Amerikamiut TV-ata kalaallip arnap paniatalu toqutaanerat sammerusukkaa

Arnaq kalaaleq panialu Danmarkimi ukiut 21-t matuma siorna toqutaapput. Amerikamiut tv-qarfiat suliaq pillugu pisimasuinnik tunngavilimmik isiginnaagassiornissamut maanna piareersarusuppoq.

Allattoq Malik Brøns

septembarip 06-at 2021 11:27

Nutserisoq Connie Fontain

Kalaallip 22-nik ukiullip, Carla Clasenip taassumalu paniata Natuup timaat Fanømi ippimmi sioraannaasumi matoorunneqarsimasut 2000-imi januaarip ulluisa arfineq-pingajuanni nassaarineqarput.

Arnaq kalaaleq niaqqumigut sakkortuumik anaaneqarnerminik niaquata saarna innarlerneqarsimavoq. Niviarsiarannguarlu kiinaata sioqqanut naqinneqarnerani ipisimasoq, toqusunik misissuinermi paasineqarpoq.

Angut indiamiu, Sanjay Sharma pasineqarluni suliami unnerluutigineqarpoq.

Indiamiu Sanjay Sharma marlunnik toqutsisimasutut inuunermi sinnera parnaarussassanngortinneqarpoq.

Amerikamiut isiginnaagassiorfiata suliaq maanna misissuiffiginiarpaa. Taannalu angut toqutsisoq pillugu piviusuinnik tunngavilimmik isiginnaagassiornerussalluni.

Bt.dk taama allaaserisaqarpoq.

- Danmarkimi suliamut tunngatillugu soqutiginninnerput alianartorujussuarmik pinerluuteqartoqarnerani Sanjay Sharmap toqutsinerani eqqarsartaatsimut tunngasuinnaanngilaq, taassumali aamma nunat assigiinngitsut akornanneersuunera.

- Nunani assigiinngitsuni angalasoqarneruleraluttuinnarpoq, taamaalilluni nunarsuarmi imminut qaninnerusoqalerluni, taamaammat suliaq una alianartorujussuaq killeqarfiit akimorlugit pinerluuteqartoqartarnerannut ilinniutitut assersuutigineqarsinnaasoraarput, TDR. Productionsimit Angad Batra BT-mut oqarpoq.

B.T-p inuit Sanjay Sharmap Danmarkimiinnerani nunatsinniinneranilu tassunga attaveqarsimasut aamma attavigerusuppai.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.