Mette Frederiksen: Naalagaaffeqatigiinneq pisarnermisut issanngilaq
Naalakkersuisut siulittaasuat Jens-Frederik Nielsen (D), Savalimmiormiut lagmandiat Beinir Johannesen (Fólkaflokkurin) danskillu ministeriunerat Mette Frederiksen (S) Nuummi ippassaq ataatsimeereerlutik Qooqqunukarput.
Neriniartarfimmullu Qooqqut Nuannimut isinnginnerminni tusagassiortunit tamarmik immikkut apersorneqallatsiarput.
Danskit ministeriunerata ataatsimiinnermi suna eqqartorneqarsimanersoq siulliullugu oqaatigaa.
USA ataatsimiinnermi eqqartorneqangaatsiartoq
Amerikamiut præsidentianit tatineqarneq suli initoorujussuuvoq, ministeriunerup nassuerutigaa. Siuttut pingasut suut eqqartorneqarnerusimanersut KNR-imit aperineqaramik, Mette Frederiksen ingerlaannarluni ilumoorsaarlunilu akivoq:
- Sillimaniarnermut politikki.
Allalli aamma oqaluuseraagut, danskit ministeriunerat Qooqqut Nuannimut isingajalerlutik oqarpoq.
- Naalagaaffeqatigiittut allanik aamma isumagisassaqarpugut. Pilersaaruteqarnermik isumaqatigiissutit atsiukkatta ilaat, ineqarnermut politikkimut aamma Kalaallit Nunaanni inissiat amerlanerusut qanoq iluarsartuussinnaanerinut tunngassuteqarput. Taamaattumik (USA-mut tunngatillugu inissisimaneq, aaqq.) soorunami sunniuteqarpoq. Kisianni taanna kisiat eqqarsaatiginngilarput.
Naalagaaffeqatigiinneq nutarterneqassasoq
Naalagaaffeqatigiinneq maannakkutut iinnassanersoq allanngortitassaqarnersorluunniit KNR-ip apeqqutigaa. Mette Frederiksenillu “pissutsit taamaaginnassannginnerarpai’.
- Naalagaaffeqatigiinneq nunarsuarmi massakkutut ittumiissaguni nutarterneqartariaqarpoq. Ukiut matuma siorna ima aperigaluarumma: ‘Ataatsimiinnissinni suna eqqartorneruisiuk?’, allatut akissagaluarpunga. Illersornissamut sillimaniarnermullu politikkimut piffissaq taama annertutigisoq atorutsigu, nunarsuarmi pissutsit allanngorujussuarnerat eqqissiviilliortoqarneralu, pissutaapput:
- Nunatta pingasut akornanni sillimaniarnermut politikkip inissisimanera, piffissap sivikitsup iluinnaani allanngorujussuarsimavoq. Taamaattumik pissutsit taamaaginnarnissaat takorloorsinnaanngilara.
- Isumaqarpunga ataatsimut nukittunerulluta. Naalagaaffeqatigiinnitsinni arlalitsigut nukittuffeqarpugut. Naalagaaffeqatigiinnitsinnili nunat taakku pingasut pisariaqartitaat malillugit, minnerunngitsumillu avataaniit saassunneqarnerit akisinnaanissaannut allanngoriartortoqassaaq, ministeriuneq oqarpoq.
Jens-Frederik Nielsen sivitsunngitsoq sassarpoq. KNR-ip naalagaaffeqatigiinneq ingerlaannassanersoq imaluunniit allanngortinneqassanersoq apeqqutigaa.
Tassunga atatillugu ima akissuteqarpoq:
- Naalagaaffeqatigiinnik nutarsaaneq ukiuni arlalinni maanna oqaluuseraarput. Matuni matoqqasuni oqaluuserisaqaraangatta - matut matoqqatinneqarneranut pissutissaqartarpoq. Kisianni atassuteqarnerput ingerlaavartumik oqaluuseraarput, aamma suleqatigiinnerput ingerlaavartumik oqaloqatigiissutigaarput, tamanna ileqquulluartuusoq isumaqarpunga, siulittaasoq oqarpoq.
Savalimmiunit misilittakkat
Savalimmiuni lagmandi, Beinir Johannesen (Fólkaflokkurin) naggasiutigalugu oqaaseqarlunilu apeqquteqarfigineqarpoq.
Savalimmiuni lagmandi, Beinir Johannesen (Fólkaflokkurin) naggasiutigalugu oqaaseqarlunilu apeqquteqarfigineqarpoq.
Taassuma Savalimmiut nammineernerulernerunissaminik kissaateqarnera aningaasaqarnerminilu ineriartornera oqaluuseringaatsiarpaa.
Taamaammat nunatta Savalimmiut naalagaaffeqatitut aningaasaqarnikkut ineriartornermik qanoq ilikkagaqarfigisinnaaneraa, KNR-imit apeqqutigineqarpoq.
- Aap, taamaattoqarsinnaavoq. Aamma immitsinnut ilinniarfigisinnaasugut isumaqarpunga, Beinir Johannesen oqarpoq.
- Nammineerneruniarsariinnavippugut, aamma aningaasaqarnikkut. Naalakkersuisut uku naalagaaffimmit tapiissutissagut nikittussaajunnaarsinniarlugit aalajangerpaat. Aningaasaqarnerummi ineriartornera ilutigalugu tapiissutit annikinneruleriartorput. Aningaasaqarnikkut nammineernerulernissamut alloriarnerusoq oqaatigineqarsinnaavoq.
- Inuussutissarsiutinut aamma tunngatillugu inuussutissarsiummik ingerlatsinissamut atugassarissaartitsinissamut aamma tunngassuteqarpoq. Tamanna aalisarnermut kapisilinnillu kinguaassiortitsinermut allatigullu iluatsitsiffigilluarpugut, kisianni inuussutissarsiornerup pitsaasuullunilu nukittunissaa pisariaqarpoq. Tamanna aamma pingaaruteqarpoq.
Apeqqutinik assigiinngitsunik - EU-p aningaasaliinissamut isumaqatigiissutaanut, saammaateqatigiinnissamut isumalioqatigiissitassamut aamma Donald Trumpip Kalaallit Nunaannut tunngatillugu saqqummersitaanut kingullermut tunngasunut akissuteqareeramik - neriniartarfimmut atorfilinnik aamma kalaallit danskillu politikeriinik nereqateqassallutik iserput.
