2027-mut aningaasanut inatsisissaq piareertoq

Aningaasaqarnermut naalakkersuisup, Aqqaluaq B. Egedep (IA) 2027-mut aningaasanut inatsisissaq tusagassiortunik ataasinngornermi katersortitsinermi saqqummiuppaa.
Assi © : KNR / Markus Valentin
Allattoq Emil Weis
novembarip 09-at 2026 14:30

2027-mut aningaasanut inatsisissap isumaqatiginninniutigineqarnera naammassivoq.

Aningaasaqarnermut naalakkersuisoq, Aqqaluaq B. Egede (IA) tusagassiortunik ataasinngornermi ualikkut katersortitsinermi oqarpoq.

Aningaasanut inatsisissaq naalakkersuisoqatigiinnit, Demokraatinit, Inuit Ataqatigiinnit, Atassummit illutungiliuttullu partiiannit Siumumit akuersissutigineqarpoq.

Naleraq aningaasanut inatsimmik akuerseqataanngilaq.

- Ataatsimoornissarput pingaaruteqartorujussuartut isigaara, Aqqaluaq B. Egede tusagassiortunik katersortitsinermi oqarpoq.

Taamaammat Siumut isumaqatigiissummut akuerseqataalluni akisussaaffimmik tigusinera qujassutigaa.

Aningaasanut inatsisissap ilaa nunatsinni innuttaasunut oqinnerulersitsinissamut tunngassuteqarpoq:

- Naak kikkut tamarmik kissaataannut aningaasaliinissatsinnut akissaqanngikkaluarluta innuttaasunut ullumikkut oqilisaasserusuppugut, Aqqaluaq B. Egede oqarpoq.

Taassuma aningaasanut inatsimmut siunnersuutit arlallit oqaatiga. Ilaatigut utoqqaat soraarnerussutisiaqartut suliffeqarnissaannut periarfissat ilaatigut pitsaanerulersinneqassapput, angajoqqaallu sinerisaami meeqqerivimmut akiliutaannut tapiissuteqartoqassaaq.

- Ulluinnarni atugassat akitsoriartortillugit angajoqqaat akiliisarunnaassapput, Aqqaluaq B. Egede oqarpoq.

Demokraatit: Amerlanerusut sulissapput

Demokraatit 2027-mut aningaasanut inatsisissap siammasissumik taperserneqarnera aamma pitsaasuunerarpaat.

Taakku sulisinnaasut amerlanerunissaat pingaartippaat.

- Demokraatinit aningaasaqarnikkut pissutsit nutaat peqaaffiginiarlugit aalajangerpugut. Perorsaasunut utoqqarnullu sulerusuttunut aningaasat. Kikkut tamarmik pisariaqartippagut, Margrethe Thårup Andersen (D) tusagassiortunik katersortitsinermi oqarpoq: 

- Nunami isorartuumi amerlanngilagut. Ajornartorsinik nassuerutiginninnissarput taakkulu pillugit iliuuseqarnissarput pingaaruteqarpoq.

Inuit Ataqatigiinnit Ane Hansenip aningaasanut inatsisissap ilaqutariinnut meerartalinnut peqqinnissaqarfimmullu atugassarititaasunik pitsaanerusunik qulakkeerinissaa pingaaruteqartippaa:

- Isumaqatigiissut una peqqinnissaqarfimmi sulisut atugaannut pitsaanerulersitsinissaa neriuutigaarput, ilinniarsimasut sulisullu nunatsinneersut taamaalillutik pitsaanerusumik atugassaqartinneqalissallutik, Ane Hansen oqarpoq:

- Amerlanerusut uterlutik peqqinnissaqarfimmi sulerusulernissaat neriuutigaara.

Naalakkersuisoqatigiinnit partiip kingulliup Atassutip soraarnerussutisialinnut aaqqiissuteqartoqarnera nuannaarutigaa.

- Kiisami, Atassutip siulittaasua, Aqqalu C. Jerimiassen oqarpoq.

Taassuma siunnersuut, utoqqaat soraarnerusutisiaqalersimasut sulisinnaanerannik ajornaannerulersitsisussaq 2019-imili siunnersuutigineqartoq aatsaalli maanna pisoqarfiusoq oqaatigaa.

Siulittaasup, Aqqaluaq B. Egedep angusarissaarneranik aamma nersualaarpaa.

- Suleqatigiinnikkut aatsaat angusaqartoqarsinnaavoq, taanna oqarpoq.

Illuatungiliuttut partiiat isumaqatigiissuteqaqataasoq

Aningaasanut inatsisissami pitsaasut arlaliupput, taamaammat Siumut isumaqatigiissuteqaqataavoq.

Tamanna Erik Jensenip (S) tusagassiortunik katersortitsinermi oqaatigaa.

- Siumumit kissaatigut tusaaneqartut oqaatigisinnaavaarput, aamma sunniuteqarsinnaanitsinnik atuutsitsiniarsarivugut. Akisussaaffimmik kivitsiniarsarivugut, Erik Jensen oqarpoq, nangillunilu:

- Isumaqatigiissut qujaannarfigisinnaanngisatsinnik arlalinnik pitsaasortaqartoq isumaqarpugut.

Taassuma aningaasanut isumaqatigiissummi Siumut nuannaarutigisai arlallit oqaatigai. Assersuutigalugu umiarsualinnut talittarfinnullu aningaasanik amerlanerusunik tunniussisoqarpoq, aamma najugaqarfiusuni annerusuni minnerusunilu eqqagassalerinermut aningaasanik immikkoortitsisoqarpoq.

- Kingulleq peqqinnissaqarnermut tunngassuteqarpoq. Peqqinnissaqarnermut isumaqatigiissuteqartoqarnissaa amigaatigaarput. Tamanna partiilersorata kivitsiffigissagipput allassimavoq. Suliassarujussuaq kivinneqartussaavoq, sulisummi pikkorissut pisariaqartippagut atugassarititaannik kivitsinissaagut, Erik Jensen naggasiivoq.

Aningaasaqarnermut naalakkersuisup Aqqaluaq B. Egedep naggasiutigalugu sinerissami inuuniarnermi anignaasartuutit qaffasinnerata ernumassutiginera tusaaniarneqartoq naggasiutigaa.

- Siunissaq eqqarsaatigalugu sulisut pisariaqartippagut. Nunatsinni atugassarititaasut pitsaanerussappata sinerissami akisussaaffimmik tiguseqataanissaq pingaaruteqarluinnarpoq. Najukkanni inuiaqatigiinni iliuuseqarsinnaavutit. Aqqaluaq B. Egede innuttaasunut toqqannartumik saaffiginnilluni oqarpoq.

Tusagassiortunit takkuttunit apeqquteqarnissamut periarfissaqalinnginnerani partiit sisamat isumaqatigiissummik atsiorput.

2027-mut aningaasanut inatsit taamaalilluni isumaqatigiissutigineqarpoq. Taannalu Inatsisartuni naggataarutaasumik sisamanngorpat akuerissutigineqassaaq.