Nunatsinni partiit akornanni illuatungiliuttutuaasoq Naleraq, illersornissaq pillugu isumaqatigiissut, Issittumi piginnaasat pillugit isumaqatigiissutip immikkoortuisa aappaat, oktobarimi atsiorneqarmalli, isornartorsiuingaatsiarpoq.

Arktisk Kommandop Nuummi allaffeqarfittaarnissaa kiisalu sakkutuut umiarsuaannut tulattarfissaa pillugit Aki-Matilda Høegh-Dam Naleqqameersoq isornartorsiuivoq. Taannami naapertorlugu Nuuk sakkutooqarfittut qitiulersinneqarmat.

Naleqqap folketingimi ilaasortaatitaata Aki-Matilda Høegh-Damip illersornissamut ministeri Troels Lund Poulsen naalakkersuisut danskillu naalakkersuisuisa isumaqatigiissuteqannginneranni isumaqatigiinniarnernut tunngasunik arlalinnik apeqquteqarfigaa.

Ministeri – taassuma isornartorsiuisartuillu allat isumaat naapertorlugu – kalaallit innuttaasuinik aalajangiisartunillu isumaqatigiissutip atsiorneqannginnerani sooq peqataatitsivallaarsimannginnersoq, Aki-Matilda Høegh-Damip paaserusuppaa.

Isornartorsiuineq Troels Lund Poulsenip isumaa naapertorlugu, pissutissaqanngitsoq.

- Isumaqatigiissutigineqartut pillugit oqaloqatigiinneq naalakkersuisut peqatigalugit ingerlanneqarpoq, Kalaallit Nunaannilu naalakkersuisut suliamut sunniuteqarluarput.

- Aammattaaq paasisakka aallaavigalugit, partiit siulittaasui Inatsisartunilu nunanut allanut sillimaniarnermullu ataatsimiititaliaq kalaallit naalakkersuisunit peqataatinneqarput, taamaattumik Kunngeqarfimmi ataatsimoorluta Issittumi Atlantikullu avannaani isumannaallisaanerup nukittorsarneqarnissaanut pingaarutilimmut eqqortumik alloriarsimagatta tulluusimaarutigaara, illersornissamut ministeri oqarpoq.

Qanoq ingerlasoqarpa?

Nunanut allanut tunngasunut naalakkersuisoq Vivian Motzfeldt (S) illersornissaq pillugu isumaqatiginninniarnermi Inatsisartuni partiit siulittaasui kisimik paasissutissanik isertuussassanik pissarsisinnaanerat siornatigut oqaatigaa.

KNR-ip aallakaatitassiaani Oqalliffimmi oktobarimi taama oqarpoq.

Tamanna nipangiussisussaanermik pisussaaffiup sukannernerulersimaneranik pissuteqartoq, Motzfeldt nassuiaavoq.

Nassuiaallu tamanna Aki-Matilda Høegh-Damip apeqqarissaarnermini atorpaa.

- Illersornissamut ministerip naalakkersuisut isertuussisussanngortissimagai taamatumalu malitsigisaanik, allaat Inatsisartut isumaqatiginninniarfigineqannginnerat borgmesterillu suliamut ilanngunneqannginnera ilumoorpa, taanna aperivoq.

Troels Lund Poulsenilli tamanna aallaqqaammut oqaatigerusunngilaa.

- Kalaallit naalakkersuisuinik sunik oqaloqatigiissuteqartarnera ullumikkut nassuiaatiginavianngilara. Nammineerlunga kalaallit naalakkersuisuinik ataatsimeeqateqarninni apeqqut taanna apeqqutigineqarsinnaasutut isigaara, ministeri oqarpoq.

Allat susassaqarfiginngisaat

Akissulli politikerimut Naleqqameersumit naammagineqanngilaq, taannalu apereqqippoq. 

- Taamaappat naalakkersuisup illersornissamut ministerip paasissutissanik Kalaallit Nunaanni Inatsisartunut ilaasortanut ingerlatitseqqinnginnissaq pillugu oqarneraanera ilumoorsimanissaa taava naatsorsuutigineqarsinnaavoq, Aki-Matilda Høegh-Dam aperaaq.

Troels Lund Poulsen naalakkersuisullu oqallisigisimasatik pillugit oqaaseqarfiginiarnagit aammaarluni oqaatigaa.

- Kalaallit naalakkersuisuinik eqqartueqatiginninninnut tunngasunik oqaaseqarnavianngilanga, aamma uannit iliuuserineqarsimasutut oqatigineqartut, uanga nipangiussisussaaninnut nipangiussisussaannginninnulluunniit tunngasunik misissuinissannut periarfissaqarnikuunngilanga. 

- Kalaallit naalakkersuisuinik naalakkersuisumillu oqalliseqateqarnera tatigeqatigiiffimmi pivoq, oqallisigisagut naalakkersuisup pineqartup uangalu ilisimavagut, qallunaat illersornissamut ministeriat akivoq.

Taamaattorli inatsisartut oqallissinnaaniassammata nipangiussisussaanermik peqqusinikuunani oqaatigaa.  

- Oqarsinnaavungali illersornissamut isumannaallisaanermullu tunngasut pillugit politikkikkut oqallittoqaqqusaanngineranik naalakkiineq ajorpunga.

- Kalaallit innuttaasuinik inatsisartuinillu oqaloqateqartarnissap pingaaruteqarnera aamma paasisinnaavara. Politikkikkulli oqaloqatigiinneq allaaneruvoq, politikkikkullu isumaqatigiinniarneq allaalluni, isumaqatigiinniarnerlu Kalaallit Nunaata Danmarkillu naalakkersuisuisa akornanni pisarpoq, Troels Lund Poulsen oqarpoq.

Illersornissamut isumaqatigiissut januaarimi ukioq kingulleq Vivian Motzfeldtimit Troels Lund Poulsenimiillu saqqummiunneqarmat. Assi © : Emil Nicolai Helms/Ritzau Scanpix

Isorinninneq paasisinnaagaa

Inatsisartut nunanut allanut sillimaniarnermullu ataatsimiititaliaata naalakkersuisup Vivian Motzfeldtip matoqqasumik isumasioqatigineqarnissaa qaammat matumani siusinnerusukkut aalajangerpaa.

Pipaluk Lyngep (IA), Inatsisartunut ilaasortap ataatsimiititaliamilu siulittaasup oqarnera naapertorlugu, tamanna Motzfeldtip ataatsimiititaliallu akornanni “attaveqaqatigiinnikkut ajornartorsiuteqarnermik” pissuteqarpoq. Sermitsiaq taama allaaserinnippoq.

Borgmesterit illersornissaq pillugu isumaqatiginninniarnernut naalakkersuisumit peqataatinneqannginnerat ilaatigut isorineqarpoq.

Ataatsimiititaliamiittut peqataatinneqanngitsutut misigisimanerat Vivian Motzfeldtip ajuusaarutigaa. 

- Inatsisartut aammalu ataatsimiititaliap kissaataannik piumasaqaataannillu soorunami naammassinnittussaavunga, taamaattumik assut ajuusaarpunga  tamakkiisumillu utoqqatserfigaakka, pingaartumik nunanut allanut sillimaniarnermullu ataatsimiititaliamut sumiginnaasutut misigititsisimagama, Vivian Motzfeldt Sermitsiamut oqarpoq.