissaannut pilersaaruteqartoqarpoq.
- Ilinniarsimasunngorsaanerup saniatigut innarluutillit pisinnaatitaaffiinik ilisimaarinninnerulernissamik tunngasut suliniutigineqarnissaat aamma siunniunnikuuarput, taanna oqarpoq.
- Inuiaqatigiinni akuunerulersitsinissamut tunngasut ukiuni arlalinni siuarsagassatut annertuunut ilaapput. Inatsisiliornikkut periusissiornikkut aammalu siunissamut iliuusissatut pilersaarusiornikkut suliat ingerlapparput. Aqqaluaq B. Egede taama oqarpoq.
Suli iluatsilluartoq
Danskeq taalliortartoq, Casper Erik – nammineq aamma innarluuteqartoq – isumasioqatigiinnermut sapaatit akunneri marluk matuma siorna peqataavoq. Taanna inuusuttut unammillernartiinnut, ulluinnarni nalaattagaannut oqaasertaleruminaatsitaannullu oqaasertaliinissamut ikiuivoq.
- Casper Eric inuusuttut taalliaat kalaallisut danskisullu atuarneqartut aallaavigalugit taalliorpoq. Saqqummiussai sakkortupput, takutiinnarpaali inuusuttut innarluutillit pisinnaatitaaffiisa eqqartorneqarnissaat qanoq pisariaqartinneqartigisoq, innarluutillit oqaaseqartartuat, Anja Hynne Nielsen oqarpoq.
Aaqqissuussinermit maanna sapaatit akunneri marluk matuma siorna qaangiuttut, Anja Hynne Nielsenip suli iluatsilluartoqarnerarpaa, isumasioqatigiinnerlu aaqqissuunneqaqqissinnaanissaa neriuutigaa – nunattalu illoqarfiisa pingaarnersaanniinnaanngitsoq:
- Siullermeerluta isumasioqatigiitsitsivugut tusarnaartitsinertalimmik, tamannalu aamma ingerlateqqikkusupparput, ineriartortikkusupparput, fondenullu assigiinngitsunut qinnuteqaasiorumaarpugut Nuup avataani aamma isumasioqatigiissitsisinnaassalluta. Anja Hynne Nielsen oqarpoq.
