Illersornissaqarfiup isumaqatigiissuteqarfiginera Air Greenlandimut patajaannerulersitsisoq

Air Greenlandip Illersornissaqarfiup nunatsinni suliassaasa ilaannik akisussaaffeqalissaaq.

Danskit illersornissamut ministeria, Nuummut sivikitsumik tikeraarnerminut atatillugu nunanut allanut naalakkersuisoq Múte B. Egede peqatigalugu juunimi tusagassiortunik katersortitsimmata saqqummiunneqarpoq. 

Isumaqatigiissuteqarneq timmisartortitseqatigiiffiup silarluttarnerata nunatsinni timmisartuussinissanik ilungersuuteqartarnerata aamma nunat tamalaat akornanni timmisartuussinermut unammilleqatigiinnerulernerup nalaani eqqissiallaatigaa. 

Timmisartortitseqatigiiffiup pisortaa Jacob Nitter Sørensen oqarpoq. 

- Isumaqatigiissutip sivisunera patajaanneralu Air Greenlandimut iluaqutaassaaq. Sulisut amerlasuut suliassaqartinneqarnissaannik qulakkeerinnissaaq ukiullu qulit tulliuttut ingerlanerini aalajaatsumikisertitaqalersinnaalissalluta, Jacob Nitter Sørensen taama oqarpoq.  

Naalakkersuisut tusagassiuutinut nalunaarutaanni isumaqatigiissut piffissami 2028-miit 2037 tikillugu atuutissaaq, tassani 1,6 milliardit koruunik atorneqassallutik. 

Air Greenlandip ukiuni arlalinni ilungersunartorsiornerata nalaani isumaqatigiissuteqartoqarpoq. Sila ajornartorsiortitsisarsimaqaaq, Nuummilu mittaarfittaaq nunatsinni timmisartuussinissamut nutaanik piumasaqartitsilerluni. 

Piffissaq allanngorarfiusoq

Nunatsinni illoqarfiit pingaarnersaanni mittarfik nutaaq atulermat Kangerlussuarmi mittarfik nunatsinnut isaaffittut pingaarnertut inissisimajunnaarpoq. Kangerlussuarmit Nuummut nunatsinni angalaneq pisariaqarunnaarluni. Tamanna ilutigalugu nunanut allanut angallassinermi unammilleqatigiinnerusoqalerpoq. 

Jacob Nitter Sørensenillu oqarnera naapertorlugu, ilungersunartut siunissami ikiliartunngillat.

- Sila allanngorartuarpoq, timmisartullu kinguaattoornerinut unitsitsiinnartarnerinullu aningaasartuutigut amerligaluttuinnarput. Nunatsinni timmisartuussineq ilungersunarsigaluttuinnarpoq  ilaasut ikiliartormata. Atlantikoq qulaallugu timmisartuussinermi unammillerteqarneruleraluttuinnarpugut, taamaattumik tamanna (isumaqatigiissut aaqq.) ukiuni arlalinni allanngujaatsumik naatsorsuutaasinnaasumillu aningaasarsiorfiusinnaanera iluaqutaassaaq.

Air Greenlandip Illersornissaqarfimmik isumaqatigiissuteqarnerup kingunerisaanik, Illersornissaqarfiup assartuinermut, nakkutilliinermut annaassiniarnermullu suliassaasa ilai isumagilissavai. Air Greenlandillu suliassaq naammassisinnaajumallugu Dash 8-t marluk allanngortiterlugit suliarissavai.

Timmisartut atorneqanngitsut atulissasut

Jacob Nitter Sørensenilli timmisartut taakkua marluk timmisartuussiniarnermi amigaatigineqalinnginnissaat erseqqissaatigaa. 

- Ilulissani mittarfik oktobarimi atulerpat, ilaasut Nuuk aqqusaarlugu timmisartuunneqartartut amerlanersaat nunatsinni timmisartuussinermit peerneqassapput. Taamaattumik timmisartunik atunngitsuuteqalissaagut. 

- Taamaattumik timmisartut taakkua tuniinnarnagit suliassanut allanut atulernissaat silatusaarneruvoq. Tamannalu isumaqatigiissummi matumani iluatsippoq, Jacob Nitter Sørensen oqarpoq. 

Taassuma Air Greenlandip sulisuisa suliassanik nutaanik isumaginnittuunissaat ilassutigalugu oqaatigaa. 

- Suliassamut uunga suliaqartussanik sulilersitsissaagut. Taamaalilluni isumaqatigiissut suliffinnik qaffasissunik inissisimasunik kalaallit suliffissaqarsinnaanissaannut pitsaasorujussuuvoq. Assersuutigalugu Issittumi tunngaviusumik ilinniartut siunissami qinnuteqarsinnaanissaminnut naleqqutissapput. 

Illersornissaqarfiup Air Greenlandillu isumaqatigiissuteqarnissartik qangali pilersaarutigisimavaat.

Issittumi piginnaasaqalernissamut 2021-mi isumaqatigiissummi allaqqavoq Illersornissaqarfiup Air Greenlandimik suleqateqarnerulernissaa, Illersornissaqarfiullu suliaqarnermini timmisartortitseqatigiiffiup timmisartuutaanik atorsinnaassasoq. 

Isumaqatigiissut tallimanngormalli atsiorneqarpoq.