Avannaata Kommunia asfaltiliuummik pisiniarpoq

Avannaata Kommuniata ukioq mannamut sanaartugassatut aningaasaligaani, asfaltiliuut umiarsuaatileqatigiiffiup Royal Arctic Linep umiarsuaataannik assartorneqarsinnaasoq pisiarineqassasoq allaqqavoq. Taanna millioninik pingasunik akeqassaaq.

Kommunimi illoqarfinni, Uummannami, Upernavimmi Qaanaamilu atorneqartassaaq. Upernavimmi asfaltiterinissaq aasamut 3 millionit koruunit nalinganut pissasoq, Avannaata Kommuniani teknikkimut ataatsimiititaliap siulittaasua, Inuit Ataqatiinneersoq, Niels Davidsen KNR-mut paasissutissiivoq.

Tamanna Upernavimmi eqqaavilerisut anartarfinnillu puussiartaleqqittakkanik passussisartut aqutsisuata iluarisimaaqaa. 

- Tusarluartorujuuarput assorsuaq. Manna illoqarfik aqqusinilulaarami, K´ajoránguak´ Grønvold KNR-mut oqarpoq.

Taakkua sulinerminni aqqusernit amippallaarneri piffissartuutigisaraat, aqutsisoq oqarpoq.

- Taava biilit saneqqunniarneranni arriinnalaartarami.  Amippallaarneri peqqutigalugit biilit uninngasariaqartaramik.

Upernaviup illoqarfia narsaamanertakilluni  sivingajaarsuuvoq. Tamannalumi aamma aqqusernit atoruminartuaannannginnerannik peqquteqartoq, Upernavimmi kommunip ataani silami sulisut aqutsisuat oqarpoq. Aasakkut aqqusinigissaagaluarneq upernarnerani isumaaruttarpoq. 

- Upernavik uigagami. Taamaattumik aqqusernit asfalterneri upernaami katangartuaannaavipput.

K´ajoránguak´ Grønvoldip eqqaamasai naapertorlugit, Avannaata Kommunia Upernavimmi asfaltimik kingullermik 2018-imi aqqusinigissaagaluarpoq. Aqqusiniginnerli sivisunaarneqanngilaq.

- Nutaamik qalleraluarput. Kisianni oqareernittuut upernartorlu aqqusininnguagut kuuguttaramikkit ajorluartumik.

Ataasinngornermi nalunaaqutaq 13.00 naqqiut: Upernavimmi aasamut asfaltilerinissaq asfaltiliuummik nutaamik pissanngilaq. Aqqusineq siornatigutut suliarineqassaaq, kingornatigulli aatsaat asfaltiliuut nutaaq atulissaaq.