Air Greenland amigartooruteqariarluni iluanaaruteqartoq naatsorsuuteqarnerulerlunilu

Air Greenland siornarnit ingerlalluarnerujussuuvoq. 

Timmisartortitseqatigiiffik qaammatini arfinilinni akileraaruteqannginnermini 9,8 millionit koruuninik iluanaaruteqartoq, suliffeqarfiup ukiup affaanut nalunaarutaani takuneqarsinnaavoq. 

Siorna piffissami matumani 87,4 millionit koruuninik amigartooruteqarpoq. 

Ukiullu sinneranut naatsorsuuteqarnerulerpoq. Akileraaruteqannginnerminilu ukioq manna 100 millionit koruunit missaannik iluanaaruteqassangatippoq. 

Air Greenlandip saqqummiussineratut ingerlatsineq patajaannerusoq, aningaasanik kaaviaartitaqarnerulerneq aamma kinguaattoornernut ingerlatsinermilu akornuteqarnernut aningaasartuutikinnerulerneq pingaartumik peqqutaapput. 

Aaqqissuussaanermili suli ilungersunartoqarpoq. 

Timmisartoqarnerulertoq

Timmisartuussisoqarnerulernera pitsanngoriaatit malunnarnerpaat ilaanniippoq.

Ukiup affaani siullermi timmisartuussinerit 85,7 procentii pilersaarutit malillugit ingerlapput. Siornalu kisitsit 71,8 procentimiilluni. 

Taamaattumik piffissaq eqqorlugu timmisartuussisoqarnerulersimavoq. 

Air Greenlandip timmisartunut suluusalinnut pilersaarutaanit 73 procentit piffissamut pilersaarutaasumut 15 minutit iluanni aallarput. Taakku siorna ukiup affaani siullermi 53 procentiupput. 

Taamaattumik timmisartuussiniarnermi ajornartorsiutit ikinnerummata aningaasartuutikinnerusoqarpoq. 

Pissusissamisoortuunngitsumik ingerlatsinermi toqqaannartumik siorna aningaasartuutit 70,9 millionit koruuninit ukioq manna 44,6 millionit koruuninut apparput.

Pisortaanerup Jacob Nitter Sørensenip timmisartuutileqatigiiffiup allannguineri sunniuteqarluarsimanerarpai.

- Naleqqussaanerit ingerlassimasat sunniuteqarput, aamma Kalaallit Nunaanniit aamma tamaani angalanissamut piumassuseqarnerit suli annertullutik. Kisianni angusassarput suli angunngilarput.

Nunanit tamalaanit angalarusuttut amerlanerulerneratigut nunanit tamalaanit ilaasut ukiup affaani siullermi 8 procentimik amerlipput.

Nuummi mittarfimmi suli ajornartorsiuteqartitsisoq

Naalli ingerlatsineq patajaanneruleraluartoq angallannermi attaveqaasersuutit timmisartukkut angallassineq allanngoraangat suli ilungersunarsinnaasarput.

Air Greenlandip Nuummi Mittarfimmi isumannaallisaanermi misissuisarnermi sulisussaaleqineq erseqqissaatigaa, timmisartuutileqatigiiffik tamanna pissutigalugu kinguaattoornerit kingusissukkut timmisartuussinikkut angumeriniarnerat ilaannikkut ajornakusoorsinnaasarpoq.

Nuummi akunnittarfinni inissat killeqarnerat pissutigalugu angallassinissaq allanngoraangat timmisartumut ilaasunik isumaginninniarnermut aamma ajornakusoortitsivoq.

Timmisartuutileqatigiiffiup pisortaanerata, Jacob Nitter Sørensenip timmisartuutileqatigiiffiup timmisartukkut angallannerup sunnerneqarnerani ilaasussanik isumaginninniarneq suli pitsanngorsarniaraa oqaatigaa.

Kaaviiaartitat amerliartortut

Air Greenlandip ilanngaaseereerluni kaaviiaartitai 7,5 procentimik amerlillutik 928,3 millionit koruuninngorput.

Timmisartuutileqatigiiffiup ataatsimut aningaasartuutai 39,4 millionit koruuninik ikilipput, tassa 4,1 procentimik, tamanna ingerlatsinerup annikillineranik aamma ingerlatsinermi pissusissamisuunngitsunut aningaasartuutikinnerunermik pissuteqarpoq.

Qaqortumi mittarfiup nutaap ammarnera nunatta kujataani angallannermut aamma allannguivoq.

Mittarfiup 1.499 meterinik takissuseqartup apriilimi ammarnerata kingunerisaanik Narsarsuaq aqqusaaqqaarnagu Qaqortumut Qaqortumiillu toqqaannartumik angalanermi ilaasoqarnerulerpoq.

Nunatta kujataata Nuullu akornanni angalarusuttoqarnerulerpoq, nunattalu kujataani angallavinni kiffartuussiffiusuni angalasukinnerulerluni.

Aningaasaliingaatsiartoqangajalersoq

Naalli aningaasaqarneq pitsanngoraluartoq Air Greenland aningaasaliiffigineqangaatsiartussaavoq.

Timmisartuutileqatigiiffiup Illersornissamut ministereqarfik timmisartut Dash 8-t marluk  nunatsinni ukiuni qulini nakkutilliinermut 2028-mi atorneqartussanngortinneqarnissaannut ilaatigut isumaqatigiissuteqarfigaa.

Air Greenlandip Hotel Hans Egedep ingerlatsinermik suliffeqarfianik pisinissamut juulimi aamma isumaqatigiissuteqarpoq.

Atuisartoqarnermulli Unammilleqatigiinnermullu Aqusisoqarfiup akuersinissaa pisariaqarmat pisinissaq suli naammassineqanngilaq.

Air Greenlandip aningaasaatai tigoriaannaat juunip naanerani 783,7 millionit koruuniupput. Timmisartuuteqarfigiiffillu aningaasaliissutinut sanaartukkanullu ingerlasunut ilaatigut aningaasaliiniarluni saniatigut nutaamik taarsigassarsivoq.

Taamaammat timmisartuutileqatigiiffiup ineriartornera pitsaasoq attallugulu aningaasaliissutissat aggersut piareersarfigissagai, siulersuisuni siulittaasup, Malik Hegelund Olsenip oqaatigaa.

- Naatsorsuutitigut angusat takutippaa Air Greenland ingerlatsinermi ilungersunartut pitsaanerusumik qaangersimagai, tassa 2025-mi atuussimasut. 

Taassuma 'malunnaatilimmik aningaasaliisoqarnissaa' nunatsinnilu attaveqaasersuutinut tunngatillugu ineriartornissamut suli piumasaqaateqartoqartoq ilanngullugu oqaatigaa.