Aningaasanut inatsisissatut siunnersuut: Amigartooruteqarnerup annikillisinneqarnissaa

Allaaserisaq 10.3 nutartigaavoq.

Naalakkersuisut 2024-mut aningaasanut inatsisissatut siunnersuut ullumikkut saqqummiutissavaat.

Assuarliillutik oqaluttut kisitsisit pikkunaaginnartutut taassavaat, kisiannili aningaasaqarnermik aqutsisuusut ”dødens gab”-imik taasimasaat - tassa inuttussutsip ingerlaasiata nunatta karsianut annertuumik ajornartorsiortitsinera - aamma eqqartorneqarumaarpoq.

Utoqqaammi amerlanerulerpata pisortat aningaasartuutaat annertusiartortut, utoqqarnut taama amerlatigisunut tapiissutaasussat, suliffeqarsinnaasunit ikinnerulersimasunit akilersorneqartussaassapput. Tamanna nunarsuaq tamakkerlugu ajornartorsiutaavoq - aamma nunatsinni.

Taamaammat nunarput aningaasarsiornerulertariaqarpoq tamannalu ilutigalugu pisortat aningaasartuutaat annikillineqartariaqarput.

Tamanna qulakkeerniarlugu ukioq manna aningaasanut inatsimmi nunatta aningaasaataat ukiumiit ukiumut qanoq amerlatigisut politikerit atorsinnaaneraat killilerneqarsimapput. Tassa imatut paasillugu, ingerlatsinermut, tapersiinernut sanaartornermullu ukiumut aningaasartuutit annerpaamik procentimik ataatsimik qaffariariaateqarsinnaatitaapput - ukiunullu sisamanut katillugit aningaasartuutit taakku procentinik marlunnik qaffariaateqarsinnaallutik.

Tamanna politikerit aningaasanik atuiinnarsinnaannginnerannik isumaqarpoq, aningaasanilli atuinissaminnut missingersuullu killilersorneqarnissaa isumagisariaqassavaat.

Tamanna ilutigalugu pisortat aningaasartuutaat nalimmassarniarlugit akileraarutinik aaqqissuusseqqittoqarsinnaanera kiisalu namminersortut aningaasarsiornerulersinnaanerat immikkut ilisimasallit aamma oqariartuutiginikuuaat.

Akileraarutinik aaqqissuusseqqinneq aningaasarsiornerulersitsissaaq

Aningaasat tamakku qanoq atorneqarnissaannut aamma pisortat aningaasartuutaat annertusiartortut Naalakkersuisut qanoq aaqqiissuteqarfigissaneraat ullumi nalunaaqutaq 14.00 tusagassiortunik katersortitsinermi Naaja Nathanielsenip saqqummiutissavai. Taannali siornatigut akileraarutinik aaqqissuusseqqittoqarnissaanik siunnersuuteqarnikuuvoq.

Tamassumunngali atatillugu amerlanerussuteqalersitsinissaq iluatsissinnaasimanngilaq - taamaattumillu pilersaarutit taakkua piviusunngortinneqarsimanatik.

Nalinginnaasumimmi kissaatigineqartartoq tassaavoq nunatta aningaasaatai amerlanerusut namminersortunut "sulinermullu” atorneqartassasut - tassa allannguinikkut - neriuutiginartumillu taamaasillutik aningaasarsiornerulersitsissasut.

Aningaasaqarnermut Siunnersuisoqatigiit aamma assinganik oqariartuuteqarsimapput. Pisortat ima alliartorsimatigaat allaat namminersortunik annertuumik inangiisimallutik.

Taamaammat akileraarusersueriaaseq ima ittoq aamma tikkuarnikuuaat, akissarsiaqqortunerpaat annermik akileraartinneqartalissasut - killormoortuanillu.

Sunarpiarli tusagassiortunik katersortitsinermi saqqummiunneqassanersoq aatsaat nalunaaqutaq 14.00 paasiumaarparput.