Arsaannermi pissartanngorniunnissami peqataaniarunnaartorpassuit
Angutit inersimasut silami arsaannermi Nunatsinni pissartanngorniunnerisa NP- mi naggataarneqarnissaani iligiit sisamat taamaallaat peqataasoralugit pissartanngorniunneq Maniitsumi aggustip sisamaanni aallartissaaq. Pilersaarutit malillugit iligiit qulit peqataasussaagaluarput.
Iligiit aatsaat taama ikitsigisut ukiorpassuanngortuni pissartanngorniunnerni angutit arsaannermi pissartanngorniunnerisa naggataarneqarneranni peqataassapput.
Iligiit arfineq pingasut angutit unammersuarnerisa naggataarneqarneranni ukiorpassuarni peqataasarput, anngunniunnerit aqqusaaqqaarlugit peqataasarlutik.Iligiit qulit ukioq manna peqataasussaagaluarput. Peqataaniarunnaartulli tulleriiaarlutik nalunaaqattaarput.
- Peqatigiiffinniit ilisimatinneqarpugut arsartut ilarpassui sulinngiffeqarfissat tamakkerlugit atoreeramikkit sapaatip akunnera aallaqqallutik suliffitik qimassimasinnaanngikkaat, arsaattartut kattuffianni KAK-mi siulittaasoq Kenneth Kleist KNR-imut oqarpoq, tunngavilersuutinillu allanik aamma apuussiffigineqarluni.
- Aamma paasinarsivoq Maniitsumut angalaniarneq ajornakusoortoq takornariat timmisartut tikiffissaanni amerlagisassaanngitsuni inniminneereersimammata. Imaatigut angallassissutit aamma ulikkaareersimapput inissaqarniarnerlu immaqa aamma ajornakusoorluni inissiffiusinnaasut inniminnerneqareermata, Kenneth Kleist oqarpoq.
Iligiit maanna peqataasussat tassaalerput Aqissiaq Maniitsoq, G-44 Qeqertarsuaq aamma B-67 kiisalu IT-79 Nuummeersut.
Oqaluttuarisaanermi allannguinissaq
- Siusinnerusukkut avammut nalunaaruteqartassaagut tamannalu malitseqartillugu peqatigiiffiit ikiorlugit angalanissamut pilersaarusiornissaq inniminniinissarlu taakkununnga ajornannginnerussammat, arsaattartut Nunatsinni siulittaasuat oqarpoq.
Nunatsinni pissartanngorniuttarnerup angisuumik allanngortinnissaa KAK-mit piareersarneqarpoq.
- Maanna oqaatigereersinnaavara Nunatsinni pissartanngorniuttarnerit allannguutaasa taanna maannamut annersarissagaat. Neriuutigaarput tamanna ataatsimoornerunermik unamminerillu amerlinerannik aammalu NP-mi peqataanissap ukioqqortussutsini tamaginni kajumigineqarnerunissaa anguniarlugu, Kenneth Kleist oqarpoq.
Siunissamili unammersuariaasissap qanorpiaq iluseqarumaarnissaa oqaatigisinnaanngikkallarpaa.
- Peqatigiiffiit qaninnerusumik KAK-miit suleqatigineqassapput ajornartorsiutit takkussinnaasut ataatsimut qaangersinnaaniassagatsigit. Pimoorussamik siunissaq ungasinnerusoq eqqarsaatigalugu eqqarsaatersorpugut, Kenneth Kleist oqarpoq.
Nalunaarneq pisussaaffiliivoq
Peqataaniarunnaartut aasap ingerlanerani ilisimatitsisareersut iligiit maanna sisamaannanngorput.
- Oqaloqatigiinneq malitseqartitsineq ataatsimoornerlu pingaaruteqarput. Akuttunngitsumik nittartakkakkut ilaasortat ataatsimeeqatigineqartassapput arsartut, sungiusaasut namminerlu piumassutsimik suliniartut ammasumik pissutsinik periarfissanillu eqqartuisarniassammata, KAK-mi siulittaasoq Kenneth Kleist oqarpoq.
- Arsaanneq futsalilu ingerlalluaqqullugit kikkut tamaasa ikiorusuppagut. Peqatigiiffinnut sullissivik ammarpoq aaqqissuussaasumik peqatigiiffiit suleqatigalutik pissutsit eqqartorsinnaallugit. Peqatigiiffinnut neqerooruteqarumaarpugut isumassarsianik, ilinniartitaanermik aammalu meeqqat inuusuttuaqqallu sammillugit. Taakkuuppummi Nunatsinni arsaannermik ingerlassisussat, Kenneth Kleist oqarpoq.
Aaqqissuusseqqinnissamut suleqatigiissitaliortoqarpoq unammersuariaatsillu ilusissaanut inassuteqaatit oktobarimi saqqummiunneqassapput. Unammersuariaaseq nutaaq 2027-mi atulersussatut pilersaarutaavoq.
