Iluliaq navianartorsiornartumik nunaqarfimmut qanittoq

“Innuttaasut umiarsualiviup eqqaani angalatillutik mianersortariaqarput.” 

Allagartami Innaarsuit umiarsualiviani nivingasumi taama allassimasoqarpoq. Pingasunngormalli iluliarujussuaq nunaqarfiup 160-it missaanni innuttaasullip qanittuaniippoq.

Royal Greenlandip aalisakkerivissuata ilaat illumi aappalaartumi talittarfimmiippoq. Iluliarsuaq aserussagaluarpat taakkua immikkut ulorianartorsiortinneqassapput. Allakkatigut akissummi Royal Greenland KNR-imut ima allappoq: 

- Aalisakkerivimmut tunisineq unitsikkallarneqarpoq. Suliffeqarfitsinnittaaq isumannaallisaanermut tunngatillugu malittarisassat atuutsinneqalerput, kikkullu tamarmik ilisimatinneqarlutillu toqqissisimanissaat qulakkeerniarlugu sulisut najukkamilu innuttaasut ataavartumik attaveqarfigivavut. 

Upalungaarsimanermut pilersaarut 

Bjarne Markussen upalungaarsimanermut pisortaavoq, taassumalu iluliarsuaq eqqumaffigalugulu nakkutigilluinnarpaa. 

- Iluliarsuaq nunaqarfimmut qanilluinnarpoq, sarfarlu maliinnarlugu tissukaarpoq. Nakkutigeqqissaarparput, taanna oqarpoq. 

Aatsaat ilulissanik nunaqarfiup qanittuaniittoqanngilaq. 2018-imi Innaarsunni iluliarsuarujussuaq nunaqarfiup eqqaani ikkarlippoq. Taamanikkut iluliarsuaq qanoq ililluni aserulaarnersoq videoliami takuneqarsinnaavoq. Taamaattumik taama pisoqartillugu qanoq iliortoqartarnera nunaqarfimmiut nalunngilaat. 

- Taamatut pisoqartarneranit misilittagaqarput. Sinerissap qanittuani sulineq ajorput, aammalu umiatsiat atortullu isumannaanerusumut nuunneqarput, Bjarne Markussen oqaluttuarpoq. 

Ulorianartorsiorfiusoq 

Iluliaq 2018-imi nunaqarfiup eqqaanut tissukarmat innuttaasut sinerissamut qanittumi najugallit illumut kiffartuussiviusumut nuunneqarput. Tamannali maannakkut pisariaqanngikkallartoq, Bjarne Markussen naliliivoq. 

- Aserussagaluarpat inuit ulorianartorsiortut erngertumik kalerrinneqarsinnaaniassammata, Innaarsunni qatserisartut iluliarsuup sumiinneranik malinnaaffiginninnissaannik piumaffigaavut, taanna oqarpoq. 

Iluliaq maanna nunaqarfimmit ungasilliartulersimavoq, silallu iluaqutaanissaa Bjarne Markussenip neriuutigaa. 

- Iluliaq nunaqarfimmit ungasilliallalaarluni tissukaarpoq. Sila ulittarneralu nakkutigilluarpavut. Ilimagisatsitut kujataatungaani siallissappat ilulissat allamut sammivimmut tissukaalernissaat neriuutigaarput, taanna oqarpoq. 

Ajornerpaamik pisoqassagaluarpat 

Sila iluaqutaassanngippat ajornerpaamillu pisoqassagaluarpat - tassa iluliaq aserussappat - qanoq iliortoqarsinnaaneranik Bjarne Markussen isumassarsiakinngilaq. 

- Piareersimajumalluta Upernavimmi qatserisartut pisortaata tullia ataatsimeeqatigisimavarput. Ajornerpaamik pisoqassagaluarpat Avannaata Kommuniani upalungaarsimanermut pisortaq kalerrinneqassaaq, ataavartumillu attaveqatigiittoqassaaq, taanna oqarpoq. 

Aamma Issittumi Sakkutooqarfik peqataatinneqarumaassanersoq eqqartorneqarpoq. 

- Pissutsit ajornerulissappata taakkua peqataatinneqarsinnaassagunarput, taakkuami uuliamik mingutsitsineq iliuuseqarfigisinnaammassuk. Maani atortuvut killeqarput, Upernavimmiilli Innaarsunnut angallassinissamut piareersimavugut, Bjarne Markussen oqarpoq. 

Tamanna aatsaat ajornerpaamik pisoqartillugu pissaaq. Maannakkorpiaq iluliaq ungasilliartuinnarpoq. 

- Ilulissap ungasilliartornerata ersiutai takusinnaavavut, taava navianarunnaariartussaaq. Iluliaq sumiiffimmiikkunnaavippat nunaqarfik isumannaatooqqqilissaaq, taanna oqarpoq.