Jessie Kleemann eqqumiitsuliornermi suliaqarnini pillugu inuunermi sinnera akissarsisalertussanngortoq

Jessie Kleemannip killitsisimasup ullumi pisut oqaasertalersorniarsarai.

- Suna? Ilumoorpa? Naatsorsuutiginngingaarakku nipaarutiivippunga, Jessie Kleemann sapaatip akunnerata matuma siorna sianerfigitinnini pillugu oqarpoq.

Taassuma sianerfigineqarnera naatsorsuutiginngisaminik nalunaaruteqarfiuvoq. Jessie Kleemann Statens Kunstfondimit inuunermi sinnerani tapiissuteqarfigineqartalertussatut toqqarneqarsimavoq.

Statens Kunstfondip kalaaleq eqqumiitsuliortoq eqqumiitsuliortuni arfinilinni ataqqinaammik ukiaq manna nersornaaserneqartussani ilaasoq marluinngornermi saqqummiuppaa.

Inuunerup sinneranut tapiissut eqqumiitsuliortunut eqqumiitsuliornermi suliaqarnermi pingaarutilimmik malunnaatilimmillu sunniuteqarsimasunut tunniunneqartarpoq. 

Jessie Kleemannip taama nersornaaserneqarneq misigiumaarlugu naatsorsuutigisimanngilaa.

- Eqqumiitsuliortutut suliaqarninnik aamma ukiorpassuarni sammisannik nersorinninneruvoq. Oqaluttuarisaanerup nassatatta aamma tamatuma uagutsinnut, uanga kalaaliullunga aggerfigisannut qanoq sunniuteqarnera pillugu suliaqartarpunga, eqqumiitsuliortoq oqarpoq.

Quiasaarneq, anniaat nunasiaataanermilu oqaluttuarisaaneq

Statens Kunstfondip nersornaasiinerminut tunngavilersuutitut Jessie Kleemann kalaallit, danskit nunarsuarmioqatigiillu akornanni takutitsinerup, taalliornerup assilialiornerup videoliornerullu ataatsimoortinnerani pingaarutilimmik 1980-ikkunnili inissisimasoq allappaa.

- Kalaaliunerminik aallaaveqarluni kinaassuseq, kulturi, pinngortitaq, sumut atassuteqarneq pissaanerlu ingerlaavartumik misissuiffigineratigut inuunermut qanittut politikkilu ataatsimoortippai.

Jessie Kleemann saqqummersitsinermi ilaanut atatillugu assilineqarpoq. Assi © : Hans Christian Jacobsen/Ritzau Scanpix

Kunstfondenillu Jessie Kleemannip timini “atortussatut, oqaluttuassatut akiuunnermullu” qanoq atortarneraa aamma nassuiaatigaa.

- Quiasaarneq, taalliorneq, sanngiissuseq, anniarneq nunasiaataanermiillu oqaluttuarisaaneq eqqumiitsuliaani misigissutsikkut atuisuni toqqaannartumik ilaatigullu sakkortuumik sunniuteqartarput. Politikki ungasianiit isigineqarsinnaanngilaq, kisianni timikkut najuunnikkut erseqqinneqartarluni.

- Oqaluttuarisaanermi misilittakkat ullutsinnilu pissaaneqarnermut tunngasut tigussaasunngortinneqarlutillu qanillisinneqartarput. Tamatuma saniatigut Kalaallit Nunaannut tunngatillugu aalajangersimasumik takorluuisarneq unammillerneqarluni kalaallit kinaassusaat namminerlu oqaluttuarisaanermik oqaluttuarnissamik nassuiaateqarnissamillu takutitsiffiulluni ersersinneqartarluni, tunngavilersuummi allassimavoq.

Ataqatigiilluinnarneq ilaasoq

Jessie Kleemann Upernavimmi Aasiannilu inunngorlunilu peroriartortoq Københavnimi ullumikkut najugaqarpoq.

Taassuma pinngorfini kulturinilu eqqumiitsuliornermini pingaartitai.

- Nunarsuarmi sumi inissisimaninnik piffissap ilaani paasinninnissara pingaaruteqartarpoq. Danmarkimi najugaqarninnut tunngaannanngilaq, kisianni oqaluttuarisaanerput, suut anniaatit ilungersuussinerillu aqqusaarsimanerigut nassatarisaratsigu. Uanga oqaluttuarisaanera ataatsimoortumik oqaluttuarisaanermut annerusumut ilaavoq, Jessie Kleemann oqarpoq.

Taassuma isiginnaartitsineq, grafikki, taalliorneq takutitsinermillu eqqumiitsuliorneq piffissap ingerlanerani suliaqarfigisimavai.

Naallu eqqumiitsulioriaatsit assigiinngitsuugaluartut taakku tassunga qanimut ataqatigiipput.

- Soorlu imarujussuarmiilluni pissutsit ajornakusoortutut misigillugit, kisianni aamma sumiiffimmik kusanartoqarpoq, tassunngarniarsarillutalu.

- Takutitsinikkut eqqumiitsuliornerup paasinissaa pingaartissimavara, inuunermi aqqutissaava, taanna akissutissamik naatsorsuuteqarani aperivoq.

Jessie Kleemann Københavnimi Contemporary Copenhagenimi, Vejlemi Spinderihallini, Ikastimi Kunstpakhusetimi aamma Koreap kujataani Gwangju Biennale 2026-mi piffissami matumani saqqummersitaqarpoq.

Eqqumiitsuliortut katillugit 275-it tapersiissutinik 2026-mi nersornaaserneqarput.