Frankrigi: Rubiop Kalaallit Nunaata sakkutuulersorfigineqarnissaa itigartippaa

USA-p nunanut allanut ministeriata Marco Rubiop Amerikamiut Kalaallit Nunaannik sakkutuulersorfiginninnissaat itigartippaa.

Nutaarsiassaqartitsivik Reuters allaaserinninnera naapertorlugu Frankrigip nunanut allanut ministeriata Jean-Noël Barrotip Rubio oqaloqatigereerlugu taama oqarpoq.

-  USA-p nunanut allanut ministeria Marco Rubio oqarasuaatikkut ippassaq oqaloqatigaara, taamatullu periaaseqartoqassanngitsoq taassuma uppernarsarpaa.

- Sakkutuulersortoqarnissaa itigartippaa, Reuters allaaserinninnera naapertorlugu Barrot franskit radioqarfiannut Interimut oqarpoq.

USA Kalaallit Nunaata tiguarnissaanik sioorasaarumminik piviusunngortitsissappat qanoq qisuariartoqarnissaanik Frankrigi ilini peqatigalugit pilersaarusiuleruttortoq, Jean-Noël Barrot aamma oqarpoq.

Frankrigip, Tysklandip Polenillu akornanni ataatsimiinneq

Frankrigip nunanut allanut ministeriata Tysklandip Polenillu nunanut allanut ministerii pingasunngornermi ataatsimeeqatigissavai.

- Iliuuseqarusuppugut, Europamili suleqativut peqatigalugit taamaaliorusuppugut, Barrot oqarpoq.

USA-p præsidentianut Donald Trumpimut Kalaallit Nunaata USA-mit tiguarneqarnissaa "nunap isumannaatsuunissaanut pingaaruteqartoq"  præsidentip illuarsuata marlunngornermi unnukkut nalunaarnerata kingorna taama nalunaaruteqartoqarpoq.

- Soorunamilu USA-p sakkutuuinik atuinissaq naalagaanersap periarfissatut isigiuaannarpaa, nalunaarummi taama allassimasoqarpoq.

Trump Kalaallit Nunaannik sakkutuulersorfiginninnissamit qeqertaq pisiarerusunnerugaa Rubio, tusarliisut kinaassutsiminnik isertuussisut naapertorlugit, Kongressimi ilaasortanut oqarsimasoq, The New York Times aamma The Wall Street Journal marlunngornermi unnukkut allapput.

Tamannali pisortatigoortumik uppernarsarneqarsimanngilaq.

Marco Rubiomik ataatsimeeqatiginninnissamik noqqaassuteqartoq

Kalaallit Nunaata Danmarkillu naalakkersuisui – Frankrigi assigalugu – Marco Rubiomik ataatsimeeqatiginninnissamik noqqaasut, nunanut allanut ministeri Vivian Motzfeldt Facebookikkut marlunngornermi unnukkut  ilisimatitsivoq.

- Ataatsimeeqatigiinnissamik noqqaassuteqarneq sakkortusisaq USA-p nunarput pillugu oqariartuutigisaqattaagaannut tunngassuteqarpoq, taanna allatamini allappoq.

USA-p pisortaqarfiata Danmarkip Kalaallit Nunaatalu ataatsimeeqatiginninnissamik noqqaassutaat maannamut akissuteqarfigisimanngilaa.

Ataatsimiinnissamik noqqaassuteqarnerup nalaani Folketingimi Nunanut allanut tunngasunut Aalajangiisartoqatigiit "kunngeqarfiup USA-mut attaveqarnera" eqqartorniarlugu ataatsimiipput.

Amerikamiut Kalaallit Nunaanni pisut eqqunngitsumik saqqummiuttaraat, ataatsimiittoqareernerata kingorna nunanut allanut ministeri Lars Løkke Rasmussen (M) oqarpoq.

Kalaallit Nunaata eqqaani russit Kinamiullu umiarsuarpassuaqarneranik aamma Kinap aningaasaliinertigut sunniuteqangaarneranik Amerikamiut oqaaseqarsimanerat eqqunngitsuusut, ilaatigut taassuma oqaatigaa.

Trumpip 2019-imi siullermeerluni Kalaallit Nunaata Amerikamiunit pigilerneqarnissaa eqqartorpaa. 

Novembarimi aappassaannik præsidentitut qinigaaqqinnermi kingorna tamanna akuttunngitsumik eqqartortarpaa.

/ritzau/