Amerikamiup eqqumiitsup taxartitsisoq Kalaallit Nunaata USA-mut ilanngunnissaanut atsioqataaqqullugu 200.000 dollarinik neqeroorfigigaa

Ilanngutassiaq Amerikamiut oqartussaasuinik oqaaseqaammik nutarterneqarpoq.

Taxartitsisoq Danny Brandt Hotel Hans Egedep silataani taxassarsiorlutik utaqqisut akornanni pingasunngornermi ualikkut ilaasussarsigami, ilaasoq nalinginnaasuusoraa.

Angut utoqqaq naatsunik qiiginnarnik nujalik atiuminartunik atisalik biilinut ikivoq, imminullu 'Cliff'-iunerarluni ilisaritippoq tuluttullu 'Amerikamiorpaluttorujussuulluni' oqalulerluni, Danny Brandt oqaluttuarpoq.

Angut suminngaanneernersoq aperaa.

'Las Vegas,' ilaasoq ingerlaannaq akivoq.

Taava aningaasanoorneq blackjackilu eqqartorneqarput, Danny Brandt KNR-imut oqaluttuarpoq.

Angutilli niuffissaminut, Hotel Sømap, silataanut pigamik angullu niulermat, oqaloqatigiinnerat allanngorluinnarpoq.

'200.000 dollarit piumavigit?' Danny Brandtip angutip taassumap taamatut oqarnera eqqaamavaa.

'Sooq?' Danny Brandt akivoq.

‘That’s the spirit’ (Tassa taamatut taamaassaaq, aaqq.), 'Cliff' oqartoq, Danny Brandt oqaluttuarpoq.

Angutip taassumap Danny Brandt oqarfigaa, atsioruni 200.000 dollarinik akissarsisinnaasoq.

'Suna atsiorlugu?' Danny Brandt akivoq.

Taxartitsisumut neqeroorut eqqumiitsoq 

Taava angutip pappiaqqat amerlasuut tigummiani takutippai, quppernerlu qullermi allaqqavoq Kalaallit Nunaata USA-mut ilanngunnissaa pillugu atsiornernik katersuiniartoqartoq.

Danny Brandtip eqqaamavaa allassimasoq ’85 procentinit atsiornernik katersuisoqassasoq’.

Tamanna innuttaasut taasisinnaatitaasut 85 procentiisa atsiornerat pisariaqarneranik isumaqarsoraa.

Danny Brandt uumitsakkaluarluni suligami ileqqorissaarluni inussiarnersumik neqeroorut itigartippaa pappiaqqallu angummut utertiutigalugit ima oqarluni:

- Donald Trumpip Amerikamiluunniit præsidentip allap naalakkersuinerani USA-mut ilanngukkusulernavianngilanga.

'Ajunngilaq, tamanna ataqqivara.', angut biilinit niunnginnermini ataqqinnippaluttumik taamatut akisimasoq Danny Brandtip oqaluttuaraa, angulli niunnginnermini qiviariarluni ima oqarpoq:

- Utaqqiinnarit. Atiga Cliff eqqaamajumaarpat. Nuliat, qitornatit angajoqqaatillu – ilissi kalaallit tamassi – januaarimi immikkut tamassi 200.000 dollarinik pissarsissaasi.

Danny Brandt, pisimasup kinguninngua Facebookimi taama allappoq, allagaalu kalaallit inoqammut attaveqaqatigiittarfianni atuisut akornanni pingasunngornermi ualikkut siammarterneqarpoq.

Alla allappoq Katuap silataani Hotel Hans Egedep tungaanukartilluni angummit tassanngaannit taamatut neqeroorfigitissimalluni.

Danny Brandtip pisoq politiinut kingusinnerusukkut nalunaarutigisimavaa, politiillu biilimi asannerani naapippai.

- Politiit pimoorussisorpasipput, annikitsualuillu tamaasa paaserusuppaat, taanna oqarpoq.

Clipboard taxanillu angalaarnerit

KNR-ip taxartartoq alla Nuummi ingerlatseqatigiiffimmi allami sulisoq, angummik utoqqarmik ‘Cliffimik’ taaneqartartumik pingasunngornermi aamma ingerlassisimasoq pingasunngornermi oqaloqatigaa.

Aquttup kinaassutsini saqqummiukkusunngilaa, angutilli kinaanera KNR-imit ilisimaneqarpoq.

Aquttup taassumap angut taanna Hotel Sømap silataani ulloq taanna siusinnerusukkut aasimavaa, hotelimilu sulisup ateq 'Cliff Stanford' taxat ingerlalermata aquttumut oqaatigigaa, taanna oqaluttuarpoq.

Aquttoq taxanik ingerlassilerami Amerikamiut konsuuleqarfiannut, Greenland Travelimut naggataatigullu politeeqarfimmut ingerlasseqquneqarluni qinnuigineqarpoq.

Konsuuleqarfiup nutsernera pissutigalugu konsuuleqarfiup sumiiffissaa nutaaq aquttup nassaariuminaatsikkaa, aquttup eqqaamavaa, taamaattumillu uniinnarput Greenland Travelimullu ingerlaqqillutik. Angut akileeriarluni tassani niuvoq suliassanilu nangeqqillugit.

Angutip uniffigiumasamini suniarsimanera naluara, aquttoq oqaluttuarpoq.

Angulli issiavimmi saarlermiittoq ippigaa:

Pappiararpassuarnik clipboardimut kiggiguteqqasunik tigummiaqarpoq; atsioqattaartitsinermi nalinginnaasumik atorneqartartunik.

Angutip pappilissat mumikkai aquttup eqqaamavaa, atsiortitseqattaareersimasorlu takuaa. Aquttup eqqaamasai naapertorlugit arfinilinnit qulit tungaannut, inunnit assigiinngitsunit allattariaasilinnit atsiukkat.

Taxartitsisut taakkua, angummik taassuminnga ilaasullit tamarmik angut taanna utoqqartut pitsorluttutut, 80-it missaanni ukiulittut, immaqalu kisermaatut inoorpasittutut taavaat.

- Kisimiittuusoraara. Aallartitatut pissuseqanngilaq, Danny Brandt oqarpoq, asuleertutullu sunniiniartutulluunniit qaffasissumi inissisimasutut pissuseqannginnerarlugu.

- Pissusaa soorluluunniit meeqqanut ornigulluni mamakujuttunik perusunnerannik aperisoq. Uukapaatitsiniaasutut pissuseqarluni, taanna oqarpoq.

Kalaallit Nunaanni Politiit nalunaarutiginnittoqarsimanera KNR-imut sisamanngornermi ullaakkut uppernarsarpaat.

- Kalaallit Nunaanni Politiit nalunaarummik tigusaqartoqarnera uppernarsarsinnaavaat, tamannalu politikkikkut pissutsinut maanna atuuttunut attuumassuteqaratarsinnaavoq. Suliamulli tunngasunik uppernarsaalluta oqaaseqarsinnaanngilagut.

- Nalunaarutigineqartut tamaasa politiinit assigiimmik pineqartarnerat erseqqissaatigissavara, Poul Kreutzmann oqarpoq.

Amerikamiut Københavnimi aallartitaqarfianit oqaaseqartartup 'inuk nassuiaatigineqartoq Amerikamiusut innuttaassuseqarsinnaasoq imaluunniit innuttaassuseqanngitsoq Amerikamiut naalakkersuisuinit sinniisuunngitsoq KNR-imut allappaa.