Dronning Margrethe januaarip 14-iani tunuassaaq. Dronningi tunuarpat kunngissaq Frederik nangitsissaaq.

Dronning Margrethep tamanna ukiortaamut oqalugiaammini oqaatigaa.

- Kunngiuneq erninnut kunngissamut Frederimmut tunniuppara, dronning oqarpoq.

Taamaalilluni naalagaaffeqatigiinni ukiuni 52-ini qullersaasimalerpoq.

Dronning 2023-p ingerlanerani qitermigut suliaritippoq, tassungalu atatillugu akisussaaffiup kinguaariit tulliinut ingerlateqqinnissaanut piffissanngunnginnersoq isumaliutigilersimallugu ukiortaamut oqalugiarami oqarpoq.

- Ukioq manna februaarimi qitikkut annertuumik suliaritippunga. Suliaritinnera peqqinnissaqarfimmi sulisut pikkorissut, uannik isumaginnilluartut pissutigalugit ingerlalluarpoq.

- Suliaritinnera siunissamik soorunami eqqarsaateqalersitsivoq - tassa akisussaaffiup kinguaariit tulliinut ingerlateqqinnissaa piffissanngunnginnersoq.

- Piffissaq maanna eqqortuusoq aalajangerpunga. Ulloq januaarip 14-iat 2024 - ataatama asasama kingoraarneranit ukiut 52-it qaangiuttut Danmarkip dronningiatut tunuassaanga.

- Kunngiuffik erninnut Kunngissaq Frederimmut ingerlateqqissavara, dronning Margrethe oqarpoq.

Kunngissaq sapaatit akunneri marluk qaangiuppata nangitsissasoq

Dronning tamatuma kingorna ukiut ingerlanerani "kissalaarfigineqarluartarnerminut tapersersorneqartarnerminullu" qujassuteqarpoq.

Dronning Margrethe 83-inik ukioqarpoq. Taanna 31-nik ukioqarluni angutaa, Frederik 9., 1972-imi toqummat dronninginngorpoq.

Dronning tunuarpat 55-inik ukiulik, kunngissaq Frederik kunnginngussaaq, kunngissallu nulia Mary dronningitut taaguuteqalissalluni.

Kunngissaq Frederik januaarip 14-iani kunnginngoruni kong Frederik 10.-mik taaguuteqalissaaq.

Dronning Margrethelu tamatuma kingorna Ataqqinartorsuarmik taagorneqaannassasoq, Ministeriuneqarfik nittartakkamini allappoq.

Mette Frederiksenimit qujassut

Ministeriunerup Mette Frederiksenip dronning Margrethe naalagaaffeqatigiinniittut tamarmik sinnerlugit qujassuteqarfigaa.

- Innuttaasut tamarmik sinnerlugit ataqqinartorsuaq dronning inuunini naallugu tunniusimalluartumik qasusuilluinnarlunilu Kunngeqarfimmut suliaqarneranik qamannga pisumik qujassuteqarfiginiarpara, Ministeriuneqarfik allakkatigut oqaaseqaammi allappoq.

- Naak naalagaaffimmi qullersaaneq kinguaariinni ukiut 1000-it sinnerlugit ingerlaneranni kingornunneqartaraluartoq maanna kinguaariinni nikittoqarnissaanut piffissanngortoq akueriuminaappoq.

- Amerlasuut allamik qullersaqarnera nalaannikuunngisaannarpaat. Dronning Margrethe Danmarkimi ilaajuarpoq, ukiorpassuillu ingerlanerani inuttut inuiaqatigiittullu kikkuunersugut oqaasertalerlugulu misigissutsitigut takutittarpaa.

- Unnummulli piffissamilu aggersumi dronningip Danmarkimut, Savalimmiunut Kalaallit Nunaannullu qanoq isumaqarnera assortugassaanngitsoq nersualaarutissavarput. Naligiimmik qujamasullutalu nersorinnipput.

Assi © : Scanpix