EU-p Canadamiut Tunumi aatsitassarsioqatigiiffiat naatsorsuutigigaa

Europa-Kommissionip siulittaasuata Ursula von der Leyenip, aatsitassarsiorneq pillugu nunatta suleqatiginera Nuummiinnermini oqaluttuaraa.

Katuami oqalugiarnermini Mestersvigip kujasissuani Malmbjergip eqqaani suliniut Piiaaffik ilaatigut eqqaavaa.

- Una Kalaallit Nunaanni suliat annersaanniissinnaavoq. Ingerlatsilluarutta ukiumut 90 millionit eurot, tassa 672 millionit koruunit nalinginik isertitaqarsinnaavoq, Ursula von der Leyen oqarpoq.

Ruben Shiffman Greenland Resourcesimi pisortaavoq. Taassumalu kingulliit akuersissutigineqarsimalerpata, Malmbjergimi aatsitassarsiorfissap  sanaartorneqarnissaa qilanaaraa. Assi © : Markus Valentin / KNR

Greenland Resources Canadamiut aatsitassarsioqatigiiffiutigaat suliniuteqartuullunilu. Piiaanissamut akuersissut siorna juunimi pissarsiaraat.

Naalakkersuisut Politikkimut Aningaasaqarnermullu nalunaarusiaanni 2026-meersumi, aatsitassarsioqatigiiffik avatangiisinut sunniutaasussanik nalilersuinermut (ASN) inuiaqatigiinnilu piujuaannartitsinissamik naliliinermut (VSB) missingersuusiuleruttornera allassimavoq.

KNR-ip pisortaq Ruben Shiffman, Ursula von der Leyenip Jens-Frederik Nielsenillu (D) tusagassiortunik katersortitsereernerisa kingorna oqaloqatigaa.

- Pissangaqaanga. Suleqatigiinneruvoq Ittoqqortoormiinilu innuttaasut pingaarnersaapput. Iliuuseqarfigerusuttorujussuuagut. Tamanna piffissami eqqortumi naalakkersuisullu suleqatiginerisigut pissaaq.

Nunap suliniutaasa annersaat

KNR-ip, ingerlatseqatigiiffiup molybdæninik ukiumut 12,8 millionit tonsinik piiaasarnissartik naatsorsuutigigaat, Mestersvigillu talittarfianit sikoqannginnerani nunanut allanut assartorneqartarnissaat siornatigut allaaseraa.

Ingerlatseqatigiiffiullu timmisartuussisoqarsinnaalerniassammat nunatsinnilu atorluarneqarsinnaalerniassammat, Station Mestersvigip eqqaani mittarfik allanngortiterusullugu aamma eqqaanikuuaa.  

Malmbjerget Nunap Qeqqani sermit marluk akornanniippoq. Assi © : Greenland Resources

Piiaaffiliornissamut akuersissutit kingulliit pissarsiarineqarpata, Ruben Shiffmanip piiaaffimmik piareersaanissaq ukiunik sisamanik sivisussuseqassangatippaa. Taassuma tamatuma saniatigut Kalaallit Nunaata tunisaata ataatsimut nalingisa 30 procentiisa tungaannut piiaaffimmit akileraarutaasunit isertinneqarnissaat naatsorsuutigaa.

- Kikkut tamarmik molybdænimik Kalaallit Nunaanneersumik perusupput. Sakkussiornermi atugassat molybdænitaqartariaqarput.

Europamik suleqateqarneq

Muté B. Egede (IA), Nunanut allanut, Inuussutissarsiornermut Aatsitassanullu naalakkersuisoq, EU-mi politikerit oqaloqatigiartorlugit Bruxellesimut sapaatip-akunnera kingullermi angalavoq.

Europamiut suliffeqarfiutaannik arlalinnik nunatsinnit aatsitassanik tigooraasinnaallutillu suliarinnissinnaasunik angalanermini ujartuivoq.

Ruben Shiffmanip Greenland Resourcesip EU-mi arlalinnik qangali suleqateqarnera oqaluttuaraa. 

- Europami suliffeqarfiit sisammik suliaqartut annerpaartaat uagutsinnit suliassaminnik tigusisarnissaannik unioqqutinneqaqqusaanngitsumik isumaqatigiissuteqarfigaagut. Suliniut una takorluugaannaanngilaq, Europap sisammik tunisassiortuinit aningaasarsiorfissatut soqutigineqarpoq.

- EU-p aatsitassanik pingaaruteqartunik pilersuinermik qulakkeerinissaanut Kalaallit Nunaat ikiuutaasinnaallunilu Kalaallit Nunaata aningaasaqarneranik assigiinngisitaarinissaanut ikiuussinnaavusi. Taamaattoqarnissaanulli Europami pisiortornermi suliffeqarfissuaqartariaqarpoq, Muté B. Egede EU-mi sapaatip-akunnera kingullermi taama oqarpoq.  Assi © : Olivier Hoslet/EPA/Ritzau Scanpix

Finlandimi suliffeqarfik Outokumpu, sisammik manngertornineq ajortumik Europami sanaartorfiit annerpaartaat tassunga atatillugu eqqaaneqarpoq. 

Pisinissamut isumaqatigiissut ukiuni qulini atuuttussaq 2,4 milliarder dollarinik naleqarpoq ukiunullu 20-nut sivitsorneqarsinnaalluni, pisortaq oqaluttuarpoq.

- Aamma Sverigemi SSAB, sisammik sakkussiornermut atorneqartussamik tunisassiortut annerpaartaasa ilaat, unioqqutitassaanngitsunik isumaqatigiissuteqarfigaarput.

- Taakkua Reinmetal, Europami sakkussiortut annerpaartaat, isumaqatigiissuteqarfigalugu atsioqatigeqqammerpaat. Taamaattumik tyskit niueqatigiiffiata 80 procentiata missaat pilersorparput. Tyskit naalakkersuisui suliniummut peqataasorujussuupput, Ruben Shiffmann oqarpoq. 

Naalakkersuisut suleqatigineqarnerat

KNR Amerikamiut uuliasioqatigiiffiata Greenland Energyp naalakkersuisullu akerleriissuteqarnerat pillugu marsimili allaaserinneqattaarpoq.

Ruben Shiffmannip ingerlatseqatigiiffik alla oqaaseqarfigerusunngilaa. Taassumalli Greenland Resourcesip naalakkersuisullu suleqatigiilluaannaavissimanerat oqaluttuaraa.

- Nunarsuarmi tamarmi oqartussaasorpassuit suleqatigisimavavut. Oqarsinnaavungalu Kalaallit Nunaanni oqartussaasut pitsaasumik misilittagaqarfigalutigit. Iliuuseqarniarsareqaat, suliniutillu iluatsinnissaa kissaatigilluinnarpaat.

Taamatuttaaq pisortap oqaluttuaraa, avatangiisinut piumasaqaatit qaffasissut Kalaallit Nunaannilu allaffissoriaaseq Europami suleqataasa aporfittut isiginagit nakuussutitut isigigaat.

- Naalakkersuisut tapersersuilluarput malittarisassallu ersarilluinnartuullutik. Uanga isumanni avatangiisinut najoqqutassiat nunarsuarmi qaffasinnerpaajupput. Tamanna Issittumut tatiginarluinnartunngortitsivoq. Tamanna Europamiunut pingaaruteqarluinnarpoq.

Najugaqarfinni innuttaasut

Akuersissutit suli tamakkinngillat.

Taamaattumik pisortap ingerlatseqatigiiffiup Tunumi najugaqarfinni inuttaasunut qanoq tapiissuteqarnissaa oqaatigisinnaanngikkallarpaa.

Ittoqqortoormiini innuttaasut Amerikamiut uuliasioqatigiiffiannut Greenland Energymut uuliasioqatigiiffiullu naalakkersuisunik najukkamilu innuttaasunik suleqateqarnera pillugu akerliussutsimik juulimi takutitsipput. Canadamiut suliffeqarfianni pisortaq naalakkersuisunik Tunumilu najugaqarfinni innuttaasunik suleqateqarluarnerarpoq. Assi © : Malene Lynge

Ruben Shiffmanilli suleqatigiilluartoqarnera oqaluttuaraa tigussaanerusumillu oqaluttuarsinnaanngornissani qilanaaraa.

- Kangiata sineriaani najugaqarfinni inuiaqatigiit pissanganartorpassuarnik, suliniut piviusunngussappat,  periarfissaqalissapput. Tunniussaqarsinnaassaguttali suliniut aallartittariaqarparput.

Pisortaq Canadamiu danskimut katisimasuuvoq, apersuinerlu tuluttut pisup naggaserlugu danskisut oqalulerpoq.

- Pisussaaffeqareerpugut suliffeqarfittullu aaqqissuussaanitsinni avitseqatigiinnissaq siunertaraarput. Danskisut oqartarnitsitut:’Vi er gode mennesker’ (Inutsialaavugut aaqq.).