Arsaannermi nunanut allanut unammisartunut inuusuttut peqataanerulerusupput
Qeqertarmiut unammiuaarnissaannut Island Gamesimut arsaannermi nunanut allanut unammisartut piukkussarnerat sukappoq. Maanna qasujaassuseq minnerunngitsumillu arsaqatigiissinnaassuseq pitsanngorsarneqassapput ukiuunerani unikkallarneq sioqqullugu aamma makitsinissap pissanngataasup utaqqinerani.
Tyrkiami sungiusaqatigiinnissamut arsaattartut 18-it toqqarneqarput.
- Aasaq sioqqullugu iluatsilluaqisumik Italiamut angalanitsinnik nangitsinerussaaq taamanikkullu unamminerit arlalissuit peqataaffigaavut. Maanna nunanut allanut unammisartutut inerisarneq nangittussanngorpoq, kalaallit nuna tamakkerlugu sungiusaasuat Morten Rutkjær KNR-imut oqarpoq.
- Assigiinngitsorpassuit sungiusassavavut unamminissat tamatumuuna eqqarsaatigivallaarnagit, Morten Rutkjær oqarpoq.
Nangitsineq
Ukiorpassuarni ileqquuvoq Nunatsinni pissartanngorniunnerup kingorna nunanut allanut unammisartunut piukkussanik toqqaasarneq.
Ukioq manna aamma taama pisoqarpoq. Inuusulluinnartut maluginiarneqarput aamma nuna tamakkerlugu sungiusaasumit arajutsineqaratik. Inuusuttut Italiami Conifa Cupimi bronzennaqataasunut maanna unammillerlutik toqqagaaniartalerput.
- Italiami angusarissaarnerput nangeqqikkusupparput. Kattuffimmi aamma nunanut allanut unammisartuni piffissanngorsoraarput inuusulluinnartut misilittarnissaannut, Morten Rutkjær oqarpoq.
- Pissartanngorniunnermi Maniitsumi malinnaagama pitsaassuseq aatsaat taama qaffasitsigisoq takuara. Arsaattut arlalissuit takutitsilluartut takuakka. Taamaattumik nutaanik misiliisitsiniarlunga massakkut aalajangerpunga, Morten Rutkjær oqarpoq.
Island Games
Nunanut allanut unammisartuni assersuineq pingaartinneqartunut ilaalluinnarpoq maannalu inissisimaffimmi tassani inuusulluinnartut peqataasalerput.
- Tamatuma ukkatarinerani pitsaalluinnarpoq misilittagaqarluartunik tassani arsartoqaratta inuusulluinnartut tulaavigisinnaasaannik tassanngaanniillu inerisaaqqillutik, Morten Rutkjær oqarpoq.
- Maannakkut 15-16-17-inik ukiullit peqataassapput. Toqqarneqarput pikkorilluinnartuugamik aamma siumukarnermik takutitsigamik, Morten Rutkjær oqarpoq.
Siunissaq ungasinnerusoq isigalugu Savalimmiuni Island Games aappaagu siunnerfiuvoq. Unammersuarnermili tassani iligiit 16-it kisimik peqataasinnaapput unammersuarnerlu sioqqullugu anngunniuttoqarnaviarani.
Savalimmiuni aaqqissuisut KNR-imut ilisimatitsipput qeqertat sorliit peqataanissaat pillugu oktobarimi sapaatip akunnera siulleq makitsisoqarumaartoq.
