Asii Kleist Berthelsen FCK peqatigalugu ligamut qaffappoq

FC Københavnip arsaannermi arnartai A-ligamut qaffapput qularnaalluartumik FC Thy/ThistedQ qularnaalluartumik sapaatip akunnera kingulleq ajugaaffigereerlugu. FC Københavnip kalaalersaa tassaavoq Asii Kleist Berthelsen arsaattartuunermini aappassaa Danmarkimi pikkorinnerni unammisartuusussanngortoq.

FC Københavnip arnartaasa ukiut marluk kingulliit anguniagarivaat A ligamut qaffannissartik. Tamanna iluatsippoq naak suli unammineq ataaseq amigaataagaluartoq.

- Assorujussuaq oqiliallannarpoq ilanngunnissara sioqqulluguli qaffannissaq anguniarneqarmat, Asii Kleist Berthelsen KNR-imut oqarpoq.

Akisussaaffik anginerusoq

Iligiit inuusoqisunik arsartoqarput ukiup unammiffiusup ingerlanerani nutarternermik aqqusaagaqartunik.

- Iligiittut sungiunniaqqaarpugut. Maanna isumaqarpunga arsarluartarluta aamma sungiusaammik unamminerni A-ligami unammisartunut naligiiginnartarlutalu ajugaasarluta, Asii Kleist Berthelsen oqarpoq.

14-iinnarnik ukioqarluni Danmarkimut nuuppoq arsaannermi pikkorinnerulerniarluni. Siuariartorluaqaarlu. Fortuna Hjørringip A-ligami unammisartuiniippoq taamaattoq paarlatsissamaatitut atorneqarnerulluni.

Maanna 22-innarnik ukioqarluni iligiinni akisussaaffeqarnerulerpoq.

- Hjørringimi unammisartuugallarama 16-18-iinnarik ukioqarpunga, Hjørring arnani A-ligami pikkorinnerit ilagaat. Taamaattumik paarlatsissamaataanerusarpunga minutsit kingulliit aatsaat isersimanerusarlunga, Asii Kleist Berthelsen nassuiaavoq.

1. divisioniimi FC København suli ataasiarluni unammisussaavoq FC Midtjylland unammissallugu tamannalu naammassippat qaffariarneq nalliuttorsiutigineqarumaarpoq.