Narsap Sermia tatineqartoq – Nuup kangerlui Ilulissatulli iluliarasaartalersinnaapput

Aalisartut umiarsuaatillillu Nuup Kangerluata kassulissuunera ukiup affaata matuma siorna ajornartorsiutigaat.

Tamanna immaqa aallaqqaataannaasoq, misissueqqissaarnerit nutaat takutippaat.

Sermeq uukkartartoq Narsap Sermia maanna tiffariartupallappoq – tamannalu Nuup eqqaani uumassusilinnut kinguneqarsinnaavoq.

Silap pissusaanik ilisimatusarfiup ilisimatuussutsikkut allaaserisaani nutaami erserpoq sermeq uukkartartoq 2003-milli 6,7 kilometerinik tiffariarujussuarsimasoq.

Sermeq iigartartoq, Narsap Sermia, ukiut marluinnaasut ingerlaneranni 2 kilometerinik tiffasinnerulersimavoq.

Nuup Kangerlua Ilulissat kangerlua assigalugu iluliarasaartalissanersoq, imaluunniit sermeerutiimeqqissanersoq, maanna apeqqutaalerpoq. John Mortensen, Kalaallit Nunaanni Silap Pissusianik Ilisimatusarfimmi ilisimatusartoq taama nassuiaavoq.

- Sermip iigartartup tiffariartornera timmut kilometerip ataatsip nalaani uninngippat, tiffariartorneq nangiinnassaaq, tamannalu kangerlummi angalanissamut ajornakusoornerulersitsissaaq.

Karsoqarneruneq annilaarnartoq

Sermip iigartartup tiffariartorneranut nammineerani, sarfalli kissartut sermillu naqqani imeq aanneq pissutaasut, misissuinerit takutippaat.

Sermeq iigartartoq akimmiffeerukkaangat, tiffariartorneq sukkatsittarpoq.

Tiffariartupiloorneralu ukiuni 2010-2012-imisulli ukiumut kilometerit 1,2 missaanniittassappat, taava Narsap Sermia nunap qaani isuliffeqalernissami tungaanut ukiut 24-it missaasa iluani tiffariartulersinnaasoq, ilisimatusartut ilisimatitsipput.

- Ukiunilu taakkunani Nuup Kangerlua ukioq kaajallallugu tupinnaannartumik annertuumik ukioq kaajallallugu iluliarasaartuartassaaq, John Mortensen nassuiaavoq.

Aalisartut sunnugaasut

Misissuineq sermip iigartarnerata tiffariartorneranik paasisaqarfiuinnarani, aamma pissutsit ataqatigiinnerinik paasisaqarfiuvoq.

Immap kissassusiata allanngoriartornera pissutaanerpaasoq, sermimuinnaangitsorlu  kingunerusussaqartoq, ilisimatusartuunerup Lorenz Meirep oqaatigaa.

- Allannguutit tamakkua kangerlutta qanoq kasoqartiginissaannut, uumassuseqarnerup ataqatigiinnerinut inuiaqatigiinnullu avatangiisiusunut toqqaannartumik sunniuteqarteqarput. Ilisimatusaatip nutaap allannguutaalereersunik paasinninnissatsinnut immaqalu allangoriartornermut piareersarnissatsinnut pingaaruteqartunik ilisimasaqalersippaasigut, Lorenz Meire, Kalaallit Nunaanni Silap Pissusianik Ilisimatusarfimmi ilisimatusartuuneq, nassuiaavoq.

Sermip nungimanera nunap qaani isuffeqalissappat, tamanna Nuup Kangerluani aalisarnermut sunniuteqarsinnaasoq, John Mortensen oqaluttuarpoq. Narsammi Sermia Nuup Kangerlua Ameralimmit ullumikkut uumasorpassuaqarneruneranut qulakkeerinnissutaavoq.

- Sermip iigartarneranit immap ernga inuussutissaqarluartoq qaffatsittarpaa. Sermeq imaanut atasumik iigarfeeruppat, tamanna inuussutissagissaarunnaamissaaq, John Mortensen oqarpoq.