42-nik ukiulik Kangaamiuni suliamut atatillugu tigummigallarneqartoq
Angut, 49-nik ukiulik, toqungasoq Kangaamiuni pingasunngornermi ullaap tungaani siumorneqartoq pillugu inuit pingasut tigusarineqarlutik suliamut atatillugu sassartinneqarput.
Sassartitsinermi angut 42-nik ukiulik ulluni 28-ni tigummigallagassanngortinneqarpoq.
Kalaallit Nunaanni Politiit sisamanngornermi unnukkut tusagassiuutinut nalunaarummi paasissutissiipput.
Angutit allat marluk sassartinneqartut Qeqqata Eqqartuussisoqarfianit iperagaatinneqarput, unnerluussisussaatitaasulli angutit aappaata iperagaaneranut aalajangerneq suliareqqitassanngortikkaat, politiit tusagassiuutinut nalunaarummi paasissutissiipput.
Politiit suliaq toqutsisoqarneratut misissueqqissaarfigigaat aamma Danmarkimit pinerluttoqarneranik paasiniaasartunik toqungasunillu misissuisartunik misissueqqissaarnermi ikiutaasussanik aggersaasimasut sisamanngornermi saqqummiunneqarpoq.
Politiit suliami misissueqqissaartoqarnera pissutigalugu suliamut atatillugu itinerusumik paasissutissiisinnaanngillat, politiilli suli Kangaamiuniittut, politiit nalunaarutertik naggaserpaat.
