Danmark nunatsinni pisortat inissiaataannik nutarsaanissamut ikiuukkusuttoq

Statsminister Mette Frederiksen (Socialdemokraterne) aamma naalakkersuisut siulittaasuat Jens-Frederik Nielsen (D) Kalaallit Nunaanni ineqarnermut tunngasunik ineriartortitsinissaq pillugu ataasinngornermi atsioqatigiipput.

Isumaqatigiissut ministeriunerup Nuummiinnerani atsiorneqartoq, ministeriuneqarfiup nittartagaani takuneqarsinnaavoq.

Kalaallit danskillu suleqatigiissitaliornissaat isumaqatigiissummi allassimavoq.

Suleqatigiissitaliap "Kalaallit Nunaanni illoqarfinni nunaqarfinnilu pisortat inissiaataasa attartortittakkat nutarterneqarnissaat“ pillugu aalajangiinissamut tunngaviliussassaq suliarissavaa.

Naalakkersuisut inissiaqarfiit aserfallatsaalineqarnissaannut 2,5 milliardit koruunit sinnerlugit kinguaattoorfiunerat siornatigut missiliuuppaat.

Ukiup tulliuttup qaangiutinnginnerani

Suleqatigiissitaq 2027-mi upernaakkut naammassissaaq, Danmarkimilu naalakkersuisut Kalaallit Nunaannilu naalakkersuisut suliniutit aningaasalersuinissarlu tamatuma kingorna isummerfigissavaat.

- Suleqatigiissitap aningaasaliiffigineqarnissamut pisariaqartinneqartut pingaarnerit nalunaarsussavai Danmarkimiillu Kalaallit Nunaanni inissiaateqarnerup tungaatigut ineriartortitsinermut aningaasaliissuteqartoqarnissaanut siunnersuutinik saqqummiussissalluni, siunertamut nalunaarummi taama allassimavoq.

- Aningaasaateqarfiit tamatumunnga atatillugu pilersinneqarniarneqarsinnaapput aamma EU namminersortullu peqataatinneqarsinnaapput.

EU-Kommissionip siulittaasua, Ursula von der Leyen, Kalaallit Nunaannut ulluni kingullerni tikeraarpoq, taassumallu Issittoq pillugu EU-p ukiamut periusissiornissaa nalunaarutigaa.

EU-p, Kalaallit Nunaata Danmarkillu nukissiornermut, digitalimik attaveqarnermut aatsitassanullu pingaarutilinnut tunngasunik suleqatigiinnerulernissaq pillugu ataatsimut nalunaarummik Kalaallit Nunaannut tikeraartoqarnerani atsioqatigiipput.

Ataatsimut nalunaarut EU-mit 200 millionit euronik aningaasaliiffigineqassaaq.

RITZAU